ມັດທາຍ 28
28
ເຢຊູ ແອ໋ງ ນັ່ງ ຕ້າຍ
(ເປີ໊ຍ ໝັ່ງ ມາໂຄ 16:1-10; ລູກາ 24:1-12; ໂຢຮັນ 20:1-10)
1ເຈ໋ຍ ລິ໌ວ ຕີ້ງ ກົງ ຮນອຍ, ເປັຍ ວົ້ວ ນອມ ເລີ໌ຍ-ປ໋າຍ ເຍີຍ ຕະຢ໊ຽດ ຮນອຍ, #28:1 ຕີ້ງ ກົງ ຮນອຍ ເຊ ເລີ໌ຍ-ປ໋າຍ ຫລົວະ. ນິ່ນ ບົວ ເຍີຍ ຕະຢ໊ຽດ ຮນອຍ ເຊ ຕ໋ອຍ ເລີ໌ຍ-ປ໋າຍ ຮນອຍ. ລູ່ງ ອ໊າ ລ່ຳ ເຕີ໋ຍ ອຈັງ, ມັກດາລາ ມູ້ງ ວົ້ວ ເຕົ້າ ມາລີຢາ, ແອ໋ງ ເຖສົາ ກັ້ນ ເຕົ້າ ມາລີຢາ ມີ່ງ ໝັ່ງ ໂຕສ໊ວ. 2ລ່ຽມ ເຕສີ້ຍ ເດົາ ຕົ໌ງ ເສີຍ ເຍີຍ. ມ່າຍ ເຕົ້າ ຕສ໊ຽວ ເຍີຍ ຟິນ-ມ່ຽນ ເອຈ່ຍ ຕ້າຍ ທຸຍ ອກອຍ ແບະ ໂຕສ໊ວ-ແກ້ງ ວົ້ວ ຄວ້າຍ ຫລະເປຢີ໊ຍ, ຕສ່ຽວ ເຕສວີ໌ຍ ຈ໊ຽນ ວົ້ວ ຄວ້າຍ ຫລະເປຢີ໊ຍ ກູ້ ຫງວ່າຍ. 3ປວັດ ນິ່ນ ເຍີຍ ຝັງ ເຕສີ໊ຍ ຮນັ້ງ ບະຫລີ່ງ ນໍ ອຈັງ. ລຸຍ-ໂຫວ ບົ໊ບ ແປະ ເຍີຍ, ຮນັ້ງ ຊອງ ນໍ. 4ຕສົ໊ວ ໂຕສ໊ວ ເຍີຍ ແປງ ເກ້ງ! ກ້ຳ ເດສ໋ຍ ໄຫ່, ຊິນ ຕສິ໋ນ ເດສ່ງ ຕສ່ຽວ ຄີງ ວົ້ວ ເດົາ ມີ່ງ, ຮນັ້ງ ໄຕ່ ໝີ່ ອ໊ະ ນໍ.
5ຟິນ-ມ່ຽນ ກ໊ອງ ບົ໋ວ ວົ້ວ ເຕີ໋ຍ ມເຊັຍ ຕອນ, “ໄມ້ ຕູ໋ງ ກ້ຳ ເດສ໋ຍ ໂອ່. ເຢຍ ຮິ້ວ ຕຸ໊ ເມີ່ຍ ບົວ ລໍ໌ ຕົ້ງ ຕສຸ ຕີງ ຕສຽບ ດສັ່ງ ຈ໋າ ໄຕ່ ວົ້ວ ເຕົ້າ ເຢຊູ. 6ມປ່າ ນິ່ນ ໄມ້ ຢຽມ ນ້າຍ. ນິ່ນ ເອີຍ ນິ່ນ ກັ້ນ ກ໊ອງ ເຍີຍ ຫວ່າ ນັ່ງ ຕ້າຍ ອ໊ະ. ຕ້າຍ ໝັ່ງ ມ່ຽນ ອັນ ນິ່ນ ວົ້ວ ນອມ ຕ໋ອງ ມ່າະ! 7ໝັ່ງ ລິ໌ວ, ກ໊ານ ມີ່ງ ບົ໋ວ ນິ່ນ ເຍີຍ ໄຊ-ກໍ໋, ‘ນິ່ນ ນັ່ງ ຕ້າຍ ອ໊ະ. ນິ່ນ ມີ່ງ ກາລິລີ ດ່າງ ເມີ່ຍ ບົວ. ມີ່ງ ເຖົາ ວົ້ວ ເມີ່ຍ ບົວ ຕສ່ຽວ ຕຸ໊ ປວັດ ນິ່ນ ອ໊ະ.’ ຈັ໋ງ ຈ໊ຽນ ເຢຍ ບົ໋ວ ລິ໌ວ ເມີ່ຍ ບົວ ນ້າຍ ເຕີ໋ຍ ຫວ່າ ໂອ່.”
