ɛMacu 27
27
Kɛ Phɛ ne ɛYɛso gha ɛLɔ ɛBilatus
(ɛMar 15.1; ɛLuk 23.1-2; ɛYoh 18.28-32)
1Ne sɛ ihwɛlɛ kɛ wuru, gbik nindiinday nibo na, nɛ ninu nikɔɔn ne igbagha na, ne soos nibhɛ rop ɛnu wu te phoo ɛYɛso yegha. 2Nibhɛ ne robhos ɛbhɛ, nibhɛ bo ɛbhɛ nibhɛ bhɛ nang ɛBilatus se ne ɛ kaa so ɛgɔm-na ne iRooma.
iKu ɛYahoda De
(ɛTom 1.18-19)
3Kɛ ne sɛ ɛYahuza gha, ne ɛ kɛ rɛp ɛYɛso yegha, kɛ yaang ɛli ne kɛ hyɛ ɛYɛso yegha ɛshara ne iku gha, ne ɛ san ɛbɔk daa ɛkɔn na ne ɛ kɛ mɔn no. Ne ɛ bo ijam kyɔsɔk nzuwubɔ icwat da ne kɛ ryɔng ne ɛzurufa wo gha ɛ kyii nindiinday nibo na nɛ gbik nɛ nindiinday ne igbagha na. 4Ɛ bo, “Nggɛ mɔn ɛfɔt ne nggɛ rɛp ɛnyi gha ne hame ɛ kɛ mɔn ɛkɔn na.”
Nibhɛ ne yaak ɛYahuza yegha, “iNɛn mos se? iGyɛ aa phok kɛ nɛ.” 5ɛYahuza gha ne hana nibhɛ ne ijam kyɔsɔk ge ne kɛ ryɔng ne ɛzurufa wo ne ivel ndɔ ne iDeng ngge, ɛ hyel ɛbhɛ yɛk ghe ne irwik.
6Nindiinday nibo na ne bo ijam kyɔsɔk ge nibhɛ ne yɔngɔ, “Sɔng iphɛ kɛ jam mɛ, bhɛ cwaak jam mɛ de wo ɛlɔ gha ne tumɛ ne ijam ne iDeng ngge nang, daa ɛli ne ihywɛ so ijam ne neyi.” 7Nibhɛ ne bol nibhɛ sime nɛ, nibhɛ ne bo ihywɛ nibhɛ say ne ihwap ɛlɔ ne lɔl iron, ne ya yaa rɛrɛs nɛ ninaa ne ikpoo nɛ. 8iPhɛ phɛ kɛ te maa tɔ yeres ihwap pɛdaa nggyɛ wo iTsang ne iHwap Neyi na. 9ɛLɛy kɛ ji shwaak ibol ɛnɛbi ɛRimiya de ne ɛ kaa boote ɛ yɔngɔ, “Nibhɛ kɛ bo ijam kyɔsɔk nzuwubɔ icwat da ne kɛ ryɔng ɛzurufa wo ihywɛ teye ijam be nɛ niSɛrɛla na ka ku hyɛ wu te tal daa ne ito ɛbhɛ de. 10Ne bo ijam i say ne ihwap ne lɔl iron ɛli ne ɛDaray ya kaa mɔng me wo.”
Kɛ phɛ ne ɛYɛso gha ɛlɔ ɛBilatus
(ɛMar 15.2-5; ɛLuk 23.3-5; ɛYoh 18.33-38)
11ɛYɛso gha ne kyinak ɛnu ɛyisɛ ɛBilatus, ɛBilatus sa ne phom ɛYɛso yegha, ɛ yɔngɔ, “iGyɛ so yɛ ɛGɔm ne niYahodawa ghaa?”
ɛYɛso gha ne yaak ɛbhɛ, “Ɛ kɛ mɔng.”
12Ɛli nɛ nindiinday nibo na nɛ ninu nikɔɔn ninyi na, kɛ ne ɛ bol ne ɛYɛso gha, sɔng ɛ kɛ ne yɔng ɛkɔn nang. 13ɛBilatus sa ne yaak ɛYɛso yegha, “Ɛ phok nikɔn na nɛ nibhɛ bol dak ne ito mo de?” 14Sɔng ɛYɛso gha ne kyii ɛbhɛ ne ibol de nang, ɛBilatus sa wum ɛnu izii.
