Luke 17
17
1ယပြီးကေ ကိုယ်တော်ယေရှုဟာ တပည့်တော်တိကို “လူတိ အပြစ်ဒုစရိုက်ကို လုပ်မိစီရေအရာတိ အများကြီးဟိရေ။ ယကေလဲ လူတိကို အပြစ်လုပ်မိအောင် ဖြားယောင်းသွီးဆောင်ရေလူတိဟာ ဒုက္ခရောက်ကတ်လိမ့်မေ။ 2အရာလူကို အပြစ်ဒုစရိုက်လုပ်စီဖို့အစား ကိုယ့်လိုင်ပင်းကို ကြိုးကွင်းစွပ်၊ ကျောက်တုံးဆွဲပြီးကေ ပင်လယ်ထဲကို ခုန်ချလိုက်ဟာက ပိုကောင်းဖို့သိမ်း။ 3ယင်းကြောင့် မတ်ရို့လုပ်တေအရာတိကို သတိထားပြီးလုပ်ကတ်ပါ။ မတ်ရဲ့ ညီအစ်ကိုတိ အပြစ်လုပ်မိကေ သူ့ကို ဆုံးမပါ။ သူနောင်တရကေ သူ့ကိုခွင့်လွှတ်ပီးကတ်။ 4သူဟာ တစ်ရက်မာ ခုနှစ်ခါတောင်မတ်ကို ပြစ်မှားပနာ အကြိမ်တိုင်း မတ်ပါးကိုလာလို့တောင်းပန်ကေတောင်မှ သူ့ကို ခွင့်လွှတ်ပီးရဖို့” လို့မိန့်တော်မူလိုက်တေ။ 5ယင်းခါ သာဝကတိက အရှင်ယေရှုကို “ကျွန်နော်ရို့ရဲ့ယုံကြည်ရေစိတ်ကို ပိုလို့တိုးပွားစီတော်မူပါ” လို့လျှောက်တင်ကတ်တေ။ 6ကိုယ်တော်ကလည်း “မုန်ညင်းစိအငယ်ချေလောက်တောင် ယုံကြည်ချက်ဟိကေ ဒေပိုးစာပင်ကြီးကို အမြစ်ကကျွတ်ထွက်ပနာ ပင်လယ်ထဲမာပေါက်စီလို့ အမိန့်ပီးလိုက်ကေ ယင်းအပင်ဟာ မတ်ရို့အမိန့်ကိုနာခံလိမ့်မယ်။ 7မတ်မာ အစီခံ၊ မဟုတ်ကေ သိုးကျောင်းသားပိုင် အငှားသားတစ်ယောက်ဟိဖို့ဆိုကေ ယင်းအစီခံဟာ လယ်ကွင်းထဲကနီ လယ်ထွန်၊ သိုးကျောင်းပြီးလို့ ပြန်လာရေအခါ မတ်ကသူ့ကို ‘အိမ်ထဲကိုလာလို့ စားပါသောက်ပါ’ လို့ပြောဖို့ လား။ 8ယင်းပိုင်ပြောဖို့အစား ‘ငါစားဖို့တစ်ခုခုပြင်ပနာ ငါစားပြီးရေအထိ အနားမာစောင့်နီ။ ယေပြီးခါမှ မတ်စား’ လို့ပြောဖို့မလား။ 9အစီခံဟာ သူ့ရဲ့တာဝန်ဝတ္တရားအတိုင်းလုပ်ဟာကို သခင်က သူ့ကိုအထူးတလည် ကျေးဇူးတင်ဖို့လို့လား။ 10ယင်းပိုင်ရာ မတ်ရို့ဟာလည်း မတ်ရို့ကိုစီခိုင်းထားရေအလုပ်တိ လုပ်ပြီးရေခါ ‘ကျွန်နော်ရို့ဟာ သာမန်အစီအပါးတိရာဖြိုက်လို့ ကျွန်နော်ရို့ လုပ်သင့်လုပ်ထိုက်တေအရာကိုရာ လုပ်ခဟာဖြိုက်တေ’ လို့ရာပြောကတ်ပါ” ဆိုပြီးကေမိန့်တော်မူလိုက်တေ။ 11ယပြီးကေ ကိုယ်တော်ဟာ ဂျေရုဆလင်မြို့ကိုလားရေလမ်းမာ ရှမာရိပြည်နဲ့ ဂါလိလဲပြည်ကြားမာဟိတဲ့ နယ်စပ်ကနီဖြတ်လို့လားရေ။ 12ရွာတစ်ရွာကိုရောက်တေခါ အနာကြီးရောဂါသည်ဆယ်ယောက်ဟာ ကိုယ်တော်ပါးကိုလာကတ်တေ။ 13သူရို့ဟာ ကိုယ်တော်ရဲ့အဝီးမာရပ်ပြီးကေ အသံအကျယ်ကြီးနဲ့ “ကိုယ်တော်ယေရှု၊ ကျွန်နော်ရို့ကို သနားတော်မူပါ” လို့လျှောက်ကတ်တေ။ 14ကိုယ်တော်က သူရို့ကိုမြင်ခါ “ပုရောဟိတ်တိပါးကိုလားပနာ အသင်ရို့ခန္ဓာကိုယ်ကိုပြခီကတ်ပါ” လို့မိန့်တော်မူလိုက်တေ။ သူရို့လားနီတုံးမှာပင် အနာကြီးရောဂါ ပျောက်လားခကတ်တေ။ 15သူရို့ထဲက တစ်ယောက်ဟာ အနာကြီးရောဂါ ပျောက်ကင်းလားဟာကိုသိခါ ဘုရားရှင်ကို အကျယ်ကြီးချီးမွမ်းပနာ ကိုယ်တော်ပါးကို ပြန်လှည့်လာခရေ။ 16ယပြီးကေ သူဟာ ကိုယ်တော်ရဲ့ရှေ့မာ ဒူးထောက်ပနာ ကိုယ်တော်ကို ကျေးဇူးတင်ခရေ။ ယင်းလူကား ရှမာရိပြည်သားဖြိုက်တေ။ 17ယင်းခါ ကိုယ်တော်က “အနာကြီးရောဂါပျောက်လားဟာ ဆယ်ယောက်မဟုတ်လား။ အရာကိုးယောက်ဇာမာလဲ။ 18ယေတာလဲ ဘုရားရှင်ကို ကျေးဇူးတင်ဖို့ ပြန်လာရေလူဟာ ဒေတိုင်းတပါးသားကလွဲလို့ အရာတစ်ယောက်တောင်မဟိယာလား” လို့မီးတော်မူပြီးခါမှ 19ယင်းရှမာရိပြည်သားကို “မတ် ထလို့ လားဖိ။ မတ်ရဲ့ယုံကြည်ခြင်းက မတ်ကိုကျန်းမာစီခရာ” လို့မိန့်တော်မူခရေ။ 20တစ်ရက်နိန့်ခါ ဖာရိရှဲတချို့ကလည်း ကိုယ်တော်ကို “ဘုရားရှင်ရဲ့သာသနာတော်ဟာ အဇာချိန်ခါပေါ်ထွန်းဖို့ရောင်” လို့မီးလျှောက်ကတ်ဟာကြောင့် ကိုယ်တော်က “ဘုရားရှင်ရဲ့သာသနာတော်ဟာ မတ်ရို့မြင်နိုင်ရေပုံစံနဲ့ ပေါ်ထွန်းလာဖို့မဟုတ်။ 21လူတိကလည်း ‘ကေ့ကတ်၊ ဘုရားရှင်ရဲ့သာသနာတော်က ဒေနီရာမာဟိပါရေ’ လို့လည်းမပြောနိုင်။ အဇာဖြိုက်လို့လဲဆိုကေ ဘုရားရှင်ရဲ့သာသနာတော်ဟာ မတ်ရို့ကြားမာရာ ဟိလို့ဖြိုက်တေ” လို့မိန့်တော်မူရေ။ 22ယပြီးဟာနဲ့ ကိုယ်တော်ယေရှုက တပည့်တော်တိကို “မတ်ရို့ဟာ လူ့သားတော်အုပ်စိုးရေ နိန့်ရက်တိထဲက တစ်ရက်ချေကိုတောင် တွိ့မြင်ချင်ကေလည်း မြင်ရဖို့ မဟုတ်။ 23ယေတာလဲ လူတိက မတ်ရို့ကို ‘ဒေအရပ်မာ လူ့သားတော်ဟိရေ၊ ဟိုအရပ်မာ လူ့သားတော်ဟိရေ’ လို့ပြောကေလည်း အပြင်ကိုထွက်လို့ အရှာကတ်ကေ့။ 24အဇာဖြိုက်လို့ဆိုကေ အာကာတစ်ဖက်ကနီ အရာတစ်ဖက်ကို လျှပ်စီးလက်လို့ အာကာတစ်ခုလုံးလင်းဟာကို လူတိုင်းမြင်ရပိုင်မျိုး လူ့သားတော်ကြွရောက်လာဖို့နိန့်မာလည်း ယင်းပိုင် မြင်ကတ်ရလိမ့်မေ။ 25ယေတာလဲ ယင်းအချိန်မတိုင်ခင် ပထမဦးဆုံး သူဟာ ဒုက္ခဝေဒနာတိခံစားရပနာ ဒေနိန့်ခေတ်လူတိရဲ့ ငြင်းပယ်ဟာကိုခံရဖို့။ 26ယင်းပိုင်ရာ နောဧရဲ့လက်ထက်ခါ ဖြိုက်ခရေတိုင်း လူ့သားတော်ကြွလာရေခါမှာလည်း ဖြိုက်လိမ့်မယ်။ 27ရီကြီးဖို့ရာဖြိုက်လို့ နောဧဟာ သင်္ဘောထဲကိုဝင်ရေနိန့်ထိ လူတိဟာ စားလိုက်၊ သောက်လိုက်၊ မင်္ဂလာဆောင်ပွဲလုပ်လိုက်နဲ့ ပုံမှန်အတိုင်းနီခကတ်တေအတွက် ရီကြီးပြီးကေ သူရို့အားလုံးသီဆုံးပျက်စီးခရရေ။ 28ယင်းပိုင်မျိုးယာ လောတလက်ထက်မှာလည်း သောဒုံမြို့ကလူတိဟာ စားလိုက်၊ သောက်လိုက်၊ ဈီးဝယ်လိုက်၊ ရောင်းချလိုက်၊ စိုက်ပျိုးလိုက်၊ အိမ်ဆောက်လိုက်နဲ့ ပုံမှန်အတိုင်းနီခကတ်တေ။ 29ယေတာလဲ လောတဟာ သောဒုံမြို့ကထွက်လားရေနိန့်မာ အာကာကနီ ကန့်နဲ့ရောထားရေ မီးမိုးရွာပနာ မြို့ကလူတိအားလုံး သီကတ်၊ ပျက်စီးကတ်ရရေ။ 30လူ့သားတော်ပေါ်ထွန်းလာရေနိန့်မာလည်း ယင်းအဖြိုက်ပျက်တိပိုင်မျိုး ဖြိုက်လိမ့်မယ်။ 31ယင်းနိန့်ရက်မာ အိမ်ခေါင်မိုးထက်မာဟိရေလူဟာ တစ်ခုခုကိုယူဖို့ အိမ်ထဲကိုမဆင်းကတ်ကေ့။ ယင်းပိုင်ရာ လယ်ကွင်းထဲမာ ဟိနီရေလူဟာလည်း တစ်ခုခုယူဖို့ အိမ်ကိုပြန်မလာကတ်ကေ့။ 32လောတရဲ့မယား ပဇောင်ပိုင်ဖြိုက်ခရေဆိုဟာကို သတိရကတ်ပါ။ 33အသူဖြိုက်ဖြိုက် ကိုယ့်အသက်ကို ကယ်တင်ချင်ရေလူတိဟာ အသက်ဆုံးရှုံးရဖို့။ ယေတာလဲ အသူဖြိုက်ဖြိုက် ငါ့အတွက်နဲ့ ကိုယ့်အသက်ကို စွန့်လွှတ်ရေ လူတိဟာ နိစ္စထာဝရအသက်ကိုရဖို့။ 34မတ်ရို့ကိုငါပြောမေ။ ယင်းညဉ့်မာ အိမ်ယာထဲမာ အိပ်နီရေနှစ်ယောက်မာ ငါ့ကိုယုံကြည်ရေတစ်ယောက်ကို ခေါ်ဆောင်ခံရပြီးကေ ငါ့ကိုမယုံကြည်ရေ အရာတစ်ယောက်ဟာ ကျန်ခရလိမ့်မယ်။ 35ဆန်ဖွတ်နီရေမမါ့နှစ်ယောက်မာ ငါ့ကိုယုံကြည်ရေတစ်ယောက်ဟာ ခေါ်ဆောင်ခြင်းခံရပနာ မယုံကြည်ရေအရာတစ်ယောက်က ကျန်ခရဖို့။ 36ယင်းပိုင်ရာ လယ်ကွင်းထဲမာ လူနှစ်ယောက်ဟိကေလည်း ယုံကြည်ရေ တစ်ယောက်ကို ခေါ်ဆောင်ခြင်းခံရပနာ မယုံရေအရာတစ်ယောက်ဟာ ချန်ထားခံရဖို့” လို့မိန့်တော်မူဟာကြောင့် 37တပည့်တော်ရို့က “အရှင်၊ အဇာနီရာမာ ဒေပိုင်ဖြိုက်ဖို့လဲ” လို့မီးလျှောက်ကတ်တေ။ ကိုယ်တော်ကလည်း “အသီကောင်ဟိရေအရပ်မာ လင်းတတိ အမြဲစုနီတတ်ကတ်တေ” လို့မိန့်တော်မူလိုက်တေ။
Obecnie wybrane:
Luke 17: stpv-rv
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