8ວົ້ວ ເຕີ໋ຍ ມເຊັຍ ຕອນ ຢຽມ ວົ້ວ ໂຕສ໊ວ ຕສ່ຽວ ຮວາງໆ ຕສາງໆ ເຍີຍ ຖິວ ມີ່ງ ບົ໋ວ ໄຊ-ກໍ໋. ນິ່ນ ບົວ ໄຮ໌ ກ້ຳ ເດສ໋ຍ ເຍີຍ ໂຢ່ວ ໄຮ໌ ອຈຽນ-ໂຢ້ວ ໄຫ່.
9ຖິວ ຈ໊ຽນ ມີ່ງ ເກົາ, ເຢຊູ ລ່ຽມ ເຕສີ້ຍ ຕ້າຍ ປວັ້ງ ນິ່ນ ບົວ ຢ່າ ກ໊ອງ, “ແປ້ງ ອອນ ເຍີຍ ຊ່າະ?” ວົ້ວ ເຕີ໋ຍ ມເຊັຍ ຕອນ ຕສ່ຽວ ມີ່ງ ນັ້ນ ຈ໊ຽນ ເຢຊູ ເຍີຍ ເຕສົ໋າ #28:9 ວົ້ວ ຈ໋າ ລູ່ງ ເດ໊ຍ ຢຽມ ອິສະລາເອນ ເຕີ່ຍ-ປູງ ມ່ຽນ ນັ້ນ ເຕສົ໋າ-ເໝວີ່ຍ ເຫວີ່ຍ ທ່າຍ ມ່ຽນ. ຢ່າ ປ໋າຍ ນິ່ນ. 10ເຢຊູ ບົ໋ວ ນິ່ນ ບົວ, “ເມີ່ຍ ບົວ ໄມ້ ຕູ໋ງ ກ້ຳ ເດສ໋ຍ. ມີ່ງ ບົ໋ວ ເຢຍ ເຍີຍ ກໍ໋-ໂຢ໌ວ ມີ່ງ ກາລິລີ ແຊ້ງ ໂອ່. ຢຽມ ວົ້ວ ນິ່ນ ບົວ ຕສ່ຽວ ຕຸ໊ ປວັດ ເຢຍ.”
ແປງ ກ໊ອງ ໂຕສ໊ວ ເຍີຍ ເຈົ໊າ-ໂຫລ່ວ
11ວົ້ວ ເຕີ໋ຍ ມເຊັຍ ຕອນ ກັນ ຈ໊ຽນ ເຈົ໊າ ມີ່ງ ວົ້ວ ຕສັ່ນ, ມ່າຍ ເຕີ໋ຍ ຕສົ໊ວ ໂຕສ໊ວ ເຍີຍ ແປງ ແອ໋ງ ດສ໋ວນ ວົ້ວ ຕສີ້ງ ບົ໋ວ ໄຊ ມ່ຽນ ເປຢີ໊ຍ ນິ່ນ ບົວ ປວັດ ທສວດ ຕ້າຍ ເຍີຍ ຫຍູ່ງໆ ສີ່. 12ໄຊ ມ່ຽນ ເປຢີ໊ຍ ເຖສົາ ມ່ຽນ ໂກ໋ ກັ໊ບ ຕສຸ໊ນ ທສ່າງ ລ່າງ. ທສ່າງ ລ່າງ ລິ໌ວ, ຕສ່ຽວ ເຕສ໊າະ ຍ່ານ ທສ້ຳ ເຍີຍ ດສຸ໌ຍ ປຸນ ແປງ 13ຢ່າ ກ໊ອງ, “ເມີ່ຍ ບົວ ອ໋ອຍ ຕສຸ ກ໊ອງ, ‘ລູ່ງ ມ໌ວນ ຕສັ່ນ ເມີ່ຍ ບົວ ມອຈ້ອມ ມີ່ງ, ນິ່ນ ເຍີຍ ໄຊ-ກໍ໋ ຕ້າຍ ໜິ່ມ ເຢຊູ ເຍີຍ ເຊີຍ ໝີ່ ອ໊ະ.’ 14ເຊ ກ໊ອງ ນ້າຍ ເຕີ໋ຍ ສີ່ ຊີງ ເຖົາ ປີລາດ ຕສູ໋ງ ເຍີຍ ມນ່ອມ ເຢຍ ບົວ ຕສ່ຽວ ເຖງ ເມີ່ຍ ບົວ ໄຈ໊. ເມີ່ຍ ບົວ ກຸ໊ນ ປູ໋ງ ໂຮຍ້ວ.”
