1 كُرُنْتُس 8
8
الأكِل و الأصْنام
1وَ أَنَا نُرُدّ لَيْكُو فِي الشَّيّءْ الْبُخُصّ اللَّحَمْ الْقَدَّمَوْه ضَحِيَّةْ لِلْأَصْنَامْ. الْكَلَامْ الْإِنْتُو قُلْتُوهْ: «أَنِحْنَ الْمُؤمِنِينْ كُلِّنَا عِنْدِنَا عِلِمْ»، دَا مَعْرُوفْ. لَاكِنْ نُقُولْ لَيْكُو الْعِلِمْ يِسَبِّبْ الْإِسْتِكْبَارْ وَ الْمَحَبَّةْ تِقَوِّي الْخُوَّةْ. 2كَنْ نَادُمْ عَارِفْ هُو عَارِفْ، هُو لِسَّاعْ مَا عِرِفْ مِثِلْ وَاجِبْ يَعَرِفْ. 3لَاكِنْ كَنْ نَادُمْ يِحِبّ اللّٰهْ، النَّادُمْ دَا اللّٰهْ يَعَرْفَهْ.
4وَ فِي الشَّيّءْ الْبُخُصّ أَكِلْ اللَّحَمْ الْقَدَّمَوْه ضَحِيَّةْ لِلْأَصْنَامْ، أَكِيدْ أَنِحْنَ نَعَرْفُوا كَدَرْ الصَّنَمْ، هُو يِمَثِّلْ إِلٰـهْ الْمَا مَوْجُودْ فِي الدُّنْيَا. وَ نَعَرْفُوا كَدَرْ مَا فِي إِلٰـهْ إِلَّا اللّٰهْ الْوَاحِدْ. 5وَ أَكِيدْ، النَّاسْ يُقُولُوا فِي إِلٰـهَاتْ فِي السَّمَاوَاتْ وَ الْأَرْض. وَ بِالصَّحِيحْ، النَّاسْ يُقُولُوا فِي إِلٰـهَاتْ وَ أَرْبَابْ كَتِيرِينْ. 6وَ لَاكِنْ لَيْنَا أَنِحْنَ الْمُؤمِنِينْ، اللّٰهْ وَاحِدْ بَسْ. وَ هُو أَبُونَا الْخَلَقْ كُلَّ شَيّءْ وَ أَنِحْنَ نَحْيَوْا لَيَّهْ هُو. وَ الرَّبّ وَاحِدْ بَسْ وَ هُو عِيسَى الْمَسِيحْ وَ بَيَّهْ هُو كُلَّ شَيّءْ مَوْجُودْ وَ بَيَّهْ هُو أَنِحْنَ حَيِّينْ.
7لَاكِنْ نَاسْ وَاحِدِينْ مَا كَرَبَوْا الْعِلِمْ دَا عَدِيلْ. وَ أَخْوَانْ وَاحِدِينْ فِي عَادِتْهُمْ قُبَّالْ مَا آمَنَوْا، قَاعِدِينْ يَعَبُدُوا الْأَصْنَامْ. وَ فِي فِكِرْهُمْ كَنْ يَاكُلُوا اللَّحَمْ دَا، يِشَارُكُوا بَتَّانْ فِي الْعِبَادَةْ دِي. وَ كَنْ أَكَلَوْا، يِنَّجَّسَوْا أَشَانْ إِيمَانْهُمْ لِسَّاعْ مَا قَوِي. 8وَ صَحِيحْ، الْأَكِلْ مَا يِزِيدْ لَيْنَا رِضَى اللّٰهْ. كَنْ مَا نَاكُلُوهْ، مَا نَخْسَرَوْا شَيّءْ قِدَّامْ اللّٰهْ. وَ كَنْ نَاكُلُوهْ كَمَانْ، مَا نَلْقَوْا مِنَّهْ فَايْدَةْ قِدَّامْ اللّٰهْ.
9لَاكِنْ أَنْقَرْعُوا! لِلْمُؤمِنْ الْإِيمَانَهْ مَا قَوِي، مَا تِخَلُّوا حُرِّيِّتْكُو دِي تَمُرْقَهْ مِنْ الدَّرِبْ. 10أَشَانْ إِنْتَ تُقُولْ إِنْتَ نَادُمْ عَالِمْ وَ كَنْ نَادُمْ إِيمَانَهْ مَا قَوِي يِشِيفَكْ إِنْتَ قَاعِدْ تَاكُلْ فِي بَيْت الْأَصْنَامْ، أَكُونْ هُو كُلَ يَاكُلْ اللَّحَمْ الْقَدَّمَوْه ضَحِيَّةْ لِلْأَصْنَامْ. وَ خَلَاصْ الْعَيْب يَكُرْبَهْ. 11وَ مِثِلْ دَا، إِنْتَ تَابَعْت عِلْمَكْ وَ لَاكِنْ تَلَّفْت بَيَّهْ أَخُوكْ الرَّبِّنَا الْمَسِيحْ مَاتْ فِي شَانَهْ. 12وَ بِمِثِلْ دَا، إِنْتُو تَخْطَوْا فِي أَخْوَانْكُو وَ تِجِيبُوا الْعَيْب فِي الْأَخْوَانْ الْإِيمَانْهُمْ مَا قَوِي وَ خَلَاصْ خِطِيتُوا فِي الْمَسِيحْ. 13أَشَانْ دَا، كَنْ اللَّحَمْ النَّاكُلَهْ يَمْرُقْ أَخُويِ مِنْ الدَّرِبْ، أَنَا أَبَداً مَا نَاكُلْ اللَّحَمْ بَتَّانْ. أَشَانْ مَا نِدَوْر أَخُويِ يَمْرُقْ مِنْ الدَّرِبْ بِسَبَبِي أَنَا.
Obecnie wybrane:
1 كُرُنْتُس 8: ع.د.ت19
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
La Bible en arabe tchadien © Alliance biblique du Tchad, 2019