كورِنثوس الأولى 3
3
الفصل التالت
1أنا، آ الخوت، ما قدرْتْ شي نهدَر معكُم فحال إدا أنتُمَ روحانيّين، وَلكن خصْني نهدَر معكُم فحال إدا أنتُمَ جسديّين، فحال العيال السّتيتْوين في المسيح. 2شرّبْتْكُم الحليب، ماشي الماكلة، حيت ما قدرْتو شي تاكلو الماكلة، وْباقّين نْدابا ما تقدرو شي. 3حيت أنتُمَ باقّين جسديّين. حيت بيناتكُم الحسد والمدابزات، واش أنتُمَ ماشي جسديّين وْكَتْـتمشّاو فحال البشر؟ 4حيت ملّي كيقول واحد: "أنا تابع بولُس،" وْواحد يَخُر: "أنا تابع أَبُلّوس،" واش أنتُمَ ماشي جسديّين؟
5شكون هُوَ أَبُلّوس؟ وْشكون هُوَ بولُس؟ غير خدّامة الّي بواسطتوم أنتُمَ آمنْتو، وْكُل واحد على حسب ما عْطاه الرَّبّ. 6أنا زرعْتْ، وأَبُلّوس سقى، وَلكن اللّٰه هُوَ الّي كيعطي النمو. 7على ديك الشي ماشي مُهمّ شكون كيزرع أَوْلا شكون كيسقي، وَلكن اللّٰه الّي كيعطي النمو. 8والّي كيزرع والّي كيسقي هُمَ واحد، واخّا كُل واحد غادي يتّجازى على حسب الخدْمة ديالو. 9حنايَ كنشْتَركو مع اللّٰه في الخدْمة، وانتُمَ فدّان اللّٰه، أنتُمَ البناية د اللّٰه. 10على حسب نعْمة اللّٰه الّي اتّعطات لي، أنا، فحال شي مْعلّم ماهر، نزّلْتْ اللساس ويَخُر كيبني عليه. وَلكن كُل واحد خصّوْ يردّ البال كيفاش كيبني عليه. 11حيت ما يقدر حتّى واحد ينزّل لساس يَخُر من غير الّي منزّل، الّي هُوَ يَسوع المسيح. 12وِادا شي واحد كيبني على هَد اللساس بالدهب، النقْرة، والحجار الكريمة، أوْلا بالخشب، التبن والقشّ، 13الخدْمة د كُل واحد غادي تظهر، حيت النهار د الحساب غادي يبيّناْ، حيت بالعافية غادي تظهَر والعافية غادي تجرّب نوع الخدْمة د كُل واحد. 14إدا بقات الخدْمة د شي واحد الّي بناها، غادي يتوصّل بالأجر ديالو. 15وِادا تحرقَتْ الخدْمة د شي واحد بالعافية، غادي يخسراْ، وَلكن هُوَ غادي ينجا، فحال الّي ڭاز بالعافية. 16واش ما كَتْعرفو شي بلّي أنتُمَ بيت العبادة د اللّٰه وْروح اللّٰه ساكن فيكُم؟ 17إدا هدّم شي واحد بيت العبادة د اللّٰه، اللّٰه غادي يهلكوْ حتّى هو، حيت الدار د اللّٰه مقدّسة، وانتُمَ هُمَ هَد الدار. 18حتّى واحد منكُم ما يخدع راسو. إدا شي واحد فيكُم كيظنّ بلّي هُوَ حكيم في هَد الدنيا، خصّوْ يرجع جاهل باش يكون حكيم. 19حيت الحكْمة د هَد الدنيا هي جهالة في عينين اللّٰه، حيت مكْتوب: "هو كيحصّل الحُكَماء بالحيلة ديالوم."#3:19 هَد الاقتباس من سفر أيّوب 5:13. 20وْعاود: "الرَّبّ عارف التخْميم د الحُكَماء بلّي هُوَ باطل."#3:20 هَد الاقتباس من المزمور 94:11. 21على ديك الشي، ما يفْتَخر حتّى واحد بالبشر. حيت كُل شي ديالكُم: 22بولُس وأَبُلّوس وْصَفا والدنيا والحياة والموت والأُمور الحاضرة والماجّة، كُل شي ديالكُم. 23أمّا أنتُمَ ديال المسيح والمسيح ديال اللّٰه.
Obecnie wybrane:
كورِنثوس الأولى 3: ary
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2023 (Active), Instituto de Asistencia Teológica (IAT)