خُروج 17
17
الربّ مرق ألْمي من الحجر
1كُلَّ مُجْتَمَعْ بَنِي إِسْرَائِيلْ رَحَلَوْا مِنْ صَحَرَاء سِينْ مِثِلْ اللّٰهْ أَمَرَاهُمْ بَيَّهْ وَ زَحَفَوْا شِيَّةْ شِيَّةْ لَحَدِّي نَزَلَوْا فِي رَفِدِيمْ بَكَانْ الْمَا عِنْدَهْ أَلْمِي يَشَرْبَوْه. 2فِي الْبَكَانْ دَا، هُمَّنْ قَمَّوْا يَهَرْجُوا لِمُوسَى وَ قَالَوْا: «أَنْطِينَا أَلْمِي نَشَرْبَوْه!» وَ مُوسَى رَدَّ لَيْهُمْ وَ قَالْ: «مَالَا تَهَرْجُونِي؟ وَ مَالَا تِجَرُّبُوا اللّٰهْ؟» 3وَ الشَّعَبْ الْعَطَشْ سَوَّاهُمْ بِزِيَادَةْ وَ قَمَّوْا يُلُومُوا مُوسَى وَ قَالَوْا: «مَالَا مَرَقْتِنَا مِنْ مَصِرْ لِتَكْتُلْنَا أَنِحْنَ وَ عِيَالْنَا وَ بَهَايِمْنَا بِالْعَطَشْ؟»
4وَ فِي الْبَكَانْ دَا، مُوسَى شَكَى لِلّٰهْ وَ قَالْ: «شُنُو نِسَوِّي لِلشَّعَبْ دَوْل؟ فَضَّلْ شِيَّةْ بَسْ يَرْجُمُونِي.» 5وَ اللّٰهْ قَالْ لَيَّهْ: «أَمْشِي قِدَّامْ الشَّعَبْ وَ شِيلْ مَعَاكْ وَاحِدِينْ مِنْ شُيُوخْ بَنِي إِسْرَائِيلْ. وَ شِيلْ فِي إِيدَكْ عَصَاتَكْ الضَّرَبْت بَيْهَا بَحَرْ النِّيلْ وَ أَمْشِي 6تَلْقَانِي قِدَّامَكْ فِي الْحَجَرْ الْقَاعِدْ فِي جَبَلْ حُورِيبْ.#17:6 جَبَلْ حُورِيبْ: هو المعْروف بجبل سِينَاء. أَضْرُبْ الْحَجَرْ دَا وَ يَمْرُقْ مِنَّهْ أَلْمِي لِلشَّعَبْ يَشَرْبَوْا.» وَ مُوسَى سَوَّى الشَّيّءْ دَا قِدَّامْ شُيُوخْ بَنِي إِسْرَائِيلْ. 7وَ سَمَّى الْبَكَانْ دَا مَسَّةْ وَ مَرِيبَةْ (مَعَنَاتَهْ التَّجْرِبَةْ وَ الْهُرَاجْ) أَشَانْ بَنِي إِسْرَائِيلْ هَرَجَوْه لِمُوسَى وَ جَرَّبَوْا اللّٰهْ وَ قَالَوْا: «اللّٰهْ قَاعِدْ مَعَانَا وَلَّا لَا؟»
العَمَالِق حاربوا بني إسرائيل
8عَسْكَرْ الْعَمَالِقْ جَوْا وَ حَارَبَوْا بَنِي إِسْرَائِيلْ فِي رَفِدِيمْ. 9وَ مُوسَى قَالْ لِرَاجِلْ وَاحِدْ مِنْ بَنِي إِسْرَائِيلْ الْأُسْمَهْ يَشُوعْ: «يَلَّا! شِيلْ رُجَالْ وَ أَمْرُقْ حَارِبْ لَيْنَا الْعَمَالِقْ! وَ أَمْبَاكِرْ، أَنَا نَقِيفْ فِي رَاسْ الْحَجَرْ وَ عَصَاةْ اللّٰهْ فِي إِيدِي.» 10وَ يَشُوعْ مَشَى لِيِحَارِبْ الْعَمَالِقْ مِثِلْ مُوسَى قَالَهْ لَيَّهْ. وَ لَاكِنْ مُوسَى وَ هَارُونْ وَ حُورْ طَلَعَوْا فَوْق فِي رَاسْ الْحَجَرْ. 11وَ وَكِتْ مُوسَى يَرْفَعْ إِيدَهْ فَوْق، بَنِي إِسْرَائِيلْ يَغَلْبُوا. وَ لَاكِنْ وَكِتْ مُوسَى يِدَلِّي إِيدَهْ، الْعَمَالِقْ يَغَلْبُوا. 12وَ وَكِتْ إِيدَيْن مُوسَى بِقَوْا تُقَالْ مِنْ الْعَيَا، هَارُونْ وَ حُورْ شَالَوْا حَجَرْ وَ خَطَّوْه تِحْتَهْ وَ هُو قَعَدْ فَوْقَهْ. وَ أَيِّ وَاحِدْ مِنْهُمْ لَزَمْ إِيدْ وَاحِدَةْ هَنَا مُوسَى. وَ خَلَاصْ، إِيدَيْنَهْ بِقَوْا ثَابْتِينْ لَحَدِّي الْحَرَّايْ وَقَعَتْ. 13وَ بِضَرْب السَّيْف، يَشُوعْ أَنَّصَرْ نَصُرْ كَامِلْ فِي عَسْكَرْ الْعَمَالِقْ.
14وَ خَلَاصْ، اللّٰهْ قَالْ لِمُوسَى: «أَكْتِبْ كُلَّ الشَّيّءْ دَا فِي كِتَابْ أَشَانْ مَا يِنَّسِي. وَ خَلِّي يَشُوعْ كُلَ يَسْمَعَهْ أَشَانْ أَنَا نُقُشّ كُلَّ الْعَمَالِقْ مِنْ الْأَرْض وَ بَتَّانْ نَادُمْ مَا يِحَجِّي بَيْهُمْ.» 15وَ مُوسَى بَنَى مَدْبَحْ وَ سَمَّاهْ اللّٰهْ هُو رَايْتِي الْمَرْفُوعَةْ. 16وَ قَالْ: «الْعَمَالِقْ رَفَعَوْا إِيدَيْهُمْ ضِدّ اللّٰهْ. وَ هُو يِحَارِبْهُمْ مِنْ ذُرِّيَّةْ لِذُرِّيَّةْ.»
Obecnie wybrane:
خُروج 17: ع.د.ت19
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
La Bible en arabe tchadien © Alliance biblique du Tchad, 2019
