ตัวแทน 18
18
เปาโล เริล เมือง โคริน
1เจ็นนัน เปาโล ก็ เริล เจ็น เมือง เอเทน โตะ ตัก เมือง โคริน 2นำ เล็ห ตัก เมือง โคริน แลว นำ ก็ เม็จ ครำ ยิว มี ล็อง ซือ ตัก อาควีลา อาควีลา เน นำ เกิด ตัก จังวัด ปอนทัด นำ เคิบ ยัห ล็อน โตะ เจ็น ปะเทด อิดตาลี ยัห นำ ซือ ตัก ปีซีลา ปาม ปัด เจ็น เมือง โรม เป็น ตัก พะเจายูฮัว คาวดีอัด เคียน นังซือ ไล ครำ ยิว ปัด เจ็น เมือง โรม มด จู ล็อง ปาม ก็ ลด ปัด เริล เมือง โคริน เปาโล โตะ ตัก เมือง โคริน นัน นำ ก็ ลด แอว และ ปาม 3ทาเน เปาโล ก็ เป็น ซะลา จิง พาเต็น มอก ปาม นัน นำ ก็ ลด พัก แองกาน อุ เลิม เคิบ ปาม 4จู ลบ ตัก วัน เซา เปาโล ก็ เริล ตัก ฮ็อง พซุม ครำ ยิว นำ ก็ ไล เลือง เอาซาง อน อัห มด ตึง ครำ ยิว ตึง ครำ กรีก ระ อัห เจือ เอาซาง ฮัก
5ทาเน ซีลาด เคิบ ทิโมที ก็ เริล เจ็น จังวัด มาซีโดเนีย โตะ ตัก เมือง โคริน โตะ ปาม แลว เปาโล ก็ ลด พระ แอ็ม กาน ซอ มด นำ ไล แญง เอาซาง อน ตัก ครำ โคริน ติกๆ นำ ไล ครำ ยิว ติกๆ เค็ย เยซู เป็น เมซียา นัน 6แต ปึง ครำ ยิว อัห ก็ ตอตาน เปาโล ติกๆ อัห เซาะ อัห โป เปาโล เค็ย นำ ไอ มี เลาะ วัล เปาโล ก็ ลด ไล อัห คือเน “แป เปิล แป ก็ ฮับพิดซอบ ออ ฮัก ดาย เอิญ ไอ มี ฮับพิดซอบ แป วัล เตาะ เจ็นเน นโดน เอิญ ก็ เริล ไล ครำ กรอก ซอ ฮัก” นำ อัง นำ ก็ ลด นโจ็หๆ แอ็ม พุน เจ็น โกบ ออ ระ อัห เคาใจ เค็ย นำ ไอ มี ฮับพิดซอบ อัห วัล เตาะ 7เจ็นนัน เปาโล ก็ ทอก เริล เจ็น ฮ็อง พซุม ครำ ยิว นำ ลด โตะ ตัก เจิง ทีตัด ยูทัด เจิง นำ อุ ติๆ ตัก ฮ็อง พซุม นัน ทีตัด เน นำ เป็น ครำ ตี ทือ เอาซาง อุ แลว
8ทาเน คริดปัด ตัก เป็น ฮัวนา กำมะกาน ฮ็อง พซุม ครำ ยิว นัน นำ ก็ เจือ เยซู งกีจ็อง ครอบครัว นำ ก็ เจือ มด จู ล็อง เจ็นนัน ก็ มี ครำ โคริน ดก ล็อง ตัก ปัง แญง เปาโล นัน อัห ก็ เจือ อัห ลด แอง พิที จุบ นอก
9ทาเน ก็ มี มี แจ็ล นัน เปาโล ก็ มเพาะ เม็จ งกีจ็อง ไล ออ คือเน “อำ นเจิก เตาะ ดาย มัห ไล อัห ติกๆ อำ เค็ด อุ เตาะ 10ครำ คอง เอิญ ก็ มี ดก ล็อง ตัก เมือง เน ดาย เอิญ ก็ อุ เลิม เคิบ มัห ไอ มี ซีเอ แอง ซีวะ ซิห มัห ซัง” เอาซาง อัง 11ญาม เปาโล เม็จ แญง นัน แลว นำ ก็ ลด อุ ตัก เมือง นัน วัล นำ อุ มี วาง เคิบ ฮก ซัวะ นำ ก็ ไล แญง เอาซาง อน ตัก อัห ติกๆ
