Ŋúnuyɔ 74
74
Kulocɛliɛ yo, gáa nɛ̄ muɔ sì kàa juu ki nīʔ ?
1Asafi#74.1 Wéli baa 50.1 kaliwɛgɛ ki táanmɛ gè. sícilimɛ ŋúnugo gī#74.1 Ki kɔri wiì fílige nɛ̀ cɛ́nʔ. Wéli baa 32.1 kaliwɛgɛ ki táanmɛ gè..
Kulocɛliɛ yo, gáa nɛ̄ muɔ 'weli wáa nɛ̀ mɔgɔ mmɛ gè ?
Gáa nɛ̄ muɔ fungo ki 'yɛ̀ muɔ siɛnnɛ kúrugu bèle kpuʔɔ mmɛ gè,
sìnbatogo gáà muɔ nɛ nári gè ?
2Sɔ̀ngi ma taa nɛ́ Isirayɛli tògo siɛnnɛ ní bèle:
faʔa faʔa gè muɔ yé pe kpíʔile muɔ wuulo, kire saʔa tùlugo gè,
a muɔ 'pe suɔ nɛ̀ yige sùkulomɔ nī bè kire ga buu pe‑ kò muɔ kɔrigɔ.
Sɔ̀ngi ma taa nɛ́ Siyɔn nyagurugo ní gè,
kire gáà nɛ̄ muɔ 'muɔ kòridiʔɛ kpíʔile gè.
3Ma yɛ̀ ma kɛ́ baa, ma sa ki gunduuro wéli dè, faʔa faʔa wori dè !
Muɔ leguu wi 'ti mìɛni muʔɔrɔ muɔ saawalidɛngɛgɛ nī gè#74.3 Tiʔɛ gáà kiī nɛ nyu Gbùʔɔrɔsaʔa wuʔu nɛ̄ gè, gàa Babilɔni kapiɛngbuɔnnɔ pe 'cúʔɔ gè (wéli baa Kaj2 36.18,19; Dan 9.17). !
4Muɔ piɛnnɛ pe 'cuulo bɛ̀ jàri tíɛlɛ muɔ kpàlidiʔɛ sunʔɔmɔ nī bè,
á pe 'pe káfalilɛ cɔ́ri bèle nɛ̀ yérige baa.
5Pe yé puu pàli tíɛlɛ bàli pe 'kágbɛyɛ yɛ̀gɛ yè
nɛ kákpoli tiire kpúɔn dè nɛ cáanri dè.
6Kòyo nyáà pe 'tɛn nɛ̀ muɔ saʔa fèri gè,
a pe 'yi mìɛni kpúɔn nɛ̀ kabari nɛ́ kágbɛyɛ ní yè
nɛ́ timɔgbeliye ní yè.
7Pe 'kàsun le gè muɔ saawalidɛngɛgɛ nɛ̄ gè,
nɛ́ ki kpúɔn nɛ̀ cáan bè muɔ kòridiʔɛ núʔɔ gè.
8A pe 'ki juu pe funyɔ nī yè nɛ́ jo:
«Weli bé pe wuʔɔ bè pe máama pe mìɛni bèle.»
A pe 'Kulocɛliɛ kpàlidiɛyɛ yi mìɛni sórigo kùlo nī lè.
9Weli ní wè nɛ muɔ fìɛlɛʔ nyaʔa bèle cíginiʔ.
Kulocɛliɛ siɛnjuulo ní wè bileʔ.
Siɛn wè náʔa weli nīʔ ŋàa wi bé ki cɛ́n lɛ̀lɛ jori ki bé kúɔ wèʔ.
10Kulocɛliɛ yo, lɛ̀lɛ jori nī muɔ bé ki yaʔa muɔ parifɔlilɔ peri muɔ teri ?
Muɔ bé ní ki yaʔa lé muɔ leguulo peri pìye nyíɛnɛ muɔ míʔɛ nɛ̄ gè lé súuri ?
11Gáa nɛ̄ muɔ 'muɔ kàliige kɔli kùru gè ?
‑Muɔ kɔli sáʔa gè ! Ma pe cúʔɔ péwu !
12Nɛ̀ ki yaʔa, Kulocɛliɛ, muɔ ŋáà wī mi kùlofɔli wè nɛ̀ ki líɛ baa faʔa gè,
muɔ ma suɔlɔ kanʔa lè duniya nī wè.
13Muɔ ma 'kuʔɔjii ceri wè nɛ́ muɔ ŋɔri ní dè,
nɛ́ bògaara yacogo ki nyùyɔ muʔɔrɔ yè kuʔɔjii nī wè.
