Matiye 3
3
Ja̰ Njeɗabatɛm ila mbərə
Mrk 1.2-8; Lug 3.1-20
1Dɔ kar-ɛ gə əng le Ja̰ Njeɗabatɛm ce ila mbərə ndag lo gə dɔ nangə gə Jude. 2N-pa na: ꞌTuruje kəji lə-si, mba ɓeko̰ gə dara nay əw ang baa. 3Ye ɓa pajambərə Ejay pa tar lə-a na:
To ndu dəw gə ɓar mə ndag lo gə # 3.3
Eja 40.3
ꞌGɔl-je ɗəw lə Mbayɓe le,
ꞌNduji-je kila ɗəwje lə-a ar-ɛje nduji rad-rad.
4Ja̰ ula kubu gə to bḭ jambal. Gagəra tɔ ur-e to ndaar. ꞌKulije gə ubu təji ɓa to nekusa t-ɛ. 5Dəw mə ɓeje gə Jerujalɛm, gə dəwje gə dɔ nangə gə Jude tɔ̰y nəm ɓa nje gə go lo gə Jurədɛ̰ gə nəm, ꞌɗe rɔ-ɛ gə, 6ɗaa ꞌce gəl rɔ-je dɔ neɗa gə kṵra̰y gə lə-je gə ɗaga ngaɓa Ja̰ ɗa-je batɛm mə babo gə Jurədɛ̰ gə.
7Logə n-o to gə Parijiyɛ̰je gə Sadusiyɛ̰je ꞌɗe bula ya̰ mba batɛm ɗaa n-pa n-ar-je na: Sisəy gə ꞌtoje to gə kondɔtɔlje be, na ɓa tɔji-si pa ka̰y wungu lə Luba gə aw ɗe le wa? 8ꞌƊa-je kulaje gə may-may ꞌtɔji-je ne to gə ꞌturu-je kəji lə-si tɔgərɔ ja. 9Ɓo əw-je rɔ-si kunda-je mə-si na: Abəraham to ka-sijee! To gə be ɓa m-pa m-ar-si to gə ərje gə to nee ja kara Luba asə mba təl-je gə nganje kar Abəraham. 10Tina to gəl kagəje gə nam: kagə gə ɗa-ɗa gə andə ɓa kand-e may ang nama d-a tuga gangə kila pədə. 11ꞌMa m-ɗa-si batɛm mə man gə, ɔji dɔ turu kəji, ngaa dəw gə njekore go-m le singamong-ɛ nday-m, ngaɓa m-asə kɔr sabɔgɔ gɔl-ɛ gə ang. ꞌNe ɓa n-a ɗa si batɛm lə Njil Njerɔsangə gə pər. 12N-ar ta ɓalaa gə gir lə-a ji-a gə, n-to ne waa lə-a mba kodo kum mə dam gə, ngaɓa n-a təl kula pər gə a kuy ang tisa gə.
Ja̰ Njeɗabatɛm a ɗa Jeju Kirisi batɛm
Mrk 1.9-11; Lug 3.21-22
13Jeju ḭ dɔ nangə gə Galile aw inga Ja̰ ta man babo gə Jurədɛ̰ gə mba kar n-ɗ-ɛ batɛm. 14Ngaa Ja̰ njigi sə-a ang na: ꞌMa ɓa m-aw ndoo kar-i ɗa-m batɛm ɗaa ꞌi təl ɗe kar-m ꞌma ɓa m-ɗa-i wa? 15Jeju təl ila kəne na: Dɔ kar gə nee ɗaa iya̰ ar to to gə be. Mba j-a ɗa ne ne tɔ̰y gə to gadə-gadə. Ɗaa n-njigi sə-a. 16Logə Ja̰ ɗa Jeju batɛm, ngaɓa Jeju aw ce mə man gə gə ɗaga ɗaa kəm dara cɛ̰ bərərə, ar n-o Njil Luba ɗisi to to gə dər kuul be isi dɔ-ɛ gə. 17Cibi, ndu ḭ dara pa tar na: ꞌNe gə nee le, to Ngon njigi lə-m, gə to ngira rɔləl lə-m.
Obecnie wybrane:
Matiye 3: lap
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, ATALTRAB. All rights reserved