MATHAYO 2
2
Antû baûme baathi kûgonga Yiesû
1Yiesû aaciarîîrwe taûni ya Bethireemu gîteere kîa Njundea, îgiita rîra Eronde aarî mûnene. Antû bamwe baûgî#2:1 Antû babu beetagwa na Kîîngiriki ‘Magi’. Baarî antû ba kîthoomo kîa îgûrû, na mûno mûno mantûûni ma nthata. baaya Njerusaremu baumîîte bwa mbarî ya uumîîro bwa riûa. 2Baûrithîria, “Arî kû ûra aciarîîtwe atuîka Mûnene wa Ayaundi? Twaya kûmûgonga n'ûntû itwonire nthata yumîîte bwa mbarî ya uumîîro bwa riûa îkîonanagia gûciarwa gwake.”
3Rîra mûnene Eronde aakinyîîrwe i mantû mamu eegua aatangîka mathûgaaniani maake. Na t'we wenka i Njerusaremu akubî yonthe. 4Eeta *athînjîri bara banene ba Ngai na aarimû ba watho bonthe amwe, abaûria i na kû kweerirwe Kîrîstû agaaciarwa. 5Bamwîra, “I taûni ya Bethireemu gîteereeni kîa Njundea, n'ûntû ûûgû i bu kwandîkîîtwe i kîroria,
6‘Woû, Bethireemu nthîgûrû ya Njunda,
naka na woû ûtirî mûkai kîrî atongoria ba Njunda,
n'ûntû ûkauma mûtongoria ûra akaatha
antû baakwa ba Isiraeri.’ ”#Mika 5:2
7Mûnene Eronde eeta antû babu baûgî kajûri, abaûria rîra rîongwa nthata înu yonekire. 8Abatûma Bethireemu abeera, “Îthiini bûcûnkûûne mantû ma kaana gaku. Bwakoona bûcookeere aaga bûkîmmenyithia kaingo na niû nthi gûkagonga.”
9Bakûrîîkia kwîgua bûra mûnene aabeerire, bauma agu baathi bûra baathiîte. Bakuuma, nthata îra booneete îrî bwa mbarî ya uumîîro bwa riûa yabatongoreeria kaîrî baathi mwanka yarûngama ara kaana kaarî. 10Bakwona yarûngama baakena mûno. 11Baathûngîra nyomba boona kaana kagwetwe i gina, Maria. Baaturia maru bakagonga, baarugûra biondo biao bakanenkera biewa bia thaabu, macoco, na manemane.#2:11 Manemane i rûûyî rwa mûtî rwanunkaga bwega mûno. Rwatûmagîrwa rûrî maguta na rwarî ndawa. 12Ngai abakaania kîrootooni abeera, “Bûtigaacookeere kwa Mûnene Eronde kaîrî.” Kwoogu bakîînûka baacookire na njîra îngî.
Kaana kaathi kwithwa Miisiri
13Ageni bakûthi, Njosebu aaroota mûraîka wa Mwathani akîmwîraga, “Ûka ûthûkie kaana ûgakuthûkie amwe na gina, bûthi Miisiri bûkare noogo mwanka rîra ngaakwîra n'ûntû Eronde nagûcûa kaana gaka akaûraga.”
14Njosebu agûûka aathûkia kaana na gina wa ko baathi bwa Miisiri. 15Baakara noogo mwanka rîra Eronde aakuire, kaingo bûra Mwathani augire gûkûrûkîîra kanyuani ga kîroria bûûyûra. Augire, “Indeetire mwana wakwa kuuma nthîgûrû ya Miisiri.”#Osea 11:1
Kûûragwa gwa twana
16Mûnene Eronde aathûûra mûno akûmenya antû babu baûgî ibaamweneerie. Aatûma acikaarî, abaa watho bwa kûûraga twana twa twîyî tunthe tûra twakinyithîîtie mîanka îîrî kwîndama, tûra twarî Bethireemu na ntûûra ira ciarî akubî n'yo wata bûra aamenyithîîtue n'antû babu. 17Mantû mara kîroria Njeremia aariirie maûyûra. Augire,
18“Mbu nîeguîkire Rama,
kîrîro na kîîthikîîro kîînene,
Raeri akîrîrîra twana twake,
aarema gûkirakirîka,
n'ûntû tûtirî mwoyo.”#Njeremia 31:15
Gûcooka kuuma Miisiri
19Eronde agûkua, Njosebu barî naagu Miisiri aaroota mûraîka wa Mwathani akîmwîraga, 20“Ûka ûthûkie kaana na gina bûcooke nthîgûrû ya Isiraeri n'ûntû bara bareendaga kûûraga mwana i baakuû.” 21Njosebu aûka aathûkia mwana na gina baacooka Isiraeri. 22Njosebu akwîgua Arikeraus, mwana wa Eronde, n'we aathanaga Njundea îthe agûkua, aakuthûka kûthi noogo. Ngai amûkaania kîrootooni athi bûngî, aathi bwa gîteere kîa Gariiri 23taûni ya Nasareethi aatûûra noogo. Na i kaingo ntheto ira ciariirue i kîroria ciûyûra. Kîroria kîaugire, “Ageetagwa Mûnasareethi.”
Obecnie wybrane:
MATHAYO 2: thk
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2019, Bible Translation and Literacy