Luke 21
21
1စီးမှါခ့်ခါ ကိုယ်တော်ကား ငါန်းဘန်းယူဘန်း ဆွာမ်းဘင်းဆိတ်တာတ်ကား အလှူခံဖလားနောင်းဘေ အလှူစါန်းဘန်းနင်းဘင်းနာတေ ကတုံန်ရာန်မှာ။ 2ဆာန်းရဲသဘင်း မုဆိုးမဟော်ဝါရီးဒါး တန်ဖိုးစစ်ပင်း ဖူးကလိန်းပါတ်တေ အလှူဖလားနောင်းဘေ စါန်းဘန်းနင်းဘင်းနာတေ ကတုံန်မှာ။ 3အန်၌မှါခ့်ခါ ကိုယ်တော်ကား "ဟနိမ်တေ ငါချီလားတေငှေါကူ။ ဆာန်းရဲသဘင်းမုဆိုးမကား တခြားသမီတေထာတ်ပိုသဘန်း အလှူအွန်နီမှာ။ 4သမီဆာတာတ်ကား အန်တာတ်အတွာတ် အလိုသဝါး၊ ပိုသပန်းနင်းဘင်းနာတေဒေ၌ဆာ လှူသကြီးဟာလား။ အန်နိမ်စါန်းငှေါဒီ အဘင်းမုဆိုးမကား ဆာန်းရဲသဒီဒါး ဟိန်ဘေငှါဘင်းနာတေဆွန်ကွန်း လှူဒဘင်းအတွာတ်ထှာမှာ" ညယ်မိန့်တော်မူသမှာ။ 5စီးမှါခ့်ခါ ဗိမာန်တော်ဘင်းလုံးကရှီတေ၊ အရောင်တေကား အကြီးကျယ်ကတန်နင်းဘင်းအတွာတ် လှူသပဲဘင်းပစ္စည်းတေရီးဒါး တင့်တယ်သမှာညယ် သမီဆာစယ်ယား ချီးမွမ်းသပန်းနင်းဘင်းအတွာတ် ကိုယ်တော်ကား 6"ဟနိမ်ကတုံန်လူနင်းဘင်းနာတေကား ပြတ်စီးသဆွန်နာန်ကလား။ လုံးကရှီ ဟုတ်အာစဲ နဂိုနေရာဘေငှါကဘန်းလားအချီရား။ ဆွန်ကွန်း ဖြတ်ဆီးခံဒထှာကူဘင်းအချိန် ထုတ်အီကလား" ညယ်ကြိုတာန်သဘန်းမိန့်သမှာ။ 7အန်၌မှါခ့်ခါ တပယ့်တော်တာတ်ကား ကိုယ်တော်တေ "ကိုယ်တော်၊ အန်ဘင်းအဖြစ်ပျက်တေကား ဟာကားအချိန်ဘေထှာရီကူတေ။ အန်ဘင်းတေ ထှာရီကူဘင်းအချိန်မှါခ့်ခါ ဟမာန်နိမိတ်လက္ခာဏာတေပေါ်ဒီကူတေ" ညယ်စိန်ယူဘန်း လျှောက်တာန်သမှာ။ 8ကိုယ်တော်ကား "သမီပက်သလားတေအခံဒထှာကွန်း ဆတီးအွန်ကြီး။ သမီဆတာတ်ကား ငါနိမ် ဟန်ဆောင်သပန်းနာ 'ငါကားခရစ်တော်ထှာမှာ' 'အချိန်ကားထုတ်ပိန်' ညယ်ငှေါကြီးကူ။ အန်တာတ်နောက်လိုက်တေ အထှာစိန်းကြီးဆာ။ 9ဟနိမ်ကား စစ်ပွဲတေယောက်၊ တော်လှန်ပုန်ကန်သဘင်း ဆတာန်းတေဒေသက်ပူမှါခ့်ခါ အစါတ်ကြီးဆာ။ အန်ဘင်းအဖြစ်အပျက်တေကား အရာန်ထှာရီကူ။ အန်နိမ်စါန်းငှေါဒီ အဆုံးကား အချီနွန်း။ 10'သမီဆာတစ်မျိုးယောက် တစ်မျိုး၊ နိုင်ငံတစ်နိုင်ငံယောက်တစ်နိုင်ငံ စစ်ထှာကြီးကူ။ 11နေရာတိုင်းဘေ ကာငလျင်အွန်ဘင်းတေ၊ ယုတ်တင်အူတင်တေခေါင်းပါးသဘင်း၊ ကမာရောဂါတေထှာကြီးဘင်းနာတေ ကြုံသကြီးထှာကူ။ ဟမုခ်စေါက်ပေ စါတ်ထာတ်မဲဘင်း နမိတ်လက္ခဏာတေပေါ်ဒီကူ။ 12အန်နိမ်စါန်းငှေါဒီ အန်ဘင်းနာတေအထှာချီ သမီဆာတာတ်ကား ငါအတွာတ်ယောက် ဟနိမ်တေရင်ဘန်း နှိပ်စါတ်သကြီးဘန်းနာ ရှာန်းပလာန်တေယောက် အာဏာပိုင်တေမန်းဘေ ကော်ဘန်း စစ်ဆေးခံသထှာဘန်း ထောင်နောင်းဘေ အကျဉ်းအက်ပန်း အပြစ်အီလားခံသထှာကူ။ ရှာန်းပလာန်တာတ်ယောက် အာဏာပိုင်တာတ်မန်းဘေ ကော်ဘန်း စစ်ဆေးသလားခံသထှာကူ။ 13အန်နိမ်စါန်းငှေါဒီ အဘင်းကား ဟနိမ်ယုံကြည်သဘင်းတေ သက်သေကာဒင် အခွါမ့်ရေးထှာကူ။ 14အမှာတွာတ် ဟနိမ်ဟာနိမ် ပြန်သဘန်း ဟာနိမ်ငှေါဟာန်းထှာကူ ငှေါဘင်းနာတေ အစါတ်ကြီးဆာ။ 15ဟမာန်အတွာတ်ငှေါဘန်းသာငှေါ ဆန့်ကျင်သဘင်းရန်သူတေ အငြာမ်းသရာန်ကွန်း နာန်အမှားတေအကာရန်ကွန်း ဟနိမ်တေ ပညာဉာဏ်တေဒေ ငါအီကူ။ 16ဟနိမ်ဘင်း အမယ်အဝါ၊ အမူးနရှီ၊ ဆွေမျိုးတေ၊ မိတ်ဆွေတေကား ဟနိမ်တေသစ္စာဖောက်သကြီးကူ။ ဟနိမ်နောင်းဟက်စယ်ယာကား သာန်းရှီးလားခံသထှာကူ။ 17ငါအတွာတ် သမီဆ၌တိုင်းကား ဟနိမ်တေ ယူးနီကြီးကူ။ 18အာနိမ်စါန်းငှေါဒီ ဟနိမ်ဟလာမ်းစေါက်ပင်း ဟလာမ်းဟူးပယ်ယာစဲ ပြတ်စီးသကလားအချီရား။ 19ဟနိမ် ယုံကြည်သဘင်းကား ခိုင်မြဲသဘန်းကား ဟနိမ် ကယ်တာန်သလားခံသထှာကူ။" 20"ဂျေရုဆလင်မြို့တေ စစ်သားတေကလောင်းတုံန်း ဝိုင်းဒီလားတေ ကတုံန်မှါခ့်ခါ အန်ဘင်းမြို့ကား အမှါတ်ကြီ ပြတ်စီးသကဘန်းငှေါဘင်းတေ မိန်းရှာတ်ခါပဲကြီး။ 21အန်ကားအချိန်ဘေ ယုဒဒေသဘေငှါဘင်း သမီဆာတေကား ကယာစေါက်ပါ ကပ်ဟယ်ကြီးကူ။ မြို့နောင်းဘေငှါဘင်း သမီဆတာတ်ရီးဒါး မြို့ပြာန်ပါ ပူလာန်းပဲကြီး။ မြို့ပြာန်ဘေ ငှါနင်းဘန်းရီးဒါး မြို့နောင်းပါ အဆာန်ဆာ။ 22ဟမာန်တွာတ်ငှေါပန်းသာငှေါ အန်ဘင်းမာန်ရာတ်တေကား ကျမ်းကျိန်းဘေ ရေးသပဲဘင်းနာတေ ထှာကူဘင်း အပြစ်အီကူဘင်း မာန်းရာတ်တေထှာမှာ။ 23အန်ကားအချိန်ဘေ ယုဒပြေ သမီဆတာတ်စေါက်ပေ ဒုက္ခတေအကြီးကျယ်ထှာဘန်း ဘုရားရှာန် အပြစ်အီဘင်းအတွာတ် ပုတ်ကာန်ဘင်းအီးရှီတေယောက်၊ ပန်နယားရှာရှာငှါဘင်း အမယ်တာတ်အတွာတ် ဆိုးရွားသဘင်းအချိန်ထှာမှာ။ 24သမီဆာစယ်ယာကား သာန်ယောက် ရှီးလားခံသထှာဘန်း တခြားဘင်း သမီဆတာတ်ရီဒါး စစ်ကျွန်အနေယောက် တခြားတိုင်းပြေပါ ကော်လားခံသထှာကူ။ တစ်ခြားတိုင်းပြေဘင်း သမီဆာတေကား အန်တာတ်ခေတ် အဆွန်မချန်း ဂျေရုဆလင်တေ လာရာန်ဘန်း အုပ်ချုပ်သလားတေခံသထှာကူ။" 25"စီးမှါခ့်ခါ စမိတ်၊ ဆတားယောက် အူလူရှီနက္ခတ်တာရာတေကား အံ့ဩသထာတ်မဲဘင်း နိမိတ်လက္ခဏာတေ ထှာကူ။ ပင်လယ်သမုဒ္ဒရာ လှိုင်းဆကလားတေအတွာတ်ရီးဒါး ကမ္ဘာစေါက်ပေငှါဘင်း