Kɛ Hyɛ ɛYɛso yegha ɛShara ne iKu
(ɛMar 15.6-15; ɛLuk 23.13-25; ɛYoh 18.39–19.16)
15Kaa ne i sɛ nten ne idira ne Tes iDee de tsak ko kɛ tuu, ɛBilatus ne biri ninyi na ɛnyi ɛdaan ndɔ ninaa ne nyang nga, ɛhiha nɛ nibhɛ kɛ phom. 16Ɛdɛ ɛsang-phok ka kaa ne so ne nyang ngge ne bok ɛbhɛ ɛBarabas. 17Ne sɛ ninyi na kɛ tumɛ ɛn no, ɛBilatus sa ne yaak nibhɛ, “Ɛhay ne ɛ sim en te nzɛ biri nyini ɛbhɛ ndɔ ne inyang ngge? ɛBarabas sa? Hang ɛYɛso gha ne bok ɛbhɛ ɛKiriti gha?” 18ɛBilatus sa kaa ku i yɛɛ wu niYahodawa na kɛ nang ɛbhɛ ɛYɛso yegha daa ɛli nɛ nibhɛ kaa bok irway ne ɛYɛso gha.
19Kaa ne sɛ nten de ne ɛBilatus sa kɛ soos ɛlɔ ne soos ɛ bol ɛshara gha, ɛkuk ɛbhɛ ne tom ɛbhɛ nɛ ɛ yɔngɔ, “Sɔng ɛ mɔn ɛnyi yɛghaa nggyɛ wo ne ɛ kɛ sang mɔn ɛkɔn na ne ɛkɔn nang. Nibok kɛ tak me iyɔm gbom daa ɛbhɛ ne ɛtuk.”
20Nindiinday nibo na nɛ ninu nikɔɔn ne igbagha na ne bol ne idira ninyi de ne ɛnu ɛbel wu tɛ nibhɛ phom ɛBilatus segha te ɛ biri nibhɛ ɛBarabas se te ne ji phoo ɛYɛso yegha.
21ɛBilatus sa ne kyii ta phom ninyi na ɛ yaak nibhɛ, “ɛYaphɛɛ yɛ ndɔ ninyi ifaa yɛ na wo, ne ɛ sim ɛn te nzɛ tul nyini ɛbhɛ ndɔ ne nyang nggee?”
Nibhɛ ne yɔngɔ, “ɛBarabas.”
22ɛBilatus sa ne yaak nibhɛ, “Ne n ji mɔn ɛYɛso yegha ne i bok ɛbhɛ ɛKiriti gha ne kyee?”
Nibhɛ byinkit gbik nibhɛ yɔngɔ, “Te gangat ɛbhɛ!”
23ɛBilatus sa ne yaak nibhɛ, “ɛYakɔn ɛkpɛɛ ne ɛ kɛ mɔn ne?”
Nibhɛ ne tɔɔk izɔlɔs nibhɛ yɔngɔ, “Te gangat ɛbhɛ!”
24Ne sɛ ɛBilatus sa kɛ yaang ɛli ne aa sang yɛɛ ne mɔn ɛhak ɛkɔn na, ninyi na kɛ tum izok ne irywen, ɛBilatus sa ne bo inɛn ɛ kuus ne ibɔ ɛbhɛ ɛnu ɛyisɛ ne idira ninyi de, ɛ ji yɔngɔ, “Sɔng n bok iwɔ daa neyi ɛnyi yɛghaa wo nang, nyinɛn aa phok ɛn nɛ.”
25Ninyi na ne kyii nɛ gbik nibhɛ, nibhɛ ne yɔngɔ, “Te neyi ɛnyi yɛnaa wo roos njwi nɛ ninɔn mos!”
26ɛBilatus sa ne ji tul nibhɛ ɛBarabas segha ndɔ ne nyang ngge. Ne ji sɛ ɛ kɛ hal ɛYɛso yegha, ne ɛ ji nang nibhɛ ɛbhɛ, te nibhɛ bhɛ gangat ɛbhɛ.