14ʔaan, muɔ ma 'Leviyatan fíɛrɛ yɛgɛ ki nyùyɔ muʔɔrɔ yè#74.14 Leviyatan yɛgɛ gè, ki 'puu bògaara yacogo kuʔɔjii nī wè, Kanaa siɛnnɛ pe sɛbɛlɛ nī bèle. Pe 'puu nɛ ki nyu kɛnmɛ bíì nɛ̄ kuʔɔjii ŋɔri ti bé gbɛ̀ jáa cúʔɔmɔ kpíʔile bè. Nyakungɛngɛ Liʔɛ Siɛnrɛ nī dè, ki 'puu nɛ nyu kɛnmɛ bíì nɛ̄ Yewe nyɛ́nì jáa nɛ̀ cúʔɔmɔ ŋɔri jáa dè, duniya faan lɛ̀lɛ nī lè nɛ́ míɛni lɛ̀gɛlɛ kálì nī, bɛ̀ Isirayɛliyé yirile tíɛlɛ lè Ezipiti kùlo nī lè. Wéli baa 104.26; Zɔbi 3.8; 7.12; Eza 27.1.,
nɛ́ ki kaara kɛn dè waama kùlo yawiire mɛ́ dè.
15Muɔ ma 'lawiʔile múgu gèle nɛ́ kápaliyɛ ní yè#74.15 Wéli baa Yir 17.6; Tɔ́r 20.11..
Muɔ ma 'cáaya waʔa yè nyàa nī luʔɔ yē súuri yè#74.15 Wéli baa Yir 14.29; Yes 2.10..
16Cɛngɛ kiī muɔ wuʔu, nɛ́ pìlige míɛni ní gè;
muɔ ma 'yege nɛ́ cɛngɛ tɛ́ngɛ gè baa ti tiɛyɛ nī yè.
17Muɔ ma 'dàala láʔala yérige lè;
muɔ ma 'ŋùʔɔ lɛ̀lɛ nɛ́ gbìnʔɛ lɛ̀lɛ kpíʔile lè.
18Sɔ̀ngi ma taa nɛ́ ki ní, Yewe: muɔ leguulo pe nyɛ́nì muɔ tiʔɛlɛ,
kùlo láà ledoyo yiī nɛ yìi nyíɛnɛ muɔ míʔɛ nɛ̄ gè.
19Fǎga muɔ gòtolo#74.19 gòtolo: Dɛ́nigɛ míʔɛ gī, gàa ki Isirayɛli kùlo kɛnmɛ tìí bè. ni sìi yaʔa wè nyàʔayɛrɛ mɛ́ dèʔ !
Fǎga fìʔɛ nɛ́ muɔ fuunmɔfɔlilɔ pe sìi ní wè lɛ̀lɛ láà nī bè nyaaʔ !
20Sɔ̀ngi ma taa nɛ́ muɔ nyakungɛngɛ siɛnrɛ ní dè#74.20 Wéli baa Yir 19.5-6; 23.27-31; 34.10-11; Lev 26.11-12,42,44-45; Fàn 28.1-14; Ŋún 105.8-11; 106.45; Eza 54.10; Zer 14.21; Ezek 16.60. !
Nɛ́ ki cɛ́n, kùlo ni yebilige tiɛyɛ yiī nyìye nɛ̀mɛfɔlilɔ nɛ̄ bèle.
21Fǎga ki yaʔa wuʔɔgɔfɔlilɔ bèle, fìɛrɛ‑ pe taaʔ !
Nɛ́ fuunmɔfɔlilɔ nɛ́ fɔ̀ngɔfɔlilɔ ní bèle,
ma ki yaʔa peri muɔ míʔɛ kpóri gè !
22Kulocɛliɛ yo, yɛ̀ fáari !
Ma muɔ wuʔu juu gè ma ki tìɛ tànʔa wè leguulo mɛ́ bèleʔ !
Sɔ̀ngi ma taa nɛ́ tiʔɛlilɛ ní lè nàa ledoyo nyáà yiī nɛ teri cɛngɛ ó cɛngɛ gè !
23Fǎga fìʔɛ nɛ́ muɔ leguulo pe siɛncuʔɔrɔ ní dèʔ,
kàgbaaligɛ gáà muɔ piɛnnɛ pe nyu nɛ yɛ̀gí muɔ kúrugu gè,
lɛ̀lɛ ó lɛ̀lɛ nī lèʔ !
Obecnie wybrane:
Ŋúnuyɔ 74: sev
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© (Active), Wycliffe Bible Translators, Inc. All rights reserved.