लूका 9

ईसु बारह झन परेरित कुय कुलतेडा

(मत्ती 10:5-15; मरकुस 6:7-13)

1फेर ईसु बारह झन परेरितकू राःकेड कुते भूतकू उडूंग लगड अवुर रोगियाकू चिकन लगड सक्‍ति अवुर अधिकारिय ओवडकू। 2अवुर हेंकू भगवान अपन होड़कू थरे राजेः हेना टेबोः ललाय अवुर रोगियाकू चिकन लगाडिय कुलतेड कुआ। 3हेना वरी ईसु हेंकू थरेय कहनी तेडा, “होर लगड कनर अलोपे सबजोमू न दो लाठी, झोला, रोटी, पेयसा, अवुर बबाटंग कुरता। 4जे ओड़ाः रेपे उतरोआ, हेना सहर वरी अनायिन पे चलोः मेन दिन हें-नी ओड़ाः रेपे दोहोनू, अवुर हेनेन वरी पे बिदाऊ। 5#परेरित 13:51#लूका 10:4-11अवुर हेना गाँव रे कनय होड़ मेने कू मान मरजाद पे रेदो, चलोः तोलोग नेकू थरे गोवाही होयाः लगड कटा पे राः धूड़ी पे कुटा अटु।” 6हेना वरी हेंकू आस पास ताः गाँव गाँव ते होयोर बेड़ाः तींग ते बढ़ियाँः खभेर कू लाय तेडा, अवुर रोगिया कुकू चिकन तेडा।

हेरोदेस धको एना

(मत्ती 14:1-12; मरकुस 6:14-29)

7 # मत्ती 16:14; मरकुस 8:28; लूका 9:19 गलील जिला रेनिय हेरोदेस राजा ईसु काम तड हेना अँजोम केतेय अकबको यनु। कहेकि कुछ होड़कू कहनी तेडा, एहुन्‍ना बतिस्मा ए-मय गोजतन वरिय जियो रिमकेना। 8अवुराःकू कहनी तेडा, “नेय एलियाह हवे” अवुराःकू कहनियूँ, “मरित मरिताःकू भविस्यवक्‍ताकू मेंडे रे कनय जियो रिमकेना।” 9तहाँ हेरोदेस कहनी तेडा, “एहुन्‍ना भोः दोंञ एर पूजा तेडा, नेय ईया हवे, हेंय राः बारे तेंञ अँजोम यडा?” अवुर हेंय ईसु ञेंल लगाडिय तरसोः दोहो एनु।

ईसु पाँच हजार कोड़ाकुय खियो तेडा

(मत्ती 14:13-21; मरकुस 6:30-44; एहुन्‍ना 6:1-14)

10हेना वरी बारह झन परेरितकू मिड़ाः केनते हेंकू जे जे कू करो तडा, हेना सींड़ ईसु कू लाय वडू, तहाँ ईसु हेंकू अनेज सुदा बयेतसदा गाँव हनतेय गोःतेड कुआ। 11लेकिन होड़कू पपाड़ियन ते हेंय तयोम तेकू सेनतेडा, अवुर हेंय एनेम सेनवड कुआयू। ईसु भगवान राः राज राः बारे तेय चेडकू दोहो एनु, अवुर रोगिया कुय चिकन तेडा।

12हेना वरी अयूबुः तोलोग बारहो झन ईसु थरे सेनकेन तेकू कहनी तेडा, “जवार केनकू होड़कुम कुल गोत्तेकू चारो गतर राः गाँव रे सेनकोःते दोहोन लगड अवुर जो-मे लगड कनर कनारा कू लहो जोमा, कहेकि अबू सुनहर ओत रेबुआ।” 13तहाँ ईसु हेंकू थरेय कहनी तेडा, “नेकू दो अनापे खियो कू,” हेना वरी चेलाकू कहनी तेडा, “अले थरे पाँच गोटंग रोटी अवुर बाटंग हकुकींञ छोड़ अवुर कनर कोवाआ, नामेन होड़कू खियो लगड ले तिला अगुय किदो?”

