Luke 16
16
1စီးမှါခ့်ခါ ကိုယ်တော်ကား တပယ့်တော်တာတ်တေ ဆာတ်သဘန်းမိန့်သဘင်းနာကား "ပန်းနူမှါခ့်ခါ သူဌေးဟော်ဝါကား ဟိန်ဘင်းအလုပ်တေဒေ စီစါန်သဒင် သမီဆာဟော်ဝါတေ ခန့်သပဲမှာ။ အန်ဘင်းစီစါန်သဘင်းဆိတ်ကား ဟိန်ဘင်းဖူးတေဒေ အလွှဲသုံးစားအွန်ဘန်းနင်းဘင်းနာတေ မိန်းရှာတ်ခါရာန်မှါခ့်ခါ 2အန်ဘင်းစီစါန်သဘင်းဆိတ်တေကော်ဘန်း 'နာန်အကြောင်းတေ ငါသက်ပူထှာဘင်းတေကား ဟာနိမ်ကား။ နာန်အွန်ပဲဘင်းစာရာန်တေဒေ ငါနင်းကာ။ နာန်တေစီစါန်သဘင်းနေရာဘေ ဆာတ်သောအပဲရန်ဘန်း' ညယ်ငှေါရာန်မှာ။ 3အန်၌မှါခ့်ခါ အန်ဘင်းဆိတ်ရီဒါး 'ငါဟာနိမ်အွန်ထှာကူတေ။ ငါအလုပ်ရှာန်ကား ငါတေအလုပ်ဟက် လပူပါန်။ ငါကား ကာထူဒင် အားရီးအဘိုဝါး၊ စိန်ဘန်းယုတ်ကူငှေါဘန်းရီဒါး မန်းကတာန်မှာ။ 4အဘင်းအလုပ်ဟက် လပူလားခံသထှာစီးမှါခ့်ခါ သမီဆာတာတ်ကား ငါတေ အန်တာတ်ကျေမ်းဘေတေ လက်ခံကြိုဆိုသစိန်းဒင် ငါဟာနိမ်အွန်ထှာကူငှေါဘင်းနာဒေ ငါမိန်းရှာတ်ခါဘန်း' ညယ် တွေးသဘန်းနင်းမှာ။ 5စီမှါခ့်ခါ ဟိန်ကား သူဌေးတေ အကြွေးအီဒင် ငှါဘင်းဆိတ်တာတ်တေ ဟော်ဝါစီဟော်ဝါကော်ဘန်း ပထမဟော်ဝါတေ 'နာန်ကား ငါသူဌေးဘေ အကြွေးဟာနယ်အီဒင်ငါတေ' ညယ်စိန်ယူမှာ။ 6အန်ဘင်းဆိတ်ရီးဒါး 'သံလွင်ဆလော စည်ပုံးပါတ်နူအီဒင်ငှါမှာ' ညယ်ဖြေသမှာ။ စီစါန်သဘင်းဆိတ်ရီးဒါး 'စရာမ်းစာရွက်အမြန်လာဘန်း ဟာရှစ်ရေးတာန်" ညယ်ငှေါရာန်မှာ။ 7အနားဟော်ဝါတေရီးဒါး 'နာန်ကား အကြွေဟာနယ်ငှါတေ' ညယ်စိန်ယူမှါခ့်ခါ အန်ဘင်းဆိတ်ကား 'ဂျုံသတူအိတ် ပါတ်နူ' ညယ်ဖြေသဘင်းအတွာတ် စီစါန်သဘင်းဆိတ်ရီးဒါး 'စရာမ်းစာရွက်ပေ ပက်နူရေးတာန်' ညယ်ငှေါဝါမ်မှာ။ 8အန်၌မှါခ့်ခါ သူဌေးကား စီစါန်သဘင်းဆိတ်ပင်း ဟိန်ကိုယ်ကျိုးအတွာတ် အွန်ဘန်းနင်းဘင်းနာတေ ကျေနပ်သနင်းမှာ။ ဟမာန်တွာတ်ငှေါဘန်းတာတ်ငှေါ ကမ္ဘာစောက်ပေငှါဘင်း သမီဆာတာတ်ကား ဆာဆအိတ်တေထာတ်ပိုသောဘန်း ကိုယ်ကျိုးတေအတွာတ် အွန်ကြီးဟာမှာ" ညယ်မိန့်တာန်မှာ။ 9ပန်းနူ ကိုယ်တော်ကား တပယ့်တော်တာတ်တေ မိန့်သဘင်းနာကား "ဟနိမ်တေ ငါငှေါကူ။ အတရားသောညယ်လူပဲဘင်း လောကီဥစ္စာတေဒေ နပ်ကြီးဘန်း ကိုယ်နင်း မိတ်ဆွေတေလူကွန်း အွန်ကြီး။ အန်ဘင်း လောကီဥစ္စာတေဒေနပ်ပန်း ဆွန်နာန်မှါခ့်ခါ ဟနိမ်တေ ဘုရားရှာန်ဘင်း ဟာ၌မှါခ့်ခါစဲ အကယာရာန်ဘင်း ရွှေမြို့တော်ဟက် ကြိုသနင်းကူ။ 10ကိစ္စစစ်ဆာတေဘေ သစ္စာငှါဘင်းဆိတ်ကား အရေးတုံန်းဘင်းကိစ္စတေဘေရီးဒါး သစ္စာငှါကြီးမှာ။ ကိစ္စစစ်ဆာတေဘေ အရိုးသားသဘင်းဆိတ်ကား ကိစ္စတုံန်းဘေတေရီးဒါး အရိုးသားသောညယ်ထှာကူ။ 11ဟနိမ်ကား အန်နိမ်ညယ်အမြဲသဘင်း လောကီစည်းစိမ်တေဒေဆဲ သစ္စာအဘိုဘန်းကား မှန်ကန်သဘင်းလောကီစည်းစိမ်ဒေ ဟနိမ်ဘေ ဟာဟမဲကား အပ်သကူတေ။ 12ဟနိမ်ကား သမီဘင်းပစ္စည်ဥစ္စာတေဒေ သစ္စာအဘိုဘန်းကာ ဟာဟမဲကား ဟနိမ်အတွာတ် အီကူတေ။ 13ဟာဘင်းအစေခံဆဲ အဆိတ်ကလိန်းဟူးတေ အစေအခံသရန်နား။ ဟိန်ကား ဟော်ဝါတေ ယူနီဘန်း တခြားဟော်ဝါတေမစ်ကူ။ ဟော်ဝါတေ သစ္စာငှါဘန်းကား ကျန်သဘင်းဟော်ဝါတေ မထီမဲ့မြင်အွန်ကူ။ အန်နိမ်သဒါး ဟနိမ်ကား ဘုရားရှာန်ယောက် လောကီစည်းစိမ်ဒေ တစ်ပြိုင်တည်း အစေခံသလား အလူဝါး" ညယ်မိန့်တော်မူသမှာ။ 14အန်ဘင်း ဖူးတေမာတ်သဘင်း ဖာရိရှဲတာတ်ကား အန်ဘင်းတူးဒေ သက်ပူမှါခ့်ခါ ကိုယ်တော်တေ နီးကြီးမှာ။ 15အာနိမ်စါန်းငှေါဒီ ကိုယ်တော်ယေရှုကား အန်တာတ်တေ "ဟနိမ်ကား သမီဆာတာတ်မန်းဘေ ကိုယ်ကောက်ကိုယ်တေ သမီဆာမလဲနိမ် ဟန်ဆောင်သကြီးဟာမှာ။ အန်နိမ်စါန်းငှေါဒီ ဘုရားရှာန်ကား ဟနိမ်အဆေင်တေ မိန်းရှာတ်ခါမှာ။ သမီဆတာတ် တန်ဖိုးပဲဘင်းလောကီစည်းစိမ်တေကား