သမီဆတေရီး ဟာနိမ်အွန်ထှာကူညယ် အမိန်းရှာတ်ခါကွန်း စါတ်နင်းကြီးကူ။ 26ဟမုခ်စေါက်ပေ အူလူရှီနက္ခတ်တာရာတေကား နဂိုနေရာဘေအဘိုဘန်း ရှုတ်ယှက်ခတ်သဘန်းနင်းဘင်းအတွာတ် အနားပန်းနူထှာဟာန်းကူငှေါဘင်းနာတေဒေ တွေးသဘန်း သမီဆတာတ်ကား အကြီးကျယ်စါတ်နင်းကြီးကူ။ 27အန်နိမ်အဖြစ်ပျက်တေထှာနင်းမှါခ့်ခါ သမီဆာဆားတော်ကား ဟာန်းချီနောင်းဟက် အဆုံးအဘိုဘင်း တန်ခိုးတော်တေ၊ ဂုဏ်တော်တေယောက် ကြွဒီကူဘင်းနာတေ သမီဆတာတ်ဖူးသလူကြီးကူ။ 28အမှာတွာတ် အန်နိမ်စာတ်ထာတ်မဲဘင်း အဖြစ်ပျက်တေ စသဘန်းထှာရီမှါခ့်ခါ ဟနိမ်တေ သံသရာဟက် လွောပ်သစိန်းကူဘင်းအတွာတ် စပ်ပန်းဟလာမ်းတေ မော့သပန်းပဲကြီး" ညယ်မိန့်တော်မူသမှာ။ 29စီးမှါခ့်ခါ ကိုယ်တော်ကား အန်တာတ်တေ ဥပမာတစ်ပုဒ်အာယောက် ငှေါကာဘင်းနာကား "ဆာန်းညက်ခလွုန်ယောက် တခြားကလွုန်တေဒေ ယူကြီး။ 30သသာပ်အဒီးရှာရှာတေ ပူရီပန်းကား နွေထုတ်ပန်း ငါငှေါဘင်းနာတေ ဟနိမ်ကိုယ်တိုင် မိန်းရှာတ်ခါမှာ။ 31အန်ဘင်းအတိုင်း ငါငှေါရီဘင်းအကြောင်းတေ ထှာရီဘင်းဒေ ဟနိမ်ကတုံန်ကြီးဘန်းကား ဘုရားရှာန်ဘင်းသာသနာတော် ထုတ်အီကဘန်း ငှေါဘင်းနာတေ မိန်းရှာတ်ခါပဲကြီး။ 32ငါချီလားတေငှေါကူ။ အရာတ်အဆာတ်စားဘန်းနင်းဘင်းဆိတ်တာတ် အရှီးကြီ အဘင်းအဖြစ်ပျက်တေ ဆန်ကွန်းထှာကူ။ 33ဟမုခ်ယောက် ကာကား အမြဲတမ်းငှါနင်းကူအချီဒီဒါး ငါတူးတေကား အမြဲငှါပန်းနင်းကူ။" 34"အမှာတွာတ် ယုတ်အာန် အူရာန်၊ ဘဝအတွာတ်ကားရာန်ညယ် ဟနိမ်ဘင်းအချိန်တေ အဆွန်ကွန်း ဆတီးယောက် ဆင်ခြင်သကြီး။ အန်နိမ် အချိန်ဆွန်နင်းဘန်းကား ဟနိမ်အတွာတ် ထောင်ချောက်နိမ် အမှတ်တမဲ့ထုတ်အီကူ။ 35အန်ဘင်းမာန်းရာတ်ကား အဘင်းကမ္ဘာစေါက်ပေနင်းဘင်း သမီဆာတာတ်စေါက်ပေ ထုတ်အီကူ။ 36အမှာတွာတ် ဟနိမ်ရီးဒါး ထှာရီကူဘင်းတေဟက် လွောပ်သဘန်း သမီဆာဆားတော်မန်းဘေ ရဲရဲစပ်လူကွန်း အချိန်ငှါနယ် ဆာတ်သဘန်း ဆုစိန်နင်းကြီး" ညယ်မိန့်တော်မူသမှာ။ 37စီးမှါခ့်ခါ ကိုယ်တော်ကား ဗိမာန်တော်ဘေ နခူမှါခ့်ခါ တရားတော်တေဒေ ဟောသကာ ဆွောန်သကာဘန်း နာတ်ကြယ်မှါခ့်ခါ သံလွင်ကယာစေါက်ပါ လာန်ဘန်းနင်းမှာ။ 38သမီဆာတာတ်ရီဒါး ကိုယ်တော်ဘင်း တရားတော်တေဒေ သက်ကြီးကူညယ် ဗိမာန်တော်ပါ အတိုင်စောင်းရှီ ဒီကြီးမှာ။
Obecnie wybrane:
Luke 21: ktpv-rv
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