15ແປງ ຕສິ໊ບ ວົ້ວ ເຕີ໋ຍ ຍ່ານ ຢ່າ ເອີຍ ຈ໊ຽນ ໄຊ ມ່ຽນ ເປຢີ໊ຍ ເຖສົາ ມ່ຽນ ໂກ໋ ເຍີຍ ຫວ່າ ໂຕສ໋ວ. ນ້າຍ ເຕີ໋ຍ ເຈົ໊າ-ໂຫລ່ວ ເຖົາ ອີ້ ຕສັ່ນ ຢິວໄທ ມ່ຽນ ຖສໍ່ ກ໊ອງ ຈ໊ຽນ ຢຽມ ເຍີຍ.
ເຢຊູ ພ້າຍ ກົງ ປຸນ ໄຊ-ກໍ໋
(ເປີ໊ຍ ໝັ່ງ ມາໂຄ 16:14-18; ລູກາ 24:36-49; ໂຢຮັນ 20:19-23; ກົງ-ໂຕສ້ 1:6-8)
16ວົ້ວ ເຕີ໋ຍ ຕສຽບ ຢ໊ຽດ ເຕົ້າ ໄຊ-ກໍ໋ ມີ່ງ ກາລິລີ ແຊ້ງ, ເຖົາ ເຢຊູ ເຫ່ວ ນິ່ນ ບົວ ມີ່ງ ວົ້ວ ນອມ ບົງ. #ມັດທາຍ 26:32; ມາໂຄ 14:28 17ຢ໊ຽດ ປວັດ ເຢຊູ ນິ່ນ ບົວ ຕສ່ຽວ ເກວີ່ຍ ເອຈ່ຍ ປ໋າຍ ນິ່ນ. ມປ່າ ມ່າຍ ເຕີ໋ຍ ຖສໍ່ ໂຮຍ້ວ ໄມ້ ຕີ່ງ. 18ເຢຊູ ຕ້າຍ ຟັດ ເຕີ໋ຍ ບົ໋ວ ນິ່ນ ບົວ, “ຢຽມ ລູ່ງ ຢຽມ ເດົາ ເຍີຍ ຢຽດ ຕສູ໊ງ ຫັດ ມ໌າ ທິນ-ຮູ່ງ ຈິວ ປຸນ ເຢຍ ໝີ່ ອ໊ະ. 19ເຫວີ່ຍ ນ້າຍ, ເມີ່ຍ ບົວ ອ໋ອຍ ຕສຸ ມີ່ງ ອຈ໋າວ ໝ່ານ ຝີງ ມ່ຽນ ໂຕສ໋ວ ເຢຍ ເຍີຍ ໄຊ-ກໍ໋. #ມາໂຄ 16:15-16; ລູກາ 24:47-48; ໂຢຮັນ 20:21; ກົງ-ໂຕສ້ 1:8 ອ໋ອຍ ຕສຸ ເຕ໊ງ ເຕຍ, ຕອນ ເຖສົາ ສີງ ລີ່ງ ເຍີຍ ບົ໋ວ ເຖງ ນິ່ນ ບົວ ເຈ໋ຍ ວວມ ເຍີຍ ເລີ໌ຍ, 20ຢ່າ ອຈ໋າວ ນິ່ນ ບົວ ເອີຍ ເດສ່ງ ເຢຍ ບົ໋ວ ເມີ່ຍ ບົວ ໂຕສ໋ວ ເຍີຍ ຫຍູ່ງໆ. ຈັ໋ງ ຈ໊ຽນ ໂອ່. ເຢຍ ຢຽດ ລິ໌ວ ເຖສົາ ເມີ່ຍ ບົວ ຢຽມ ເຖົາ ປ້າມ ເກນ ເຍີຍ ເຊດ ເມວີ໌ຍ.”
Obecnie wybrane:
ມັດທາຍ 28: IuMiLAO
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Mien Bible (Lao Script) © 2007 Thailand Bible Society, 2007.