Nisooja na kɛ Sɛ ɛYɛso
(ɛMar 15.16-20; ɛYoh 19.2-3)
27Nisooja ɛgɔm-na ne ji bo ɛYɛso yegha nibhɛ phɛ ne ɛbhɛ ndɔ ɛsaa ɛgɔm-na nibhɛ te ɛYɛso yegha gyɔɔ gbik. 28Nibhɛ ne tuul itsura ɛYɛso da, nibhɛ ne ji sɔɔl ɛbhɛ ɛgbaang ɛtura nigɔm ne ɛbhɛ so ɛ̀seng-ɛseng. 29Nibhɛ ne ji ban ɛkɔn ne ito ne itsutsɔ, nibhɛ sɔɔl ɛYɛso yegha, nibhɛ ne ji nang ɛbhɛ ɛntsɛng ɛ wum ne iwɔ ne irwye ɛbhɛ. Nibhɛ ji cwis ne irway nggburuk ɛnu ɛyisɛ ɛYɛso gha nibhɛ sɛ ɛbhɛ, nibhɛ bo, “Nggɛ kyili ɛgɔm niYahodawa!” 30Nibhɛ ta tuk ɛYɛso yegha ne ncwincway, nibhɛ ne say ɛntsɛng ngo ne iwɔ ɛYɛso wo, nibhɛ ne hal le ɛbhɛ ne ito. 31Kɛ ne sɛ nibhɛ kɛ taal ìsɛ ɛbhɛ da, nibhɛ ne tul ɛgbaang ne ɛtura wo nɛ nibhɛ kɛɛ sɔɔl ɛbhɛ wo, nibhɛ ne ji sɔɔl ɛbhɛ itsura ɛbhɛ, nibhɛ ne bo ɛbhɛ nibhɛ phɛɛs ne gangat.
Kɛ Gangat ɛYɛso yegha
32Ne sɛ nibhɛ so ne ihywel da, nibhɛ ne sɛme ne ɛdɛ ɛnyi gha ne bok ɛbhɛ ɛSimɔn ne ɛ kaa soye ɛnyi ne iSɛrene. Nibhɛ ne yɛk ɛbhɛ nɛ, ɛ tɔɔk itson ne gangat ɛYɛso yede. 33Nibhɛ ne bhɛ tuu ɛlɔ gha ne bok ɛbhɛ iGolgota de, kaabi i bo wu, “ɛLɔ iKpɔrɔk itso.” 34ɛNggyɛ wo nibhɛ ne nang ɛYɛso yegha inɛn ɛnap ne kɛ yɛk ne ɛdɛ ɛkɔn na ne ɛ so raghatak. Ne sɛ ɛYɛso gha kɛ phɔwɔ mpɛ, sɔng ne ɛ sɔ nang. 35ɛTsim mɛ nɛ nibhɛ kɛ gangat ɛYɛso yegha, nibhɛ ne sɔ ihywi daa ne itsura ɛbhɛ da nibhɛ ji hosop. 36Nibhɛ ne ji sooset nibhɛ hyep ɛYɛso yegha. 37Daa ɛco ne ito ɛYɛso de, nibhɛ kaa haa ne ɛkɔn na ne ɛ kɛ te kɛ gangat ɛYɛso yegha ɛlɛ: “ɛYɛso ghaa wo ne ɛ so ɛgɔm ne niYahodawa.” 38Nibhɛ kaa ne gangat ɛYɛso yegha nɛ nidɛng ninaa ɛyi ifaa, ɛdaan ne iwɔ ne irwye ɛdɛng ne so ne iwɔ ne itsan ɛbhɛ.
39Ninyi na nɛ nibhɛ kaa phebhe wo ne i tes itso rarak nibhɛ bol ivol ne bɛɛs daa ɛYɛso ghaa, 40nibhɛ bo, “iGyɛ wo ne ɛ bo wu yaa tobhos iDeng ngge ɛ kyii ta lɔl ndɔ ne nituk itwat ta, phɔt ito mo! Wu ɛ so yɛ ɛngɔn ɛTaanggbey ya ne ɛ tom daa ne ihon ne gangat to!”
41ɛLɛy nɛ nindiinday nibo na nɛ ninaa ne kpɛl ɛShara gha gbik nɛ ninu nikɔɔn ninyi na ne ma bol ivol ne bɛɛs da. 42“Nibhɛ bo ɛ kɛ phɔrɔt nidɛng, sɔng aa ne ji yɛɛ ne phɔt ito ɛbhɛ nang. Ɛbhɛ ma kyi so ɛgɔm niSɛrɛla naa? Te ne ɛ tɔm daa ne ihon ne gangat to njwi yaa ji nang ne itin nɛ ne ɛbhɛ! 43Ɛ kɛ nang ne itin nɛ ne ɛTaanggbey. Ɛ kɛ nang ne itin ne ɛTaanggbey. Te njwɛɛn yung yaang hang ɛTaanggbey ya yaa phɔt ɛbhɛ daa ɛli ne ɛɛ wu i soye ɛNgɔn ɛbhɛ gha yɔɔ.”
44ɛLɛy ne mang, ninaa ɛyi na ne kaa gangat nibhɛ ne ɛYɛso gha ne ma bol ivol ne bɛɛs da.
iKu ɛYɛso De
(ɛMar 15.33-41; ɛLuk 23.44-49; ɛYoh 19.28-30)
45Ne sɛ ɛceree ne igbey, ɛlɔ gha ne te gbyighilik gbik ne ɛ shɛɛ ɛlɛ wo ɛ hɔn ɛwa ɛtat. 46Ne ji sɛ igyɔs ɛtat, ɛYɛso gha ne boote ne ɛgbaang ne izɔlɔs, ɛ yɔngɔ, “Ɛlɔy, Ɛlɔy, lama sabatani?” Kaabi ɛ bo, “ɛTaanggbey nge, ɛTaanggbey nge, ikyee iphɛ kɛ te ɛ kɛ nang me ɛtsim maa?”
47Ne sɛ ninyi na nɛ nibhɛ kaa kyinasek ɛnggyɛ wo kɛ phok ɛlɛ wo, nibhɛ ne yɔngɔ, “Ɛ yeres ɛLiya ye.”
48Ɛdɛng ndɔ nibhɛ wo ne zugha ɛbhɛ bo ɛsooso, ɛ sɔɔl ndɔ ne inɛn ɛnap nzɔwɔkɔk kɛ, ɛ sɔɔl ne ɛntsɛng, ɛ nang ɛYɛso yegha wu te ɛ sɔ.
49ɛByin nɛ ne yɔngɔ, “Kyi shɛɛ yak, te njwɛɛn yaang, hang ɛLiya gha aa yɛɛs ɛ phɔt ɛbhɛ yɔɔ!”
50ɛYɛso gha ne ta boote ne ɛgbaang ne izɔlɔs so dɔng ji tek ifɔng ɛbhɛ ifɛ wuru.
51Nɛ nten nɛ, ɛlɛbhɛlɛ#27.51 ɛLɛbhɛlɛ ndɔ ne iDeng nga ne ɛ kɛ hobhose ɛLɔ gha kɛ Tul Kang ngo ne ɛHaa ne kɛ Tul Kang i Shɛs so. ndɔ ne iDeng nga ne le dak ɛ kpɛrɛt ɛceree ɛ hobhoset ɛphaa. ɛZay ya runket, ikpɛɛ da taghasat ifɛ kpɛl le. 52iKpuu da phaasel le, ivek ninyi na gbom nɛ nibhɛ kaa tul ɛn kang ngo, nɛ nibhɛ kɛ kus so ne yiisitsik. 53Nibhɛ ne wuusi ndɔ ne ikpuu da, ne ji sɛ ɛtsim mɛ ne ɛYɛso gha kɛ yilitsik ne ikpuu da, nibhɛ ne phɛ ne ɛgarang nga ne ɛTaanggbey ya kɛ tul kang ngo, nibhɛ bhɛ wuusi ninyi na gbom.
