Daniel 8
8
Daniel Ɔ́nu Koƒonu Kɔgyani Ku Ketukpa Kadi
1Uwi ɔni na Ɔga Belsasar ɔɔdi lɛga na Babilon kalɔ lɛlɔ lɛkwa lɛtɛdi kemmo ni, 2na ami Daniel nkya Babilon kalɛkɛ kani baalɔ Elam kemmo na bana ɔma unengudi ɔni baalɔ banii Susa kemmo. Na mmɔ kede Ulai Ketu. 3Mmɔ ka lɛ́talaku anumi lɛ́nu katɔ kakɛ ni, lɛ́nu koƒonu kɔgyani ka kunye na kubo ese gyɔlɔɔ gyɔlɔɔ anyɔ, nsu linwi líne lítulo linwi. 4Koƒonu kɔmɛni kɔ́sɔku usi kɔ́kya, na kusie ɔƒɛ kanukɔ, na kusie kada kakɛ, na kusie katɔ kakɛ lɛnɔ. Na ebuo ɔyikune bamba ɔdi uuubo na unye ɔsiaku-nwu. Na lɛla lɛdi lɛnɔ liiibo na ɔƒɔ ute bebuo bamɛni. Anwuɔsu kútuku lɛlɔ laa kalɛ na kɔɔyɔ́ na ɔyikun kani na kɔ́sɔ kɔ́kɛ kúbu.
5Lɛ́sɔ nnye mɔɔnu útédu uwi ɔni na lɛ́nu ka ketukpa kadi lɛnɔ kétuku lɛlɔ ɔ́si ɔƒɛ kanukɔ na kásia kalɔ kammɔ lɛlɔ ƒui kábavi na kana lɛgba muedi liletuku kalɔ. Na kebo lise lɛni mbo ogya geen na kana anumi ntɛ. 6Na lɛ́nu ka ketukpa kamɛni kétuku lɛlɔ késela koƒonu kɔni na lɛ́nu na ketu kɔtu mmɔ kudɔ ku kɔnyi kpakplaa geen. 7Ketukpa kammɔ kakɛ-nwu ku kɔnyi geen na ɔni na kátu kásiaku koƒonu kɔmmɔ ni, káƒɛ koƒonu kɔmmɔ ese anyɔ ammɔ ƒui, na koƒonu kɔmmɔ ɔyikun ɔ́yuɛ na kɔsɔ kulakana lɛla lɛla bɔbla. Ketukpa kammɔ kátu-nwu lɛgba késusu-nwu kaduɛ na lɛla lɛdi lɛnɔ liiibo na ɔƒɔ ute koƒonu kɔmmɔ. 8Ɔmmɔ kama ni, Ketukpa kammɔ kásɔ kákɛ ɔyikun kébu. Nsu uwi ɔni na kɔnyi kɔmmɔ kɔ́kɔ-nwu katɔ geen ni, Ketukpa kammɔ lise lɛni mbo ogya mmɔ lɛ́ƒɛ na ene bamba ákwɛ na lideedi lɛmmɔ kenye, na ɔdi biala ɔɔtina unwi na lɛƒɛnyi ine bɔmmɔ kemmo.
9Amu na lise linwi lɛlɔ ni, lise blii lɛdi lɛ́sɔ lɛ́kwɛ na nwuna ɔyikun ɔ́di kayawi kammɔ kada kakɛ ku ɔƒɛ kanukɔ ku Israel kalɔ kedee kammɔ muedi lɛlɔ. 10Na ɔ́kɛ ɔyikun geen ɔni na úkpoku ayabi ani ndi kayaa bekpone ƒui lɛnɔ, na úti-ma pii úbewi kalɔ lɛlɔ, na ɔ́kɔ ɔ́nya-ma lɛlɔ úsusu ɔ́vi. 11-12Úwi kayaa bekpone bammɔ anumi kalɔ, na údie ɔbu ƒui na bana ɔtɔnkune ɔgabi ɔmmɔ lɛlɔ, na úwi-nwu anumi kalɔ na uwi ɔni na útile-nwu kuƒi na nwuna limeyi ndi limeyi akpala bɔbla lɛlɔ. Na geen ni, lɛla lɛmɛni kanukɔ kátadia bɔnu munu munu. Na úbile kakpakɔ kammɔ ekisila ƒui, na kásɔ kátamanku ka bataabla lɛkpa geen lɛmmɔ, na ɔ́kɛ kuƒi na ɔ́bla lɛla biala na ɔɔyɔ́ na mmɔ.
13Amu na Katɔti batu kedee bammɔ akɔ unwi úye nwuna ɔkpana ɔnini, “Limeyi lɛmani na kuƒi kɔdubɔsɔ kɔtɛ na bataabla limeyi ndi limeyi akpala ammɔ? Na kalɛ na kebweyi kamɛni káta kénye ayabi amɛni lɛlɔ kpakplaa na ɔɔda liƒu mɛni ni, uwi ɔmani na kadubɔda-ma lɛlɔ bɔkɔ taanya teesusu-ma lɛgba taakya lɛti akɔ bɔya?”