14लगभग नेकू पाँच हजार मेनमोट कोड़ाकू दोहो एना। तहाँ ईसु चेला कुतय थरेय कहनी तेडा, “नेकू पचास पचास राः हिरे हिर तेपे एर दुड़ूब कू।” 15हेंकू सींड़कू हेनेन घयतेकू एर दुड़ूब तेडकुआ। 16हेना वरी हेंय रोटी अवुर हकुकींञ अलगो केते सरग हन तको केतेय धन्यावाद वडा, अवुर टुटका केते चेला कुय ओवाडू, अवुर हेंकू दुड़ूब तन कुकू परोस वडू। 17तहाँ होड़कू जोम पिटो यनु, अवुर चेलाकू बारह छनवाँ कू हटींग अटा तेडा।

पतरस ईसु मसीह मेनतेय अपनो तेडिया

(मत्ती 16:13-19; मरकुस 8:27-29)

18एक दिन ईसु मियाँहोड़ ते सुनहर ओत रेय बिनतीः दोहो एनु। अवुर चेलाकू हेंय सुदा कू दोहो एना, तहाँ ईसु हेंकू थरेय होंबोर तेडा, “होड़कू इंञ ची मेनते कू कहनी वंञ तना?” 19#मत्ती 14:1,2; मरकुस 6:14,15; लूका 9:7,8हेना वरी हेंकू जबाब तेडा, “बतिस्मा ए-माय एहुन्‍ना, अवुर कोई कोई एलियाह मेनते, अवुराःकू कहनिया, पहीलाःकू भविस्यवक्‍ताकू मेंडे रे कनय जियो रिमकेना।” 20#एहुन्‍ना 6:68,69हेना वरी हेंय हेन कुय होंबोर तेडा, “अपे ची मेनते पे कहनी वंञ तना?” तहाँ पतरस जबाब तेडा, “भगवान कुलकेड मिआँ मसीहा हवे।” 21हेना वरी हेंय चेतवन केडकू तेय कहनी वडकू “नआँ कनय थरे अलोपे कहनी बेड़ायू।”

ईसु अनेज राः मिरतू राः बारे तेय भविस्यवाड़ी तेडा

(मत्ती 16:21-28; मरकुस 8:30—9:1)

22ईसु कहनी तेडा, “इंञ होड़ होपोन लगड जरूरी इदाना। अखीर ते दूखिंञ रीमा। अवुर अघुवाकू अवुर बड बडे आजककू अवुर एहूदी नियम चेचेडकू इंञ कू नहकारिञाँ। अवुर कू ञेंड गोजेञाँ, तहाँ तीसरा दिन रेंञ जियो रिमुआँ।”

ईसु तयोम ते से-ने राः मतलोब

(मत्ती 16:21-28; मरकुस 8:30—9:1)

23 # मत्ती 10:38; लूका 14:27 हेना वरी फेर ईसु सींड़ होड़कू थरेय कहनी तेडा, “अगर कनय होड़ इंञ तयोम ते सेन गिसन यडिय रेदो, रोज दिन अनेज राः कुरूस#9:23 कनय हो ईसु मसीह राः तयोम ते सेन गिसानिय रेदो, अनेज जीव एम लगड हो तयार कोःते, हेंय तयोम तेय से-नेआँ यू। रिमकेते इंञ तयोम तेय से-ने। 24#मत्ती 10:39; लूका 17:33; एहुन्‍ना 12:25कहेकि कनय होड़ अनेज राः जीवितिय मोंहवा, रेदो हेंय अनन्त जीवानिय गँवोंआ। अवुर कनय इंञ लगड जीवितिय ए-मा, हेंय अनन्त जीवानिय ञाँमा। 25अगर कनय होड़ सींड़ चीज नआँ धरती रेय ञाँमे। अवुर अनेज राः जीवितिय गँवों रेदो ची फयदाय ञाँमा? 26कनय हो इंञ अवुर ईञाः टेबोईय गेव्वा रेदो, इंञ होड़ होपोन हो ईनिञाँः सोबहा अवुर अपुंञ राः सोबहा ते अवुर पवितर सरगदूतकू राः सोबहा ते मेजुः तोलोग हेंकू सुदांञ गेवुआ। 27इंञ अपे थरे सही मेतेंञ कहनी यडा, नआँ रे चड़ाँ केनकू मेंडे कुछ होड़कू, एयसा इदान कुआ, भगवान राः राज अनायिन कू ञेंले मेन दिन मिरतू राः सवाद एरो कू चिखो तेडा।”