54Ne sɛ ɛndiinday nisooja na gbik nɛ nisooja na nɛ nibhɛ hyep ɛYɛso yegha kɛ yaang ɛli ne ivel lo kɛ runket to, nibhɛ ta yaang nikɔn na nɛ nibhɛ kɛ tes so, nibhɛ ne wum ɛnik, nibhɛ ne yɔngɔ, “iTin nɛ ne ɛnyi yɛghaa wo kaa soye ɛNgɔn ɛTaanggbey ya ɛtsak!”
55Nikuk gbom kaa so nggyɛ wo nibhɛ kɛ kyinasek kyakyak nibhɛ wɛɛ. Nibhɛ kaa le ne iGalili nibhɛ kungus ɛYɛso yegha, nibhɛ phyighis ɛbhɛ. 56Ndɔ nibhɛ wo, ɛMɛri ne iMagadala kaa sonɛ, ne ɛMɛri ne ɛ so ɛgyinɛ ne ɛYakub ye ne ɛYisifu, ne ɛgyinɛ ninɔn ɛZɛbɛdi gha.
iRɛɛ ɛYɛso Da
(ɛMar 15.42-47; ɛLuk 23.50-56; ɛYoh 19.38-42)
57Kaa ne sɛ ɛlɔ yɛ kɛ teye irwirywɛ, ɛdɛ ɛnyi ne iRamatiya gha ne i bok ɛbhɛ ɛYisifu ne yɛɛs. Ɛ kaa soye ɛhaa ne iryat, ne ɛ ma soye ɛdɛ ɛNgɔn ne icwam ɛYɛso gha. 58Ne ɛ phɛ ɛbhɛ sɛ ɛBilatus segha, ɛ phom ɛbhɛ wu, te ɛ nang nge ikom ɛYɛso de. ɛBilatus sa ne yɛk ngɛ, ɛ yɔng te nang ɛYisifu yegha ikom ɛYɛso de. 59ɛYisifu gha ne bo ikom ɛYɛso de, ɛ harap iphɛ ne ɛtura ɛphas ne ililing. 60Ɛbhɛ rɛɛ ɛbhɛ ndɔ ne ikpuu ifas ɛbhɛ ne ɛ kɛ ryɔng ne ɛphang te icwak; ɛ ji kungare ɛgbaang ne ikɛɛ wo, ɛ cwaal ne ɛnu ne ikpuu gha, ne ɛ ji hyel. 61ɛMɛri ne iMagadala gha, ne ɛhiha wo ɛMɛri gha kaa ne so ɛnggyɛ wo, nibhɛ kɛ sooset nibhɛ shɛɛ wɛɛ ikpuu da.
Ninaa ne Hyep iKpuu Da
62Ne cwiil ihwɛlɛ yɛ, ɛtuk kɛ kaa ne so ɛTuk iWɛsɛ, nindiinday nibo na nɛ niFarisawa na nibhɛ sɛ ɛBilatus segha, 63nibhɛ ne yɔngɔ, “ɛNdiinday, njwi kɛ kyii taate idɛ ibol de ne ɛnyi ne irywɛɛk kɛgha nggyɛ wo kaa boote, ɛli ne ɛ kɛ to ɛken na, ɛ bo, ‘ɛTuk ne itwat tɛ, nzɛ ne yilitsik.’ 64iPhɛ ɛlɛy, ne ɛ yɛk nɛ ninyi tɛ nibhɛ bhɛ hyep ikpuu da nituk itwat ta kyi phee nyɛɛn, daa ɛli nɛ ninɔn ne icwam ɛbhɛ na yaa yung bhɛ bo ikom mɛ ne ɛyi, nibhɛ ne ji yaak ninyi na, wu ɛ kɛ yilitsik ndɔ ne ikpuu da. iRywɛɛk ɛtsim ba sɛ ne kyi phyin ivaa ɛyisɛ ba.” 65ɛBilatus sa ne yaak nibhɛ, “Bo ɛn nɛ nisooja mon na tɛ nibhɛ hyep ikpuu da ɛli nɛ nibhɛ yaa yɛɛ hyep pɛ.” 66Nibhɛ ne phɛ nibhɛ bhɛ baa ikpuu da nibhɛ ne ji tek nisooja na ne ɛlɔ yɛ tɛ nibhɛ hyep ikpuu da.
Obecnie wybrane:
ɛMacu 27: etxNT
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
