Esekiel 43
43
Unwoti Bukeye Búnwini Búbo Kakpakɔ Kammɔ Lɛlɔ
1Ɔnana ɔmmɔ útiku-mi na bɔ́sɔ búnwini búsie kakpakɔ kammɔ ɔƒɛ katukɔ kakɛ. 2Mmɔ na lɛ́nu Israel Unwoti Katɔti bukeye ka bɔ́si ɔƒɛ katukɔ bɔdubo. Na línu kɔku kɔdi aani kalɛ na ɛpu ɔɔbla kɔku bonwu, na Unwoti bukeye bɔmɛni bɔ́ya na lɛla biala nkya amadɔ liikeye taatu anumi. 3Kɔyu kemmo ala bɔnu bɔmɛni búlieku bɔni na lɛ́nu uwi ɔni na Katɔti úbo úbakyula Yerusalem na ɔyila-nwu udu ku uwi ɔni na lɛ́nu na Keba Ketu kudɔ. 4Katɔti bukeye bɔmɛni bɔ́sia kakpakɔ ɔban kayakun na ɔƒɛ katukɔ mmɔ na búbeduo kakpakɔ kammɔ kemmo. 5Katɔti Kɔyu kɔ́ya na lɛ́ta línye mina lɛgba lɛlɔ na kútiku-mi kúsienku kakpakɔ kaduli geen kani nkya kemmo ƒui na mmɔ, na lɛ́nu ka Unwoti bukeye bɔ́ƒɔ kakpakɔ kemmo mmɔ ƒui.
6Ɔnana ɔmmɔ unye-mi ɔƒɛnyi na línu ka Unwoti ɔ́tɛmi ɔ́siku kakpakɔ kammɔ kemmo ɔnini, 7“Esekiel, ɔyawine ubi, kakpakɔ kamɛni ndi mina lɛgaboku lɛni lɛlɔ na nli na kalɔ lɛlɔ mɛni. Na mɛni na ndubo bulie na mina kadi bekyuli Israelƒuɔ akɔ úti úsela uwi ƒui. Na ama ku bana baga basɔ balakya-mi kɔƒa na basɔ batátaakpa baƒiɔ badi. 8Israel baga bátu bana lɛtɔ na lide mina kakpakɔ suɛlɛ suɛlɛ ɔni na kowodu kani nkya ntɛ. Nsu baga bamɛni bákya-ma kɔƒa na bana likyulikpi ala bɔbla ɔsu. Anwuɔsu na líti kɔnyi lɛ́kya-ma geen na lɛ́yila-ma udu. 9Nsu si bekyuli bamɛni báda baƒiɔ bɔkpa báya na bábwɛ ala ani na bávɔ na bánwi bése baanu mmɔ ni, ndubulieku-ma uwi ƒui. 10Ɔlɛka kɔƒa kukpo Israelƒuɔ na bebo abi na bana ekpidi ani na bábla ɔsu. Anwuɔsu tɛmiku-ma siku mina kakpakɔ lɛlɔ. 11Na si bana ekpidi éduo-ma sɔsɔ ni, na asɔku lɛla biala na ánu na kakpakɔ kammɔ lɛlɔ ku lɛban lɛmmɔ ku kalɛ na bákɔku lɛla biala ku kalɛ na bényene lɛtɔ lɛmmɔ. Na edie ɔda bubo bɔni ndanku kalɛ na ɔlɛka bakpa na mmɔ na enweni lɛla biala ese kalɛ na batɛya kaduɛ na badi ala ammɔ ƒui lɛlɔ.
12“Na mina kakpakɔ kaduli geen kani na kɔbi lɛlɔ mmɔ ni, ɔlɛka bada mmɔ edu aani lɛla lɛni na bédie bése sɛsɛɛ béte-mi! Ɔmɛni ndi ɔda bubo bɔni náƒɛ kuye butulo ƒui ɔ́siku mina kakpakɔ lɛlɔ.
