पेरेरित 2
2
पेन्‍तिकोसके पबनिक रोज पबित्‍र आत्‍मा चेलाभरिनमे अइनें
1जब पेन्‍तिकोस कहना पबनि आइल, सब बिस्‍वासिभर एक जगामे जमा होइल रेहें।#लेबि २३:१५-२१; बेबस १६:९-११ 2उहिबखत स्‍वरगमहति अरबरगि बन्‍ना आँधि जइसन अबाज आइल आउर ओइन बइठल घर भरगेल। 3ओहकापाछुक आगिक अरफ ढार ओइन आगे देखा परनें आउर आगिक अरफ भाग-भाग होक हुँवाँ रहल सब जन्‍हिन उप्‍पर बइठनें। 4ओइनें सब जनें पबित्‍र आत्‍मालइक भरगिनें आउर पबित्‍र आत्‍माति मन्‍कना सक्‍ति पाक अउरे भासा#२:४ अउरे भासा: अउरे भासा कहलके नाइ सिखल भासा आहे।मे मन्‍के लगनें।
5उ बखतमे सन्‍सारके तमान देसमहति परमेस्‍वरके भक्‍ति करइया यहुदिभर यरुसलेममे आइल रेहें। 6तउ उ अबाज सुनके मनइभरिनके भिर जमा होइल आउर अचम परनें। काहिक्‍कि सब यहुदिभर अपना-अपना भासामे बिस्‍वासिभरिन मन्‍कत सुन्‍नें। 7ओइनें बहुते अचम परके कहे लगनें, “यि मन्‍कइया मनइभर सब गलिलिभर नाइआहें का? 8हमरे तमान देसके मनइभरिन हम्‍मर अपना-अपना भासा ओइन मन्‍कत सुनत होइ। येनें हम्‍मर मेलमेलक भासा कइसे मन्‍के जन्‍नें? 9हमरे हिंयाँ पारथिभर, मादिभर, एलामिभर, मेसोपोटामियक, यहुदियक, कापाडोकियक, पोन्‍टस आउर एसियक बासिन्‍दाभर होइ। 10हमरे फिरिगिया, पामफिलिया, मिस्‍र आउर कुरेनिमे परना लिबियाके तमान इलाकाभर आउर रोममहति आइल यहुदिभर आउर यहुदि धरम अपनाइल अउरे जातके मनइभर फेक हिंये होइ। 11केरेट टापु आउर अरब देसमहति आइल मनइभर फेक होइ। हमरे येन परमेस्‍वरके अचमके कामके बारेम हम्‍मर अपना-अपना भासामे मन्‍कत सुनत होइ।” 12अइसे अचम आउर अल्‍मल परके ओइनें एक अउरेसँघ “इ का आहे?” कहिके पुछे लगनें।
13पर आकुर जनें ओइन हँसिम उरइति कहनें, “येने ते ढेरे अङ्‌गुरके मध पिक मतबार होइल आहें।”
पत्‍रुसके परचार
14तउके पत्‍रुस गेरा पेरेरितभरिनसँघ ठरहेक जोरति सबके सुन्‍ना मेलक कहनें, “यहुदियक मनइभर आउर यरुसलेमके सब बासिन्‍दाभर तोइन इ बात पता होबे, आउर मोर बात सुनो। 15यि मनइभर तोइन सोंचल ढार अङ्‌गुरके मधलइक मतबार नाइहोइल आहें। अब्‍भे ते भिन्‍हिके नउ केल बजल आहे। 16पर योएल अगम्‍जानिन कहल बात यिहि आहे,
17परमेस्‍वर कहतियाँ,
‘आखरि रोजमे मइ सब मनइभरिनउप्पर मोर आत्‍मा पठादहमु।
तउके तोइन लउँरालउँरिया अगम्‍बानि मन्‍किहें,
तोइन जोंन मनइ दरसन दिखहें,
आउर तोइन बुरहाइल मनइभर सपना दिखहें।
18उ रोजमे मोर सेबा करइया,