12ญาม เปาโล ควะ อุ ตัก เมือง โคริน ตัก จังวัด อาคายา นัน กาลีโอ ก็ เป็น พูวา ตัก จังวัด อาคายา นัน ญาม นัน ปึง ครำ ยิว ก็ รูบ โตะ เญ็บ เปาโล อัห ซับ นำ ตัก ซาน 13เล็ห ตัก ซาน แลว อัห ก็ พอง เปาโล คือเน “เอา ล็อง เน ดุ นำ ซุย พซาซน นำ ระ อัห ทือ เอาซาง แบบ พิด กดมาย แอ” อัห อัง 14เปาโล บัก และ จ็อก เคิบ อัห แต กาลีโอ ก็ จ็อก แอ็ม ออ วาล นำ ไล ครำ ยิว คือเน “แป ครำ ยิว เฮย กัน แป พอง นอย เลือง เล็ว นอย มเบิล นอย แอง ซะ พิด กดมาย กัห เอิญ ตัดซิน อน แป ก็ กุญ 15แต แป เน เทียง นอย เลือง แญง เน แญง นัน ซือ เน ซือ นัน ก็ เป็น เลือง กด คอง แป ฮัก เอิญ ไอ มี จบ ตัดซิน อน แป ดาย แป เริล ตัดซิน นอย ออ ฮัก ก็ กุญ” กาลีโอ อัง 16เจ็นนัน นำ ก็ ลด มบรึห อัห ปัด แอ็ม เจ็น ซาน นัน 17แลว กาลีโอ มบรึห อัห ปัด เจ็น ซาน นัน แลว อัห ก็ จบ เญ็บ โซเทเนด ตัก เป็น ฮัวนา กำมะกาน ฮ็อง พซุม ครำ ยิว นัน อัห ก็ จบ มบัด คัล นำ นดิ ปะตู ซาน นัน กาลีโอ ก็ เม็จ แต นำ ไอ มี ซนใจ อัห เตาะ
เปาโล โละ แอว ดก ตี
18ทาเน เปาโล ก็ อุ ตัก โคริน นัน ดก งิ วัล เจ็นนัน นำ ก็ พระ ควน พระ นไจ ตัก นัน ลด เริล ตัก เมือง เคนเคีย นำ อง เริล ซีเรีย ปา ปีซีลา เคิบ อาควีลา ก็ เริล เลิม ทาเน เปาโล ก็ ทัก ลน กึ ออ เป็น ตัก นำ กุญ บน ระ นัง ออ เคิบ เอาซาง แลว นำ ก็ ลด ทัก ลน กึ ออ ตัก เมือง เคนเคีย นัน ลด ต็อก เฮือ เริล ซีเรีย 19-21เจ็นนัน อัห ก็ โตะ ตัก เมือง เอเฟซัด เปาโล ก็ เริล ตัก ฮ็อง พซุม ครำ ยิว นำ ก็ ไล แญง เอาซาง อน ครำ ยิว ตัก นัน อัห ปัง นำ แลว อัห ก็ มพอล นำ อุ เคิบ ออ อิงๆ ตัก นัน แต นำ ไอ มี ญอม อุ นำ ต็อง เริล ออ วาล แต วาล ไอ ตัน นำ เริล ออ นัน นำ ก็ ไล อัห คือเน “กัน เอาซาง ระ เอิญ ลบ วัล โตะ และ แป เอิญ ก็ โตะ และ แป วัล ดาย” นำ อัง แต นำ ก็ ระ ปา ปีซีลา เคิบ อาควีลา อุ ตัก เอเฟซัด นัน เจ็นนัน นำ ก็ ทอก เจ็น เอเฟซัด นัน นำ ลด ต็อก เฮือ เริล เมือง ซีซารียา อุ ตี แลง 6:18