Kalɛ Na Unwoti Lɛkpabi Lise
13“Aani kalɛ na Unwoti ɔlati ɔ́lɛ ugyii úse ni, lɛkpabi lɛni nnye kakpakɔ kemmo ni, ubo bɔkɔku bɔdi. Na lɛkpabi lɛmmɔ kalɔ kakɛ ni, bédie ɔvile ɔdi báka bámana-nwu na nwuna bɔbɛbɛ bɔdi akɔkɔ ene bɔbɛbɛ ku bɔgyu lɛnɔ akɔkɔ ene. Na ɔvile ɔmmɔ kɔtu kɔtu na keyi kakɛ ni, béti atabi kɔlɛkɛ akɔkɔ anyɔ bɔbɛbɛ bálɛ bamana. 14-17Lɛkpabi lɛmmɔ lɛlɛ ɔka ɔdi lɛlɔ na ubo bule akpa atɛ. Na ɔdi biala lɛƒɛnyi ine bɔmmɔ bɔkɔku búlieku lɛlɔ. Bule budeedi bɔkɔku ndi lɛgba aavlanyɔ-maatɛ bune ku bɔbɛbɛ ƒui lɛni kani na nwuna bɔkuku bɔdi lɛgba ɛtɛ. Na ntɛntɛ ubo lɛgba aavlanyɔ-ine bune ku bɔbɛbɛ ƒui lɛni kani na bɔkuku bɔdi lɛgba maatɛ. Na atabi kɔlɛkɛ akɔkɔ anyɔ bɔbɛbɛ bɔ́ka bɔ́mana-nwu kalɔ na atu atu. Na bule bɔtɛdi bɔkɔku bɔdi lɛgba aavlanyɔ bune ku bɔbɛbɛ ƒui lɛni kani na bɔkuku bɔdi lɛgba maatɛ na nwuna katɔ na baakyula akpala. Na nwuna ekpo ene ammɔ ni, ala adi alɛ aani akɔ ese. Ɔƒɛni ubili kakɔkɔ kani na básia bétédu lɛkpabi lɛmmɔ kudɔ ɔkya ɔƒɛ katukɔ kakɛ.”
Bédie Lɛkpabi Lɛmmɔ Sɛsɛɛ Básɔku Bákya Katɔti Lɛkɔkɔ
18Unwoti Katɔti ɔnini,
“Esekiel, ɔyawine ubi, si uwi ɔni na bátu lɛkpabi lɛmmɔ báwɔlɔ ni, ɔlɛka bakyula akpala nwuna lɛlɔ na bewi-ni ubugya na bedie-ni sɛsɛɛ basɔku bakya-mi lɛkɔkɔ. Na ndubɔtina-a ulu ɔni lɛlɔ na adubo ala ammɔ bɔbla. 19Ɔnana ɔni baalɔ Sadok bebi ku bawɔ bani nási Lewi kɔdua kemmo ni, ama kani na ɔlɛka babla kabla na mina kakpakɔ aani kalɛ na mina ɔda bubo bɔɔtina. Anwuɔsu ti ɔmantɛ akɔ ɔkɔdi te-ma na badu bakyula babla alaekpidi lili buvele akpala. 20Na eti ubugya ɔmmɔ ɔdi ákwaa lɛkpabi lɛmmɔ ekpo ene ammɔ. Na aya na ubugya ɔmmɔ ɔdi ususu lɛkpabi lɛmmɔ bule bɔni ntɛntɛ mmɔ ekpo ammɔ. Na ɔdi lɛnɔ ususu atabi kɔlɛkɛ kɔni na bátu bámana mmɔ. Ɔmmɔ ndubɔya na lɛkpabi lɛmmɔ lɛbla sɛɛn kalɛ na bataabla akpala nwuna lɛlɔ teete-mi. 21Ɔmmɔ kama na beti ebuo ɔmmɔ balɛku kakpakɔ kaduli geen mmɔ na batákyula-nwu na kesii kani na báƒuna bése.
22“Kadi kegye ni, na beti ketukpa kani na kátasɔ kesii kadi na ɔ́manku batádu babla ekpidi lili buvele akpala. Na beti nwuna ubugya bakwaa lɛkpabi lɛmmɔ babla-ni sɛɛn aani kalɛ na bábla akɔ ɔkɔdi ɔmmɔ ɔdi. 23Ɔmmɔ kama na báƒuna akɔ ɔkɔdi ku koƒonu kɔgyani kɔkɔdi bani na bátasɔ kesi kesii 24na biti-ma biboku mina kakpakɔ. Ɔkpane ɔdubuti mma ɔkuna uwi-ma lɛlɔ na beti-ma babla kɔnu bɔsia akpala bete-mi na ɔyɔ-mi kaƒɔ.
25“Emeyi maatɛ ani nsia kadi biala megye ni, ɔlɛka bɛdu ese ku akɔ ku koƒonu bete-mi aani alaekpidi lili buvele akpala. Na ɔlɛka bɛnu ka bátasɔ kesii kadi. 26Emeyi ammɔ kemmo ni, ɔkpane ɔdubo lɛkpabi lɛmmɔ bɔbla sɛɛn kalɛ na ɔmanku ute ka bakpa na nwuna lɛlɔ bete-mi. 27Na ɔ́si ɔmmɔ kama ni, ɔkpane ɔdubo akpala butaabla na lɛkpabi lɛmɛni lɛlɔ na ɔyɔ-ni kaƒɔ na uvele kusɛ kusɛ ɔsiku-mi kudɔ ɔni ndi unwi bɔbla akpala. Ami Unwoti násu.”
Obecnie wybrane:
Esekiel 43: lef
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