ईसु राः रूप बदलो एना

(मत्ती 17:1-8; मरकुस 9:2-8)

28करीब करीब आठ दिन राः बाद रे ईसु, पतरस, एकूब अवुर एहुन्‍ना नेकू सुदा मियाँ ते बिनतीः लगड बुरू रेय सेनेना। 29तहाँ ईसु बिनतीः तोलोग चेहरात राः रूप बदलो एना, अवुर हेंय राः कपड़ा पुंडी केनते लवकोः दोहो एनु। 30अचाकते मूसा#9:30 ईसु मसीह राः जनम वरी पहील ते दोहोएन कींञ हवे, नेकींञ भगवान राः टेबोः लाय हेंकींञ दोहो एना, मूसा गोजे नयू लेकिन एलिया जीवत ते भगवान सरग हनतेय रिम गोःतेडिया। अवुर एलियाह नेकींञ बा होड़ कोड़ाकींञ ईसु सुदा कींञ टेबोः दोहो एनु। 31नेकींञ बना होड़कींञ चमकोः दोहो एनु। हेन तोलोग ईसु एरुसलेम रे काःतेय गोजुआ, हेना राः बारे ते ईसु थरे कींञ चरचय दोहो एनु। 32तहाँ पतरस एडकू पेनेय होड़ अखीर गितीज गिसन कू दोहो एनु, हेना वरी कू गितीज यनु। जगो एन तहाँ ईसु चमकोः घनी, मूसा अवुर एलिया हेंय सुदा चड़ाँ तन तोलोग कू ञेंलवड किञाँ। 33तहाँ हेंय वरी मूसा अवुर एलिया चलोः मेनते कींञ सँबह तन तोलोग पतरस ईसु थरेय कहनी तेडा, “ए मालिक, अबू नआँ रे दोहोन लगड बढ़ियाँ गिआ। अले नआँ रे पेयटंग तम्बू ले बनोआँ, मियाँटंग अम लगड, मियाँटंग मूसा लगड मियाँटंग एलियाह लगाडू।” ची मेनतेय कहनी यडा हेना मेनेय पपाड़ी दोहो एनु।

34नेन याःतेय कहनिय तोलोग लिंबीर ते उकू गोत्तेड कू, तहाँ लिंबीर तिलतेड कुसी हेंकू बोरो यनकू। 35#मत्ती 3:17; 12:18; मरकुस 1:11; लूका 3:22#2 पतरस 1:17,18हेना वरी हेन लिंबीर वरी आवाज मेजेना, “नेय इंञाअय कोड़ा होपोन हवे। इंञ चुनो केडिय हेनी हवे, नेय राः पे अँजोमू।” 36हेना आवाज बँद एन सी ईसु हेना रे मियाँहोड़ तेय बंचो यनु। तहाँ चेलाकू जपनो यनु, अवुर हेना रे जो कुछ कू ञेंलतड हेना, हेंय राः टेबोः अखीर दिन अँगम कनय थरे मेने कू लाय बेड़ा गडा।

भूत लगो तनय चोंडीजिय चिकन तेडा

(मत्ती 17:14-18; मरकुस 9:14-27)

