मत्ति 9

लकवा बिमार मानेयतुन येसु सुदरे किन्तोर

(मर २:१-१२; लूका ५:१७-२६)

1पजा ओर डोंगाते गलील नहारता होदपाकाळ हन्जुन आपुना नार मन्जे कफरनाहुमतिगा वातुर। 2अनि अगा हुचुलोर लोकुरक लकवा बिमार मानेयतुन कटुलतिगा इरसुन ओना हेरे ततुरक। येसु ओरा विस्वासतुन हुळसुन ओर लकवा बिमार मानेयतुन इतुर, “हे नोना, हिमते मन्ट निया पाप मापि आतु” इन्जोर इतुर। 3असके मूसान नियमतुन करिहवालोर हुचुलोर लोकुरक, “येर ते परमेस्वरना निन्दा किन्तोर” इन्जोर मन्दे विचार कितुरक। 4येसु ओरा मन्दा पोल्लोंग पुन्ज, “निमाट आपुना आपुना मन्दे बाक्या गलति विचार कियाला आतोरिट? 5निया पाप मापि आतु इन्जोर इन्दाना या तेदा अनि वलिया इन्जोर इन्दाना बोद पोल्लो सोपो मन्ता” इन्जोर पुच्चेमातुर। 6मति मानेयतोर मरिन दरतितिगा पापतुन मापि कियाना अदिकार मन्ता इदाम निमाट पुन्दिला पहाजे इन्जोर ओर लकवा बिमार मानेयतुन, “तेदा, आपुना कटुल ताहा अनि आपुना लोन हन” इन्जोर इतुर। 7ओर तेदचुन आपुना लोन हतुर। 8लोकुरक इद हुळसुन वरियतुरक अनि मानेयतुन इदाम अदिकार हितोर परमेस्वरना महिमा कियाला लागतुरक।

मत्ति पोरोयतोर मानेयतुन येसु आचान्तोर

(मर २:१३-१७; लूका ५:२७-३२)

9येसु अगडाल मुने हतुर असके मत्ति पोरोयतोर वरोर मानेयतुन टाक्स येताना नाकादिगा उदितोर हुळतुर, अनि येसु ओन इतुर, “नावा परके वाय।” ओर तेदचुन ओना परके हतुर।

10येसु मत्तिना लोतिगा जेवन कियान साटि उदितुर असके पकाय टाक्स येतवालोर अनि पापि लोकुरक वासुन येसु अनि ओनोर चेलालोरासंग जेवेकियालाय उदितुरक#लूका १५:१,२। 11इद हुळसुन परीसि लोकुरक येसुना चेला लोकुरकुन, “मिवोर गुरु टाक्स येतवालोरासंग#९:११ रोमि सरकार साटि टाक्स येतवालोरकुन यहुदिलोकुरक पकाय विरोद किन्तोरक। अनि पापि लोकुरासंग#९:११ यहुदिलोकुरक आपुना समाजता हुचुलोर लोकुरकुन पापि लोकुरक इदाम समजेमान्दुरक। बाक्या तिन्तोर?” इन्जोर इतुर। 12इद केन्जुन येसु ओरकुन इतुर, “बिमार मानेय तासिस बिमार हिलेर मानेयतुन डाकटरना जरुरि हिले। 13‘बलिदान आयो मति नना दयाता इच्चा किन्तोना’ इन्जोर पवित्र पुस्तकतिगा कोटता पोल्लोता अर्थ बाताल मन्ता इन्जोर निमाट हन्जुन करियाट। नना परमेस्वरना मुने येताना योग्य बुतो केवाल मन्तोना इदाम आपुनतुन समजेमायवाल लोकुरकुन साटि आयो मति माक पापि लोकुरक आन्दोम इदाम विचार केवालोरकुन केयान साटि नना वातोना#मत्ति १२:७; होशे ६:६” इन्जोर इतुर।

उपासता बारेता प्रश्न

(मर २:१८-२२; लूका ५:३३-३९)

14असके युहन्नानोर चेलालोरक येसुना हेरे वास, “माक अनि परीसि लोकुरक बसकेन बसकेन उपास किन्तोरोम, मति नियोर चेलालोरक बाक्या उपास पयोर?” इन्जोर पुच्चेमातुरक। 15येसु ओरकुन, “बाताल दुलहाल बरातसंग मन्दानुर ते वरताह लोकुरक दुःख किया परान्तोरिट? मति दुलहान बरातिगाडाल अलग कियाना दियांग वायनुंग असके ओरक उपास पयानुरक। 16उन्दि जुनाल सन्दरा हरारते पुनाल सन्दरा कदियसुन बोरे जोळेह किस कोटोर। बाक्याकि अदाम कियानुर ते, कोटस जोळेकिता ओद जागा असा हरार अनि अद सन्दरा मुनेटालताल पकाय खराब आयार। 17अनि लोकुरक पुनाल अंगुरता जोमा जुनाल तोलाता जोरियातिगा निहोर, बाक्याकि इदाम कियानुर ते पुनाल अंगुरता जोमातिगा ग्यास तयारास जोरिया हरार अनि अंगुरता जोमा पोंगान्ता अनि जोरिया नाश आसिन्ता; मति पुनाल अंगुरता जोमा केवल पुनाल तोलाता जोरियातिगा निहान्तोर अदाम अव रन्डास पिस मन्तांग।”