लोग आउर मेहरुवाभरिन उप्‍पर मोर आत्‍मा पठादहमु
तउके ओइनें अगम्‍बानि मन्‍किहें।
19उप्‍पर बदरिमे मइ अचम-अचमके चिन्‍हा दिखइमु
आउर तरे धरतिमे अचम-अचमके काम करमु।
रकत, आगि आउर धुँवाधुक‍कार देखापरि।
20परमपरभुके महान आउर गउरबमइ रोज अइनाति अग्दे
दिन अन्‍धियर हुइजाइ,
आउर जोन्‍हा रकत ढार लाल हुइजाइ।
21पर जउन परमपरभुमे बिस्‍वास करि, उ उद्‌धार पाइ।’#योए २:२८-३२
22“इस्‍राइलि दादाभइयो, मोर बात सुनो! परमेस्‍वर नासरत सहरके येसुनति तोइन आगे सक्‍तिसालि आउर अचमके काम आउर चिन्‍हा दिखाक परमेस्‍वर उनके पठइले आहें कहना बातके परमान दहनें। इ बात तोइन पता आहे। 23परमेस्‍वर अपना गियान आउर योजना ढार येसुकेहें तोइन हाथमे सउँपदहनें आउर तोइनें उनके दुस्‍ट मनइभरिनके हाथति कुरुसमे टाङ्‍गके मरलो।#मत्‍ति २७:३५; मर्‌क १५:२४; लुका २३:३३; युह १९:१८ 24पर परमेस्‍वर येसुकेहें मरलमहति जिति करले आहें आउर मिरतुके सक्‍तिमहति छुटइले आहें। काहिक्‍कि येसुकेहें मिरतुके अधिनमे रहना असम्‍भब रेहे।#मत्‍ति २८:५-६; मर्‌क १६:६; लुका २४:५ 25राजा दाउद फेक खिरिस्‍टके बारेम अइसे कहले रेहें:
‘मइ परमपरभुकेहें हरदम मोर आगे दिखति आहुँ।
उ मोहके रछ्‌छा करेक तहन मोर दहिना पाँजर आहें, उहिकमारे मइ नाइडरइमु।
26उहिकमारे मइ मनति खुसि आहुँ
आउर खुसिके गित गइमुँ।
मरके जाइकपरि तभु फेक
मइ आसामे जिमुँ।
27काहिक्‍कि तुम मोहके पतालमे नाइछुरतो,
न ते तुम अपना परम पबित्‍र जनके देहिं सरे दहतो।
28तुम मोहके जिन्‍दगिक डगर दिखइले बाटो,
तुम्‍हरसँघ रेहेबखत मइ खुसिलइक रमइतुँ।’#भज १६:८-११
29“मोर दादा भइयाभर, हम्‍मर पुरखा दाउदके बारेम मइ बरहियस केहे सिक्‍मु। उ मरनें आउर उनका मरल देहिंकेहें चिहानमे धरलगेल, तउके उ चिहान अभे फेक हम्‍मरसँघ आहे। 30पर दाउद एकठोर अगम्‍जानि रेहें, उहिकमारे परमेस्‍वर उनकासँघ कसम खाक करल बाचा उनके पता रेहे, कि उनका सन्‍तानभरिनमहति एक जनें उनके ढार राजा बनइहें।#भज १३२:११; २ समु ७:१२-१३ 31दाउद पहिलेहें का होइ कहिके देखके मुक्‍ति दिबइया खिरिस्‍टके बउरि उठाइके बारेम अइसे कहनें,
‘उनके ना ते पतालमे छोरलगेल,
ना ते उनका देहिं सरल।’
32यिहि येसुकेहें परमेस्‍वर जिति करनें। हमरे सब इ बातके साछि होइ। 33परमेस्‍वर बाबा येसुकेहें मानसम्‍मान दइक अपना दहिना पाँजर धरले आहें आउर अपना बाचा ढार उनके पबित्‍र आत्‍मा दहनें। परभु येसु उहि पबित्‍र आत्‍मा अब हम्‍हिन दहले आहें, जउन बात तोइनें देखत आउर सुनत बाटो। 34काहिक्‍कि दाउद ते स्‍वरगमे नाइचरहनें, पर उ अपनें अइसे कहतियाँ,
