Yoshuwa 2
2
Yoshuwa kankuwatuma walolalola Yeriku
1“Shakapanu Yoshuwa, mwana gwa Nuni, kawatumiti wantu wawili kwa bada kulawa Shitimu, wagendi wakaloliloli muisi ilii asa mlushi lwa Yeriku. Wagenda,” wasoka kunumba ya mndiyandiya yumu yawamshema Rahabu wagonja aku. 2Mfalumi gwa Yeriku kagambiluwa, “Guloli, wapalu wawili Waisraeli wingira mjini leru pashiru su kuilolalola isi.” 3Su kalagaliriti milagilagi kwa Rahabu wamgambiri, “Guwalaviyi kunja wantu yawawera mnumba mwaku yawiza kuilolalola isi.”
4Kumbiti mdala ulii kaweriti kawafifa kala wantu wawili awa. Su kawagambira walagilagi awa, “Ndo nakaka handa wantu awa wiziti kwaneni, kumbiti neni nivimana ndiri kwawalawiti. 5Womberi wawukiti mshenji paguzyetiti pamberi pa ligomi likulu lya lushi kutatuwa. Neni nivimana ndiri kulii kwawagenditi, su muwafati kalongola hamuwabati.” 6Kumbiti Rahabu kawakweniziyiti walolalola walii kulitala na kuwafifa kwa miweregi ga nguwu nfufu gakagayalikiti aku. 7Su wantu yawalagalirituwiti na mfalumi wawafatiti kwa kupitira njira yaigenditi kuviloku vya Yoridani. Na katepu hera pawawukiti kumjini, ligomi likulu lya mji litatuwa.
8Pamberi walolalola walii hawenigonji, Rahabu kawagendiriti kulitala kuliii, 9kawagambira, “Nivimana kuwera Mtuwa Mlungu kawapanana isi ayi. Kila muntu muisi ayi kawera na lyoga kuusu mwenga na wenikaya woseri wa isi ayi wahera makakala toziya ya mwenga. 10Twenga tupikaniriti Mtuwa Mlungu ntambu yakagayumiziyiti mashi ga bahari ya Shamu kulongolu kwenu pamlawiti muisi ya Misri. Na ntambu yamuwatenderiti wafalumi wawili wa Waamori yawaweriti kumwambu kulushemba Yoridani, Sihoni na Ogu, weni muwalagiti nakamu. 11Palaa patupikaniriti visoweru avi, tuweriti na lyoga nentu toziya ya mwenga. Tupeluwa makakala nakamu toziya Mtuwa Mlungu gwenu, ndo Mlungu gwa kumpindi na pasipanu. 12Vinu munapiri kwa Mtuwa Mlungu, kuwera hamuntenderi maheri neni pamuhera na kaya yangu ntambu yanuwatenderiti maheri, su munanguziyi lilangaliru lya ujimira. 13Munagili neni kuwera mwenga hamumulagi ndiri tati gwangu na mawu gwangu na wakaka wangu na wadada wangu pamuhera na kaya zawu zoseri. Hapeni mwenga mtuleki twilaguwi!”
14Wantu walii wamgambira, “Ukomu wenu ndo ukomu wa twenga! Mlungu na katulagi handa twenga patutenda ndiri ntambu yatutakula! Handa pamumgambira ndiri muntu yoseri visoweru vyatutenda, twenga tukulagila gwenga kuwera Mlungu pakatupanana isi ayi, hatukutenderi gwenga uheri.”
15Su Rahabu kawasulusiya wantu walii kwa lugoyi kupitira mulidirisha, toziya numba yakuwi iweriti inyawiwa mushibambaza sha mji gwa Yeriku. 16Kawagambira, “Mgendi mumigongu mkalififi aku su yawawasakula nawawawona. Mlikali aku kwa mashaka matatu, mpaka yawawafata pawawuya kumjini, shakapanu mgendi zenu.”
17Wantu walii wamgambira mdala ulii, “Twenga hatushitendi nakamu shitwitira shagututenditi tulagila kwa kulirapa. 18Patusoka muisi ayi, gutawi lugoyi lusheri alu mulidirisha lilii lyagutusulusiliriti pasi. Guwatuli pamuhera tati gwaku na mawu gwaku, walongu waku na kaya ya tati gwaku yoseri mnumba mwaku. 19Handa muntu yoseri pakalawa kunja ya numba yaku na kugenda kunumba yimonga, hapeni tuweri na ndawumu kulawirana na kuhowa kwakuwi. Kumbiti handa muntu yoseri pakawera mkati mwa mnumba yaku pakashinkuluwa hera, su shitwatira sha kuhowa kwakuwi hashiweri kwa twenga. 20Kumbiti handa pagumgambira muntu yoseri kuusu visoweru vyetu, su twenga hapeni tufati lirapu lyatukulapiriti gwenga.” 21Yomberi kawagambira “Na iweri ntambu yamlongiti.” Shakapanu kawajimira wagendi zawu, nawomberi wawuka. Nayomberi kalutawa lugoyi lulii lusheri mulidilisha.
22Walolalola walii wagenditi kumigongu. Walikaliti aku kwa mashaka matatu mpaka walii yawaweriti wankuwasakula pawawuyiti Yeriku pota kuwawona. 23Su walolalola wawili awa waselera kulawa kumigongu, walokiti lushemba na kumgendera Yoshuwa, mwana gwa Nuni, wamgambira vyoseri vyawapatiti. 24“Nakaka Mtuwa Mlungu kayitula isi yoseri mumawoku mwetu. Kayi wenikaya wa isi ayi watwezuka twezu toziya ya twenga.”
Obecnie wybrane:
Yoshuwa 2: PBV
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Bible version in the Pogoro Language. @The Word for The World International and Pogoro Language translation. All rights reserved.