येसु हाता पेडिन जितो किन्तोर अनि बिमार आळदुन सुदरे किन्तोर

(मर ५:२१-४३; लूका ८:४०-५६)

18येसु युहन्नानोर चेला लोकुरासंग इव पोल्लोंग वळकसोर मतोर असके समाज मन्डलिता वरोर अदिकारि वासुन ओन नमस्कार किस, “नावा पेडि इदेक हाता मति निमा वासुन आपुना कय अदेन पोरो इरकि ते ओद जितो आयार” इन्जोर इतुर। 19येसु तेदचुन आपुना चेलालोरासंग ओना परके हतुर। 20असके बारा वरसाताल नतुर हन्दाना बिमारि मता उन्दि आळ, 21“नना ओना सन्दरातुन इटका ते बेस आयका” इन्जोर ओद आपुना मन्दे इन्जुन अदु येसुना परकेडाल वासुन सान्डे येसुना सन्दराता कोडितुन इटतु। 22येसु परके मल्स अदेन हुळस, “पेडि हिमत इरा, निया विस्वास निकुन सुदरे किता” इन्जोर इतुर। ओदेय बेराताल ओद आळ बेस आतु। 23येसु यहुदि समाज मन्डलिता अदिकारिना लोतिगा अवतुर असके हामुर कार्यक्रमता हेरे बासरि नेकिहवालोर अनि किलवालोर लोकुरा भीळतुन हुळतुर। 24असके ओर, “गुचाट, पेडि हायो, हुन्जिला आता।” असके लोकुरक ओना मजाक कियाला लागतुरक। 25ओर भीळता लोकुरकुन बाहरो लोहतुर असके ओर लोपा हन्जुन पेडिना कयदुन पयतुर, अनि अदु पेडि जितो आस तेदित। 26अनि इद पोल्लोता चर्चा ओद देशतिगा पुरा फयले मातु।

येसु इवुर अन्दराहकुन दृष्टि हिन्तोर

27येसु अगडाल मुने हतुर असके इवुर अन्दराह मानेय, “हे दावुदनोर मरि, माकुन दया किम” इदाम इन्जोर ओना परके वातुरक। 28येसु लोन अवतुर असके ओरक अन्दराह लोकुरक ओना हेरे वातुरक, अनि येसु ओरकुन “नना इद किया परान्तोना?” इन्जोर बाताल मिकुन विस्वास मन्ता इदाम ओरकुन पुच्चेमातुर, “इंगो प्रबु” इदाम ओरक उत्तर हितुरक। 29असके येसु ओरा कोन्डानुंग इटस, “मिया विस्वासता अनुसार मिया साटि आयि” इन्जोर इतुर। सान्डे ओरा कोन्डांग तरियतुंग। 30“इद पोल्लोतुन बोरे पुन्माकिर” इन्जोर येसु ओरकुन चेतेहकिस इतुर। 31मति ओरक पसियसुन पुरा देशतिगा ओना बारेता सोबाता पोल्लोतुन फयले कितुर।

येसु वरोर मुकाल मानेयतुन सुदरे किन्तोर

32ओरक अगडाल बाहरो हन्दुर असके लोकुरक दुष्टात्मा मतोर वरोर मुकान येसुना हेरे ततुरक। 33अनि ओर दुष्टात्मातुन पसिहतुर ते मुकाल वळकिला लागतुर। असके “इस्रायेल देशतिगा इदाम बसकेय हुळोम” इन्जोर लोकुरा भीळ आश्चरय किस वेहतुरक। 34मति परीसि लोकुरक, “ओर ते दुष्टात्माता मुक्यालना मदतते दुष्टात्मातुन पसिहान्तोर#मत्ति १०:२५; १२:२४; मर ३:२२; लूका ११:१५” इन्जोर इतुरक।

परमेस्वरना सेवा साटि प्रार्थना किम्ट

35येसु सबोय सहेर अनि नाहक-नाहक वलियसोर यहुदि लोकुरा समाज मन्डलितिगा उपदेश किसोर स्वरग राज्यता बारेता सोबाता पोल्लो वेहचोर अनि सबोय प्रकारता बिमारि अनि कमजोरि लोकुरकुन सुदरे किसोर मतोर#मत्ति ४:२३; मर १:३९; लूका ४:४४। 36ओर भीळतुन हुळस ओरा पोरो दया वातु। बाक्याकि मेहवाल हिलेंग लेस्कतांग बेळांग लेहका ओरक दुःखि आस मतोरक#गिन २७:१७; १ राजा २२:१७; २ इति १८:१६; यहेज ३४:५; मर ६:३४। 37असके ओर आपुना चेलालोरकुन इतुर, “कोयान साटि पन्डता डन्ड ते पकाय मन्ता मति बुतो केवालोर पकाय कमि मन्तोरक। 38इन्जोर आपुना डन्डता फसलतुन कोयान साटि पकाय बुतो केवालोरकुन लोहिर इन्जोर डन्डता मालकाल परमेस्वरिन विनन्ति किम्ट#लूका १०:२” इन्जोर इतुर।

Obecnie wybrane:

मत्ति 9: fmu

Podkreślenie

Udostępnij

Porównaj

Kopiuj