Gyumagyihɛ 14
14
Paulo Mʋa Barnaba Bulu Asʋn Blɩ Ikonion Wulutɔ
1Ikonion wulutɔ ɛ a, alɩ kɛn Paulo mʋa Barnaba bɔyɔ Yudafɔ ofiakpa nɩ. Bɛblɩ Bulu asʋn ɩnʋ wanklaan. Mʋ́ sʋ Yudafɔ pʋ́ Grikifɔ tsɔtsɔɔtsɔ bɔhɔ Yesu gyi. 2Tamɛ Yudafɔ amʋʋ bʋmohogyi amʋ bɔtɔɩ wa ɔmátɔfɔ amʋ asʋtɔ, ha amʋ́ bɔkʋsʋ lɩɩ ahogyipʋ amʋsʋ. 3Ifu mɛkɩta Paulo mʋa Barnaba. Betsia ɩnʋ wa ɔpá, blɩ anɩ Wie Yesu asʋn amʋ wanklaan. Yesu ɛ lɛlɩɩ amʋ́ ɔma, sʋ bɔbwɛ ofula pʋ́ osuna pʋsuna ánɩ́ mʋ awɩtɔlɛ asʋn amʋʋ bʋdɛblɩ amʋ igyi ɔnɔkwalɩ. 4Mʋ́ sʋ wulu amʋtɔ ɩlɔbɔɩ anyɔ. Akʋ bobuo Yudafɔ amʋ, akʋ ɛ bobuo sumbi ayɔpʋ amʋ.
5Mʋ́ ɔma a, Yudafɔ, ɔmátɔfɔ pʋ́ amʋ́ ahandɛ bɔbwɛ agywɩɩn bɛɛ, bɔ́wa sumbi ayɔpʋ amʋ ɩwɩɔsɩntɔ, da amʋ́ abwi mɔ. 6Sumbi ayɔpʋ amʋ bonu asʋn anfɩ. Mʋ́ sʋ bɛsrɩ yɔ Likaonia awulu yile Listra mʋ́a Derbe pʋ́ awuluá ɩbʋ manta ɩnʋsʋ. 7Bɛda asʋn wanklaan amʋ ɔkan ɩnʋ ɛ.
Paulo Mʋa Barnaba Gyumagyihɛ Listra Mʋ́a Derbe
8Oyin ɔkʋ letsia Listra wulutɔ, bɔkwɩɩ mʋ ɩbɔ. Ɔmɔkʋkʋsʋ lɩɩ mʋ ayabisʋ kɩ. 9Ɩbɔ anfɩ tsie ɔdɛ Paulo asʋn blɩhɛ nu. Paulo lesi lɩɩ kɩ mʋ alɩɩ, olowun ánɩ́ alahogyiá Bulu ɔbɛ́talɩ tsa mʋ. 10Mʋ́ sʋ ɔlɔkplʋn kʋklʋkʋʋ blɩ ɔbɛɛ, “Kʋsʋ lɩɩ fʋ ayabi anyɔsʋ.” Ɩnʋ oyin amʋ lɔkʋsʋ ɔtsawʋlɛ pɛ, wa natɩ bɩ. 11Brɛá ɔdɔm amʋ bowun tɔá Paulo labwɛ a, bɔkplʋn blɩ Likaonia ɔblɩtɔ bɛɛ, “Ɩkpɩ amʋ badamli anyankpʋsa kplɩ ba anɩ wa.” 12Mʋ́ sʋ bɔpʋ amʋ́ ɔkpɩ kpɔnkpɔntɩ ɩda tɩ Barnaba bɛɛ, “Seus.” Bɔpʋ mʋ ɔtsɩamɩ ɩda tɩ Paulo bɛɛ, “Hermes,” tsufɛ Paulo lɩɩ amʋ́ ɔnɔ, ɔdɛtɔɩ nɩ. 13Ɔkpɩ Seus ɔtswɛkpa bʋ wulu ɔnɔ. Seus igyi ɔhapʋ lɔyɔpʋ nnantswie pʋ́ oyi ntswɩtswɩɩ ba wulu ɔnɔ ɩnʋ. Tsufɛ mʋa ɔdɔm amʋ bʋdekleá bɔ́tswɛ sumbi ayɔpʋ amʋ.