ဘုရားရှာန်အတွာတ်ကား တန်ဖိုးအဘိုဘင်းနာတေ ထှာမှာ။ 16ဝဲငွတ်ပင်းမာန်းဂလာ အိုးဆကြီး ယောဟန်ခေတ်အထုတ်ကြည် သမီဆာတာတ်ကား မောရှေပညတ်ကျမ်းယောက် ပရောဖက်တာတ်ပညတ်တော်တေအတိုင်း လိုက်နာသကြီးရီမှာ။ ယောဟန်ပေါ်သစီးမှားနောက်တေ ဘုရားရှာန်ဘင်းသာသနာတော် အကြောင်းတေ ငှေါကာမှါခ့်ခါ သမီဆာတာတ်သက်ပူကြီးဘင်းအတွာတ် သမီဆတာတ်ရီးဒါး သာသနာတော်နောင်းဘေ ဆာန်လူကွန်း ကြိုးစားသကြီးရီမှာ။ 17အာနိမ်စါန်းငှေါဒီ ဘုရားရှာန်ဘင်း နှုတ်ကပါတ်တော်တေနောင်းဟက် စစ်ပင်းကျိန်းနူဝါ ပြာတ်တာန်လားထာတ် ဟမုခ်ယောက်ကာ ကယာရန်ကူဘင်းနာကား ပိုသောပန်းစယ်မှာ။ 18ကိုယ်အိတ်တေ ဖါတ်ပန်း တခြား အီးရှီဟော်ဝါတေ လာဘင်းဆိတ်ကား အိမ်ထောင်ရေး ဖောက်ပြန်သဘင်းတေ ကျူးလွန်သဘင်းဆိတ် ထှာမှာ။ ဟလားဟက် ဖါတ်ပဲဘင်း အီးရှီတေလာဘင်းရီဒါး အာနိမ်အတိုင်းထှာမှာ" ညယ်ငှေါမှာ။ 19စီးမှါခ့်ခါ ကိုယ်တော်ကား "ပန်းနူမှါခ့်ခါ ဈေးတုံန်းဘင်း နိတ်တင်တော်ဒင်တေတော်ဘန်း မန်းရာတ်၌တိုင်း စည်းစိမ်ခံစားသဘန်း မွန်းနင်းဘင်း သူဌေးဟော်ဝါငှါမှာ။ 20အန်ဘင်းသူဌေးကျေမ်းပေါက်ဝဘေ လာဇေရုညယ်ကော်ဘင်း လာန်တစ်ကိုယ်လုံး ကမာတေတူနင်းဘင်း ဆာန်းရဲဆားဟော်ဝါကား 21သူဌေးစားပွဲစောက်ခက် အက်နီဘင်း ယုတ်တင်တေဒေ ယုတ်ကာတ်ပင်းအဆေင်ယောက် ပေါ်ဘန်းနင်းမှာ။ ဟိန်လာန်ဘေရီးဒါး ကမာတေတူနင်းဘင်းအတွာတ် ကြည်တေရီးဒါး ဒီဘန်းဟိန်ကမာတေဒေ သာပ်နင်းကြီးမှာ။ 22မာန်းရာတ်ရအာမှါခ့်ခါ လာဇရုရှီးလာန်ဘဲဘန်း မဲဘင်းဟမာန်းတာတ်ကား ဟိန်တေ ဟိန်ဘင်းအုတ်တာတ်အတော်တာတ်ထှာဘင်း အာဗြဟံပါကော်လာန်ဘဲကြီးမှာ။ သူဌေးရီးဒါး ရှီးလာန်ဘဲမှါခ့်ခါ နွတ်လားခံသထှာဘန်း 23မရဏဘုံဘေ ဒုတ္ခတေခံသနင်းထှဘာဘန်း ဟိန်စောက်ပါ ယူဝါမ်မှါခ့်ခါ အာဗြဟံပိုက်ပင်း လာဇရုတေ လမ်းစာဟက် ကတုံန်ရာန်မှာ။ 24အန်၌မှါခ့်ခါ ဟိန်ကား ဟာတ်ပန်းနာဟပ်ပန်း 'အဝါအာဗြဟံ၊ ငါတေစံယုတ်။ ငါကား ဝါမ်နောင်းဘေ အကြီးကျယ်ဝေဒနာတေ ခံသနင်းထှာဘင်းအတွာတ် လာဇရုဘင်းတာပ်ရှီတေ ဝဲဆွပ်သဘန်း ငါဆလီးတေ ကဆင်းကွန်းအတွာတ် ဟိန်တေ သာတ်အီယုတ်' ညယ် တောင်းပါန်သမှာ။ 25အန်နိမ်စါန်းငှေါဒီ အာဗြဟံကား 'ငါဆာ၊ နာန်အဆာတ်စားနင်းမှါခ့်ခါ မလဲကလဲတေ လူရီဘန်း လာဇရုကား အမဲဘင်းနာတေ၌ဆာ လူရီဘင်းနာတေ ဆတီးလူ။ အရာတ်လာဇရုကား အဘင်းဘေ မလဲကလဲနင်းထှာဘန်း နာန်ကား ဒုက္ခတေအကြီးကျယ်ခံသနင်းထှာမှာ။ 26အန်ဘင်းဆာအချီ ဟနိမ်ယောက် အလေကြားဘေ အကြီးကျယ်ထိန်ဘင်း ချောက်တုံန်းခြားသနင်းဘင်းအတွာတ် ဟာဟမဲဆဲ အရာတ်နီရန်နား' ညယ်ငှေါရာန်မှာ။ 27သူဌေးရီးဒါး 'အဝါအာဗြဟံ၊ အန်နိမ်ငှေါဘန်းကား လာဇရုတေ ငါအဝါကျေမ်းပါ လာန်ဘန်း 28အယာတ်နိမ် ဒုက္ခတေခံသနင်းထှာဘင်းနေရာပါ အထုတ်စိန်းကွန်း ငါအမူးနရှီဟာဟူးတေ ဆတီးအီဒင် တာတ်အီယုတ်' ညယ်လျှောက်တာန်သမှာ။ 29အာဗြဟံရီးဒါး 'နာန်ဘင်းအမူးနရှီတေကား မောရှေယောက် ပရောဖက်တာတ်ရေးသပဲဘင်း ကျမ်းကျိန်းတေငှါမှာ။ အမှာတေဒေ အန်တာတ် လိုက်နာသကြီးထှာကူ' ညယ်ငှေါမှါခ့်ခါ 30သူဌေးကား "အဝါအာဗြဟံ၊ အန်ဘင်းတေယောက် အကွန်းနွန်း။ ရှီးစီးဘင်းသမီဆာတာတ်နောင်းဟက်ဟော်ဝါ ဟော်ဝါကား အန်တာတ်ပါလာန်ဘန်း ငှေါဝါမှားဆာ အန်တာတ်ကား နောင်တသံဝေဂတေလူကြီးကူ' ညယ်ငှေါမှာ။ 31အာဗြဟံရီးဒါး 'အန်တာတ်ကား မောရှေယောက် ပရောဖက်တာတ်ရေးသပဲဘင်း ကျမ်းတေဒေဆဲ အသက်ပန်းကား ရှီးလားဟက် ဒီဟာန်းဘင်း သမီဆာဟော်ဝါဘင်း တူးဒေရီးဒါး သက်ကြီးကလားအချီရားညယ်ငှေါမှာ' ညယ်မိန့်တော်မူသမှာ။
Obecnie wybrane:
Luke 16: ktpv-rv
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