37हेना ञींदावत हेंकू बुरू वरी कू अगड़ू एन सी अखीर होड़कू ईसु सुदा कू जुमो एना। 38अवुर हेन भीड़ वरी मियाँहोड़ बडे बडे तेय कहनी तेडा, “ए गुरू अम थरे गोड़ींञ गिरोः तना, कोड़ा होपोनींञ थरेम दयाः सी, इंञ कोड़ा होपोन मिनियेंटंग गिआयू। 39हेंय थरे मियाँटंग भूत अचाकतेय झपटो जोमा, हेनाते हेंय अहीज बेड़ाअयू अवुर अखीरिय फेंड़गी बेड़ाआ। अहात ते गजा घलि उडूंग जोमा अवुर बड़ी मुस्किल ते नस नस लुरू पुटू जोम रे हेंडेय अड़ागिया। 40भूतकू उडूंग लगड अमाःकू चेलाकू थरेंञ गोड़े पय्याँ एना, लेकिन हेंकू मेने कू उडूंग सको गना।”

41हेना वरी ईसु जबाब तेडा, “ए अन बिसवास अवुर हठू होड़कू, इंञ तीमिन दिन अँगम अपे सुदांञ दोहोना, अवुर अपे रअंञ सहोआ? कोड़ा होपोन मी नआँ रेम अगेयू।” 42तहाँ हेंय मेनेजुः घनी भूत झपटो केनते ओतेत रे पटको केडिय ते अखीरिय मुरकुटो तेडिया। तहाँ ईसु भूतिय दबेट तेडा, अवुर हेंय चोंडिज चिकन केडिय ते अपातिय जिमा वडा। 43तहाँ भगवान राः सक्‍ति ञेंलकेते सींड़ होड़कू अहचरज यनु।

ईसु अनेज राः मिरतू राः बारे ते फे-रिय भविस्यवाड़ी तेडा

(मत्ती 17:22-23; मरकुस 9:30-32)

44ईसु राः चमत्कार ञेंलकेते सींड़ होड़कू अहचरज यन तोलोग, ईसु अनेज रेनकू चेलाकू थरेय कहनी तेडा, “ईञाः टेबोःपे अँजोमू अवुर कहनी यड हेना उहयर तपे। इंञ होड़ होपोन दुस्मन कुराआ ती रेकू जिमाञाँ।” 45ईसु कहनिय दोहो एनु हेना चेलाकू मेने कू जे-रे दोहो एनु। नआँ टेबोः राः मतलोब हेंकू लगड उकू तना ते मेने कू जेर सकोः दोहो एनु। अवुर हेंकू नआँ बिसेय ते होंबोरिय लगड कू बोर दोहो एनु।

भगवान राः राज रे सींड़कू वरी बडे ईया हवे?

(मत्ती 18:1-5; मरकुस 9:33-37)

46 # लूका 22:24 हेना वरी अबू मेंडे ईया बडेआ? मेनते चेलाकू अनाकू होंबोर ओड़ेंग दोहो एनु। 47ईसु हेंकू राः मन राः टेबोईय पपाड़ियानू। हेंय मियाँहोड़ चोंडिज अक्‍केड ते अनेज बँदेर रेय चड़ाँ तेडिया। 48#मत्ती 10:40; लूका 10:16; एहुन्‍ना 13:20हेना वरी हेंकू थरेय कहनी तेडा, “नेय चोंडिज इंञ ञुमू ते कनय अपनो विय रेदो, हेंय ईञिय अपनोआँ, अवुर कनय हो ईञिय अपनो रेदो, हेंय ईञिय कुलकेडा, अपुञिय अपनोआँ। अवुर अपे मेंडे रे जे होडींञ गिआ, हें-नी सींड़कू वरिय बडे गिआ।”

मेनेय बिरोध हेनी अबू गतर रेया

(मरकुस 9:38-40)