14Brɛá Barnaba mʋa Paulo bonu tɔá bɛba bɔbwɛ a, bɛkɩta amʋ́ atadɩɛ balɩ. Ilosuna ánɩ́ bʋmotsula dɩnka ɩtɔ amʋʋ bɛba bɔbwɛ amʋsʋ. Bɛsrɩ wie ɔdɔm amʋtɔ blɩ bɛɛ, 15“Ntogyi mlɩdɛ ɩnɩ bwɛ? Anɩ ɛ anyankpʋsa anɩgyi fɛ mlɩ. Bulu asʋn wanklaan aba bɛbla mlɩ, amlɩsi atɔkpan anfɩ ɔmagya bobuo anɩ Wie Bulu Ɔkɩankpapʋ. Mʋlɔbwɛ ɔsʋ mʋ́a asɩ, ɔpʋ pʋ́ mʋ́tɔ atɔ fɛ́ɛ́. 16Bɩmbɩ amʋ a, olesi ɔkpa ha ɔmágyiɔmá ánɩ́ bʋbwɛ tɔá bʋdekle. 17Tamɛ mʋ́ o a, ɔmɔkʋsi atɔ wanklaan tsɔtsɔɔtsɔ bwɛ, pʋsuna ánɩ́ mʋbʋ ɩnʋ. Mʋtɛha nyankpʋ totswie, mlɩ ndɔtɔ-atɔ tɔwa alɛ. Mʋtɛha mlɩ atogyihɛ, ɔtɛha ansɩ tegyi mlɩ.” 18Paulo aná asʋn blɩhɛ anfɩ fɛ́ɛ́ ɔma a, ɩlɔwa ɔnlɩn asa bɛtalɩ ka ɔdɔm amʋ itin bɛɛ, bʋmátɩn mbwɩ wʋlɩ amʋ́ ayabiasɩ tswɛ amʋ́.
19Mʋ́ ɔma a, Yudafɔ akʋ botsu Antiokia ánɩ́ ɩbʋ Pisidia ɔmátɔ pʋ́ Ikonion wulutɔ ba bɛblɩ asʋn pʋtsɛ ɔdɔm amʋ agywɩɩn, bɔkʋsʋ lɩɩ Paulosʋ. Bɛda Paulo abwi, bɩtɩa mʋ dalɩ wulu amʋtɔ. Bʋkɩ bɛɛ alawu, sʋ besi mʋ tswɩ. 20Tamɛ brɛá akasɩpʋ amʋ bɛba bobomli mʋ a, ɔlɔkʋsʋ yinki yɔ wulu amʋtɔ. Mʋ́ ɔyɩkɛhɛ a, mʋa Barnaba bɛnatɩ yɔ Derbe wulutɔ.
Antiokia Ánɩ́ Ɩbʋ Siria Ɔmátɔ Yinki Ba
21Paulo mʋa Barnaba bɛda asʋn wanklaan amʋ ɔkan Derbe. Aha tsɔtsɔɔtsɔ bɛdamli klʋntɔ mli Yesu akasɩpʋ. Mʋʋ bɛlayinki yɔ Listra, tsʋn yɔ Ikonion alɩɩ, bɛba bɛdalɩ Antiokia ánɩ́ ɩbʋ Pisidia ɔmátɔ. 22Ɩnʋ Paulo mʋa Barnaba bɔwa akasɩpʋ amʋ atɛtɔ-ɔnlɩn bɛɛ, bʋkɩta hogyi amʋtɔ. Bɛbla amʋ́ bɛɛ, “Ilehian ánɩ́ abɔ́tsʋn ipian tsɔtsɔɔtsɔtɔ asa abówie Bulu iwiegyi amʋtɔ.” 23Bɔtʋ ɔpasua kugyikʋ a, bʋtɛklɩ ɔnɔ bɔ mpaɩ, yaɩ ahandɛ ha amʋ́, pʋ amʋ́ wa anɩ Wie amʋʋ amʋ́ ansɩ dɩn mʋsʋ amʋ ɩbɩtɔ.
24Beki Pisidia ɔmátɔ ɔpasua amʋsʋ ta a, bɛba Pamfilia ɔmátɔ. 25Bɛda Bulu asʋn wanklaan amʋ ɔkan Perge wulutɔ. Bɔkʋsʋ tsu ɩnʋ yɔ Atalia wulutɔ. 26Paulo mʋa Barnaba bɛlatsia ntsusʋ-yibitɔ tsu ɩnʋ bowie Antiokia. Ɩnʋ gyi ɔtɩnɛá ahogyipʋ amʋ begyankpa klɩ ɔnɔ bɔ mpaɩ, ánɩ́ Bulu ɔwa awɩtɔlɛ ha amʋ́, mɛnɩ bɔ́yɔ agyʋma anfɩ bamɔ mʋ́ ɔnɔ anfɩ nɩ.
27Brɛá bowie Antiokia a, bɛtɩ ɔpasua amʋ fɛ́ɛ́ fia. Bɛbla amʋ́ alɩá Bulu lapʋ amʋ́ gyi gyʋma, pʋ́ alɩá Bulu laha aha ánɩ́ bʋmegyi Yudafɔ ɛ bahɔ mʋ gyi. 28Betsia akasɩpʋ amʋ wa nkɛ tsɔtsɔɔtsɔ.
Obecnie wybrane:
Gyumagyihɛ 14: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