‘परमपरभु मोर परभुकेहें कहनें,
तुम मोर दहिना पाँजर बइठो,
35जबतक मइ तुम्‍हर दुस्‍मनभरिन हराक
तुम्‍हर पउलिक पाउदान नाइबनइम।’#भज ११०:१
36“उहिकमारे इस्‍राइलके सब मनइभर इ बात जानेकपरि, तोइनें कुरुसमे टाङ्‍गके मारल येसुकेहें परमेस्‍वर परभु आउर मुक्‍ति दिबइया खिरिस्‍ट#2:36 खिरिस्‍ट: खिरिस्‍टके अरथ “अभिसेक करल जन” आहे, आउर हिब्‍रुमे “मसिह” कहतियाँ। दुनु बनइले आहें।”
37पत्‍रुसन कहल बात सुनके मनइभरिनके मन दुखित होइल। ओइनें पत्‍रुस आउर आकुर पेरेरितभरिन कहनें, “दादाभइयाभर, अइसन आहे कहलेति अब हमरे का करि?”
38तउके पत्‍रुस ओइन कहनें, “तोइनें सब जनें अपना-अपना पापकेहें मानके छोरदेउ आउर पाप माफके तहन येसु खिरिस्‍टके नाउँमे बप्‍तिस्‍मा लेउ। तउके तोइनें बरदानके रुपमे पबित्‍र आत्‍मा पइबो। 39इ बाचा तोइन आउर तोइन साखासन्‍तानभरिनके तहन आउर दुर-दुर रहल अउरे जातके मनइभरिनके तहन फेक आहे, जेहके परमपरभु हम्‍मर परमेस्‍वर बुलइतियाँ।”
40तउके पत्‍रुस ओइन आकुर ढेरे बात कहिके गबाहि दहनें आउर ओइन चेताउनि दहति कहनें, “इ दुस्‍ट पुस्‍तन पइना दन्‍डति तोइनें अपनकेहें बचाउ।” 41तउ जत्‍ता जनें पत्‍रुसन मन्‍कल बचनमे बिस्‍वास करनें, ओइनें सब जनें बप्‍तिस्‍मा लहनें आउर उ रोज लगभग तिन हजार मनइभर चेलाभरिनके समुहमे थपलगिनें। 42ओहकापाछुक, ओइनें पेरेरितभरिनसँघ सिखना, सँगति करना, परभु भोजमे भाग लहना आउर पराथ्‍नामे लगातार लागल रहनें।
बिस्‍वासिभरिनके सँगति
43पेरेरितभर अचमके काम करति ढेरे चिन्‍हाभर दिखामें। तउके इ देखके सब मनइभर परमेस्‍वरके डर मन्‍नें। 44तउके बिस्‍वास करइयाभर अक्‍के जगामे जमा होइल करें आउर ओइन सब चिझ साझा रेहे।#पेरे ४:३२-३५ 45ओइनें अपना जगाजमिन आउर चिझबिझ बेंचके जेहके-जेहके जा-जा चिझके जरुरत परे सबके उ बाँटदेहें। 46ओइनें हर रोज मन्‍दिरमे जमा होमें आउर घर-घरमे मिलके खुसि आउर नम्‍र होक परभुभोज खामें। 47ओइनें हरदम परमेस्‍वरके परसन्‍सा करें आउर सब मनइभर ओइन मन परामें। तउके उद्‌धार पबइयाभरिन परभु दिनदिनें ओइनसँघे थपदेहें।
© 2024 (Active), Mother Tongue Translators Society and Wycliffe Bible Translators, Inc. All rights reserved.