49हेना वरी एहुन्‍ना, ईसु थरेय कहनी तेडा, “ए गुरू, अले मियाँ हो-ड़ू अम ञुमू ते भूतकुय उडूंग तोलोग ले ञेंलवाडिया। हेंय अबू मधे न लगे हेनातेले ईसका सोवाडिया।” 50तहाँ ईसु कहनी तेडा, “हेंय अलोपे ईसका वयू, अपे मेनेय बिरोध हेनी अबू गतर रेया।”

सामरिया रेनकू ईसु कू बिरोध तेडा

51तहाँ ईसु सरग हनते रिम गोगेय राः दिन पुरोः दोहो एनु, हेंय एरुसलेम सेनुः लगाडिय तय तेडा। 52हेना वरी ईसु अनेज लगड सामरिया गाँव रे जघा तयार हतड़ लगड खभेर लाय कुय कुल मड़ंग तेडा। 53तहाँ एरुसलेम#9:53 एरुसलेम एहूदिकू राः राज राः राजधानी हवे, नआँ एहूदिकू राः आराधनाः हेना हवे, सींड़ वरी बडेआ मँडिल हवे। हनतेय चलोः तना मेनाआँ, हेना गाँव रेनकू पपाड़ियन ते, हेंय अकू गाँव रे मेने कू इकम सेनगाडिया। 54नआँ ञेंलके ते चेलाकू मेंडे रे एकूब अवुर एहुन्‍ना कहनी तेडा, “ए परभु, अम चहोः तन रेदो अले कहनी यडा, अगस वरी सेंगेल लोजोर कोःते हेंकू होड़कू नास गोत्तेकू।” 55लेकिन ईसु तेरेज केडकू तेय दबेट तेडकुआ, “अपे मेने पे पपाड़ी तना, अपे थरे करा घियाआ आत्मा इदाना। इंञ होड़ होपोन होड़कू राः जीव नासे लगड बेगारिंञ मे-जा, हेंकू राः जीव बंचो लगाडिंञ मेजकेना।” 56तहाँ हेंकू हेना वरी एटाः गाँव हनतेकू चलो एना।

ईसु रेनिय चेला बनोअय होड़

(मत्ती 8:19-22)

57ईसु अवुर चेला कुतय चलोः दोहो एनु, हेन तोलोग मियाँहोड़ मेजकेन ते ईसु थरेय कहनी तेडा। “जहाँ ना अम सेनुआँ, इंञ अम तयोम तेंञ सेनुआँ।” 58तहाँ ईसु हेंय थरेय कहनी तेडा, “बुवाः लगड लात अवुर अगस तेनकू तितीजकू लगड तुका दोहोना, लेकिन होड़ होपोन लगड भोः छहियों मेनहो जघा कोवाआ।”

59अवुर हेंय एटागी थरेय कहनी तेडा, “इंञ तयोम तेम से-ने।” तहाँ हेंय कहनी तेडा, “ओ परभु, पहील ते अपुंञ हर लगड इकम गोडवंञ मी।” 60लेकिन हेंय फे-रिय कहनी वडियू, “गोजकेन हेंकू अकू राः लास मी एनेम हरवा कू, लेकिन अम सेनकोःते भगवान राः राज राः बारे तेम परचारे।”

61तहाँ अवुर मियाँहोड़ कहनी तेडा, “ए परभु, इंञ हो अम तयोम तेंञ से-नेआँ, लेकिन पहील ते ओड़ाः हनतेम इकम गोडवाञूँ, ओड़ाः रेनकू इंञ कू बिदा गोत्तेंञ लगाडू।” 62हेना वरी ईसु हेंय थरेय कहनी तेडा, “कनय होड़ नंगर मुठिया सबके ते, तयोम हनिय तको रेदो भगवान राः राज लायिक कोवाया।”

Obecnie wybrane:

लूका 9: ksz

Podkreślenie

Kopiuj

Porównaj

Udostępnij