মথি 1

আস্যাং যীশু খ্রীট আচৈং চারাং

(লূক ৩:২৩-৩৮)

1যীশু খ্রীটচা দায়ূদ আচৈং অর দায়ূদচা অব্রাহাম্মা আচৈং। যীশু খ্রীট আচৈং চারাং:

2অব্রাহাম্মা সাঃ ইসহাক; ইসহাকমা সাঃ যাকোব; যাকোবমা সাঃ যিহূদা অর য়াংসুউমা ঞিংরো; 3যিহুদামা সাঃ পেরস-না সেরহ য়াংসুউরোমা মিখাং হিকলিইরি তামর; পেরসমা সাঃ হিষ্রোণ; হিষ্রোণমা সাঃ রাম; 4রাম্মা সাঃ অম্মীনাদব; অম্মীনাদবমা সাঃ নহশোন; নহশোনমা সাঃ সলমোন; 5সলমোনমা সাঃ বোয়স, য়াংসুউমা মিখাং হিকলিইরি রাহব; বোয়সমা সাঃ ওবেদ, য়াংসুউমা মিখাং হিকলিইরি রূত; ওবেদেমা সাঃ যিশয়; 6যিশয়মা সাঃ দায়ুদ মাং।

দায়ুদমা সাঃ শলোমন, য়াংসুউমা মিখাং হিকলিইরি ঊরিয়মা মিকছুমা মিয়া; 7শলোমনমা সাঃ রহবিয়াম; রহবিয়াম সাঃ অবিয়; অবিয়মা সাঃ আসা; 8আসামা সাঃ যিহোশাফট; যিহোশাফটমা সাঃ যোরাম; যোরাম্মা সাঃ ঊষিয়; 9ঊষিয়মা সাঃ যোথম; যোথম্মা সাঃ আহস; আহসমা সাঃ হিষ্কিয়; 10হিষ্কিয়মা সাঃ মনঃশি; মনঃশিমা সাঃ আমোন; আমোনমা সাঃ যোশিয়; 11যোশিয়মা সাঃ যিকনিয়না য়াংসুউমা ঞিংরো- ইস্রায়েল লুঃউম্যুওগো বাবিল প্রিদুঃ খ্যুওয়েং য়ুউ লাঃখা দিঃ ‍লুঃউরো হিকলিইরি। 12যিকনিয়মা সাঃ শলটিয়- দিঃ লুঃউচা ইস্রায়েল লুঃউম্যুওগো বাবিল প্রিদুঃ খ্যুওয়েং য়ুউ লাঃব্রিইনক ম্যুয়িংলিইরি; শলটিয়মা সাঃ সরুব্বাবিল; 13সরুব্বাবিলমা সাঃ অবীহূদ; অবীহূদমা সাঃ ইলীয়াকীম; ইরীয়াকীম্মা সাঃ আসোর; 14আসোরমা সাঃ সাদোক; সাদোকমা সাঃ আখীম; আখীম্মা সাঃ ইলীহূদ; 15ইলীহূদমা সাঃ ইলিয়াসর; ইলিয়াসরমা সাঃ মত্তন; মত্তনমা সাঃ যাকোব; যাকোবমা সাঃ যোষেফ- দিঃ যোষেফচা মরিয়ম্মা লাং। 16দিঃ মরিয়ম ওয়েংমা যীশু, যাসুউগো খ্রীট খঃগেতি, য়াংসুউ পিডিসেংথি য়ুউলিইরি। 17দিঃপুয়েং অব্রাহামগা চাঃরো দায়ূদ আঃছাক রকঅং তিছিলিজৈং; দায়ূদকাবাং চারো বাবিল প্রিদুঃ খ্যুওয়েং য়ুউ লাঃরি রকঅং তিছিলিজৈং; বাবিলমা আখ্যুওয়েং খ্যাব্রিরিকাবাং যীশু খ্রীট রকঅং তিছিলিজৈং।

আস্যাং যীশু ফুওয়াচা

(লূক ২:১-৭)

18খ্রীট যীশুচা দিঃপুয়েং ফুওয়ালিইরি। যোষেফনা যীশু মিখাং মরিয়মগো মাঙ্গালা তাংফু চাঃগা হিকগেলিইরি, ছুগি য়াংসুউরো তেরেতৈংমা নিংফু হ্রিইগা সেংস্যাংস ওয়িইঞেং তেংখুংনা মরিয়মচা কুও ওয়েংসি ফ্রইলিইরি। 19মরিয়ম লাং যোষেফচা লুঃউগং হিকলিইরি, ছুগি যোষেফচা লুঃউ হ্রিইথাকমা মরিয়মগো ম্যাকন্হা ফ্যাকফু মিক্রিলি; য়জংকিজু যোষেফচা লুঃউ মিসিকরাঅং মরিয়মগো খুওয়াফু ক্রিলিইরি। 20যোষেফ যাখা দিঃচারোগো চেংজালিইরি, য়াংখা থাওরা ফোরা ঈ তেমেংদ তয়ক, ইংমাকমা প্রারো প্রলিইরি, “দায়ূদমা আচৈং যোষেফ, মরিয়মগো মাঙ্গালা প্রুকফো মক্রককি, আক্রংগা য়াংসুউ ওয়েংমা যাসুউ পিডিসেংথি য়ুউরিলি, য়াংসুউচা সেংস্যাংস ওয়িইঞেং তেংখুঃনা পিডিসেংথি য়ুউচা। য়াংসুউমা সাঃ তয়ক মুইংফু। 21নাং য়াংসুউ নাঃমি যীশু থাঃলিই, আক্রংগা য়াংসুউচা কুঃ লুঃউরোগু আপ্রইকা কিতাংফু।” 22দিঃচারোচা ফ্রইলাঃরি আক্রংচা রিসিইগা নিংরো থাওরা ফুরাচা যা চাঃগা প্রলিইরি, য়াংচা প্রিজুংঅং: 23“আপ্যুওমা তয়কচা কুঃ ওয়েংসি ফ্রইফু, অর য়াংসুউমা সাঃ তয়ক মুইংফু; য়াংসুউ নাঃমি থাঃফুচা উম্মানূয়েল।” দিঃ নাঃমি আদিপিচা ফ্রইতি, ঙারোনা থাওরা ফুরা।

24থাওরা ফুরা ঈ তেমেংদ যাপুয়েং যোষেফগো আঃনা পিইলিরি, ওয়িইরাগা থাঃরো যোষেফচা য়াংপুয়েং লুকলিইরি। 25যোষেফচা মরিয়মগো মাঙ্গালা প্রুকলিরি, ছুগি সাঃ মাফুওয়া সাগ্রা মরিয়মনা কামা মপংলিব্যা। নক্কা যোষেফ সাঃগো যীশু নাঃমি মিইলিরি।

Obecnie wybrane:

মথি 1: BBSRMZ

Podkreślenie

Kopiuj

Porównaj

Udostępnij