22ทาเน เปาโล เล็ห ตัก เมือง ซีซารียา แลว นำ ก็ ลด เริล เมือง เยรูซาเล็ม นำ เริล แอว คริซจัก ตัก เมือง เยรูซาเล็ม นัน แลว นำ แอว อัห แลว นำ ก็ เริล เมือง อันทิโอก งคม วัล 23นำ อุ ตัก เมือง อันทิโอก นัน ดก งิ เจ็นนัน นำ ก็ เริล แอว อัห ดก ตี ทัว จังวัด กาลาเทีย เคิบ จังวัด ฟรีเจีย นำ เริล พานเดย นำ ก็ จวย อน กำลัง ใจ ตัก ปึง ลูกนอง เยซู ระ อัห เฮง แก็นใจ เจือ ติกๆ
อาปอโล โตะ แอว เมือง เอเฟซัด
24ทาเน ตัก เมือง เอเฟซัด นัน ก็ มี ครำ ยิว มี ล็อง โตะ แอว ตัก นัน ซือ นำ ตัก อาปอโล นำ เป็น ครำ เมือง อเล็กซานเดีย นำ จ็อก เก็ง ซีเละ นำ กุญ นเจ็น นังซือ ดก นำ เคาใจ นังซือ เอาซาง เลาะ ซีเละ 25นำ ก็ กุญ นเจ็น เลือง งกีจ็อง ดก นำ ก็ ลด ซีรอก ไล อน ตัก อัห แตๆ เน ตี นำ ไล เลือง เยซู อน ตัก อัห นัน นำ ก็ ไล เลาะ ไล แคระ ซีเละ เลือง ยอน จุบ อัห ตัก นอก นัน นำ ก็ เม็จจึด เลาะ แลว แต เลือง จุบ นอก แบบ เยซู นัน นำ ไอ มี ตัน เม็จจึด เตาะ 26ทาเน นำ ก็ เริล ตัก ฮ็อง พซุม ครำ ยิว นำ ฮาน ไล อัห ซีเละ นำ ก็ วาง ไล อน ตัก อัห ติกๆ แต ญาม ปา ปีซีลา เคิบ อาควีลา ปัง นำ แลว ปาม ก็ มพอล นำ โตะ จ็อก เคิบ ออ ปาม ก็ ไท เลามุน เลือง เอาซาง อน ตัก นำ ระ นำ เฮง เคาใจ เลาะๆ แคระๆ กวา นัน วัล
27แทะ นัน วัล อาปอโล ก็ อง เริล ตัก จังวัด อาคายา พาโนน ปึง ควน นไจ ตัก เมือง เอเฟซัด นัน ก็ จวย อน กำลัง ใจ ตัก นำ อัห ก็ เคียน จดมาย อน ตัก ครำ ตี เจือ เยซู ตัก อาคายา พาโนน นัน ระ อัห ตอนฮับ นำ เลาะๆ ญาม อาปอโล โตะ ตัก อาคายา นัน แลว นำ ก็ เริล และ ครำ ตี เจือ เยซู ญอน เอาซาง แอง เลาะ ซิห อัห นัน นำ ก็ กุญ จวย ครำ เยซู ตัก อาคายา นัน ดก ซีเละ 28นำ จวย อัห เทียง ครำ ยิว ตัก มัด ครำ ดก นัน เน็ด ซีเละ นำ เอิด นังซือ เอาซาง ไล อน ตัก อัห ระ อัห เม็จจึด เค็ย เยซู กิว เป็น เมซียา นัน
Obecnie wybrane:
ตัวแทน 18: Prai
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Global Partners
