Popularne wersety biblijne z Bǐbɛ́mɛ 8

Udostępnij

Bɔ Mawu Mavɔmavɔ se vɔ̌ ɔ́ sín wǎn, bɔ é nyɔ́ se n'i, bɔ é ɖɔ nú éɖée ɖɔ: “Un sɔ́ ná dó nu ayǐkúngban ɔ́ ɖě gbeɖé, ɖó dǎka xixo gbɛtɔ́ lɛ́ɛ tɔn wú ǎ, ɖó sín do wɛ gbɛtɔ́ kó ɖó ayi nyanya sín. Un ka sɔ́ ná vɔ nǔ e ɖo gbɛ ɖo ayǐkúngban ɔ́ jí lɛ́ɛ bǐ ɖě lě e un bló gbɔn din é ǎ. Nú ayǐkúngban ɔ́ ɖo te jɛ́n wɛ ɔ́, jinukún e è nǎ dó é kpó ée è nǎ ya é kpó ná tíin; avivɔ kpódó yǒzo kpó ná tíin, alǔun kpódó jǐ hwenu kpó ná tíin, zǎn kpódó kéze kpó ná tíin.”

Ée yě tɔ́n ɔ́, Nɔwée bló vɔ̌sákpe ɖokpó nú Mawu Mavɔmavɔ, bó fɔ kanlin tɛnmɛ tɛnmɛ e ma vɛ́ mɛ ǎ lɛ́ɛ ɖokpó ɖokpó, xɛ tɛnmɛ tɛnmɛ e ma vɛ́ mɛ ǎ lɛ́ɛ ɖokpó ɖokpó, bó bɛ́ bǐ dó sá vɔ̌ e è nɔ dó zo ɔ́ nú Mawu Mavɔmavɔ ɖo vɔ̌sákpe ɔ́ jí.

Mawu ká wɔn Nɔwée kpódó kanlin e kpó é kpó ɖo tɔjíhún ɔ́ mɛ lɛ́ɛ kpó ǎ. É wɔn gběkanlin lɛ́ɛ ǎ, é wɔn xwé gbe kanlin lɛ́ɛ ǎ. É sɛ́ jɔhɔn ɖé dó bɔ é nyi dó ayǐkúngban ɔ́ jí bɔ sin ɔ́ jɛ mimɛ jí.

Énɛ́ ɔ́ tɔn ɔ́, xwelé ɔ́ wá lɛ́ kɔ wá gɔ̌n tɔn gbadanu, bó ba olívuma zínzɔ́n ɖokpó hɛn nu. Énɛ́ ɔ́, Nɔwée mɔ ɖɔ sin ɔ́ kó ɖe kpo ɖo ayǐkúngban ɔ́ jí.