14Mmɔ na ɔtu unyɔdi ɔmmɔ údie kenye ɔnini, “Ɔdubɔbla useyi uwi ku kadi bugye emeyi mpim inyɔ ku emeyi eti aku, asa na badubɔbla kakpakɔ kammɔ kedee bɔsɔku bute Katɔti, asa na ɔdia na basɔ bataabla lɛla lɛdi na nwuna kemmo.”
Gabriel Údie Kɔyu Kemmo Ala Bɔnu Bɔmmɔ Kalɔ
15Ami Daniel nnye muukpóku lɛlɔ ka linu ala bɔnu bɔmmɔ kalɔ asa na ukyuli ɔdi ɔ́da ɔ́lɛ-mi kamadɔ mmɔ. 16Na lɛdi lɛdi lɛ́si Ulai Ketu kɔtu mmɔ aani ukyuli lɛdi na lɛ́su lɛnini, “Gabriel, bunku-nwu na edie ala bɔnu bɔmmɔ kalɔ atina-nwu.”
17Amu na Gabriel ɔ́ni úde-mi na lɛ́yu líbi kalɔ ku bɔyia geen. Na ɔ́su-mi ɔnini, “Ukyuli ɔyawine adi, nsu ɔdi ka enu ala bɔnu bɔmɛni kalɔ ka adanku kayawi kawɔlɔkɔ kammɔ.”
18Uwi ɔni na ɔdaku bɔtɛmi ni, lɛ́yu lɛ́tɛ líbi anumi kalɔ, na líduo lɛlɛɛ kemmo lísie ɔgyu geen. Nsu Katɔti ɔtu Gabriel ɔmɛni ɔ́da-mi ɔ́tala unyene mina lɛgba lɛlɔ. 19Na ɔ́su ɔnini, “Se kɔtu na enu, na ndubɔsu-ɔ lɛla lɛni ndubo libalɛ na kayawi kawɔlɔkɔ kani na Katɔti ɔ́ƒuna úse ka udie nwuna kɔnyi keyi. 20Koƒonu kɔgyani kɔmmɔ ese anyɔ ani nlɛ-ku lɛlɔ ni, anya ndi Media ku Persia baga. 21Na ketukpa kammɔ ndi Grikiƒuɔ lɛga kadikɔ. Na lise lɛni nlɛ-nwu anumi ntɛ na libo ɔyikun mmɔ ndi ɔga udeedi na nwuna baga bammɔ akɔ. 22Na uwi ɔni na lise lɛmɛni lɛ́ƒɛ ni, lɛga kɔdikɔ ine bamba badubo, nsu ama baaadubo ɔyikun bɔkɛ aani udeedi kalɛ.
23“Na uwi ɔni na baga bamɛni likyulikpi ala bɔbla bɔ́kɔ katɔ geen bútédu kesii kani na ɔlɛka bɔwɔ ni, bana ɔyiku kenye kadubo bukulo na ɔga ukpidi ɔdi ubenye-ma kenye ɔni na bekyuli beleti bana anu balasia-nwu lɛlɔ munu munu. 24Ɔdubo ɔyikun bɔkɛ geen, nsu ɔɔɔdi anwu ɔlati ɔyikun na ɔdi. Na ɔdubo ala bubile geen. Na ɔdubo batɔnkune bayikune udu bɔyila na kalɔ kammɔ lɛlɔ úbunku Katɔti bekyuli muedi. 25Na ɔkɔ ɔni na ɔdubo butaanyi taatɔlɔ bekyuli ɔdubɔya na ɔdi lɛlɔ na ɔƒɔ lɛnyi geen. Ɔdubo bekyuli pii bɔdu kɔnakunwi na ukpoku Katɔti kayawi ƒui lɛlɔ ɔdine utulone ƒui. Nsu Katɔti ɔdubo-nwu lɛlɔ bɔdi na ususu-nwu ɔbla kpɛtɛ kpɛtɛ.
26“Lɛla lɛni na ánu ásiku lɛdigye ku useyi uwi lɛlɔ ni, sɔsɔ na ɔdi. Nsu ala ammɔ aaadubo buyile bɔlɛ, anwuɔsu tasɔku-nya tasu bekyuli.”
27Amu na ala amɛni ƒui kama ni, lɛlɔ líse lítu-mi geen na lɛ́bla kpɛtɛ kpɛtɛ ɔni na bɔtɛ kani na mɔɔtɛ na ńsɔ ńtakana mina ɔga ɔmmɔ kabla kadi bɔta bɔbla uwi gyɔlɔɔ ɔdi kemmo. Na ala ani na lɛ́nu mmɔ ékpoku-mi geen, nsu eeebo-mi kalɔ bunu bɔdi nwaa lɛni.
Obecnie wybrane:
Daniel 8: lef
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.