1 Korintofɔ 13
13
Ɔdwɛ
1Nɩ ntɛtalɩ blɩ anyankpʋsa pʋ́ Bulu-abɔpʋ ɔblɩ fɛ́ɛ́, tamɛ ntamadwɛ mɩ aba a, ngyi fɛ ɔkan ntɛ gbɛmgblɛɩn ánɩ́ bʋdɛ mʋ́ da, ɩdɛlɩn kʋklʋkʋʋ. 2Nɩ mbʋ Bulu ɔnɔ asʋnblɩ, Bulu asʋn ŋainhɛbɩ pʋ́ hogyi kpɔnkpɔntɩá ntɛtalɩ pʋpuli abʋ, tamɛ mma mɩ ba ɩwɩ ɔdwɛ a, mʋmʋ mma labi kʋkʋ. 3Nɩ nɔpʋ mɩ atɔ fɛ́ɛ́ kie ahianfɔ, nɔpʋ mɩ ɩwɩ ha mbɛɛ bʋwa mɩ ogya, tamɛ mma mɩ ba ɩwɩ ɔdwɛ a, mma labi ha ɔhaa.
4Aha ɔdwɛpʋ tenya ɩklʋn, ɔbʋ awɩtɔlɛ. Ɔma olu, ɔtamaka ɔnɔtɔ, ɔtamatsu ɩwɩ. 5Otobu atɔ, ɔma ɔnsɩpɛ. Ɔtamakɔsɩ nya ɔblɔ, ɔtamahɔ asʋn wa ɩwɩtɔ. 6Ɔtamatsula asʋkpan, ɔnɔkwalɩ otobuo. 7Otenya klʋn ha togyitɔ, ɔtɔhɔ asʋnsʋ gyi. Mʋ ansɩ tɛdɩnka asʋnsʋ, ototomi ɛ.
8Ɔdwɛ mʋ́ ɩtamata, tamɛ Bulu ɔnɔ asʋnblɩ bɔ́mɔ ɔnɔ. Ɔblɩ bamba blɩ bɛ́ka itin, asʋnbɩ ɛ ɩbɛ́ba bɔtsʋn. 9Tsufɛ anɩmɔkʋnya bɩ togyitɔ ta, anɩmɔkʋnya blɩ Bulu ɔnɔ asʋn ɛ yi. 10Tamɛ ɔŋɛtɔ atokiehɛ anfɩ fɛ́ɛ́ ɩmɔfʋn. Nɩ mʋ́á ɩlɔfʋn yi ɩba a, ɩnɩ fɛ́ɛ́ bɔ́fwɩ.
11Igyi fɛ ɩnɩ. Brɛá ngyi kebi a, nɔtɔɩ fɛ kebi. Mɩ atɔ bwɛhɛ pʋ́ mɩ asʋn susuhɛ fɛ́ɛ́ lɔbwɛ fɛ kebi. Tamɛ sei anfɩ nadan a, nasi nyebitɔ bwɛhɛ amʋ fɛ́ɛ́ bwɛ. 12Sei a, anɩdɛ atɔ kɩ fulaa fɛ ogyasitɔ anɩdɛ mʋ́ kɩ. Brɛ ɩkʋ bɛ́ba a, abówun mʋ́ wanklaan. Sei a, anɩ atɔbɩ mɔfʋn. Ɔma a, abɛ́ba bɛbɩ mʋ́ fɛ alɩá Bulu yin anɩ.
13Ɔnɔkwalɩ a, atoku asa anfɩ obétsia nɩ. Hogyi, ɔkpakɩ pʋ́ ɔdwɛ, tamɛ ɔdwɛ dʋn mʋ́ fɛ́ɛ́.
Obecnie wybrane:
1 Korintofɔ 13: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation