Popularne wersety biblijne z Sɛ́nflínmɛ 10

Udostępnij

Mɔyízi ɖɔ: “Izlayɛ́li ví lɛ́ɛ mi, étɛ́ ba wɛ Mawu Mavɔmavɔ, Mawu mitɔn ɖe ɖo mi gɔ́n? É jló ɖɔ mi ní nɔ sí émí, bó wa jlǒ émítɔn, bó yí wǎn nú émí, bó sɛn émí kpó ayi mitɔn bǐ kpó, kpódó lǐndɔ̌n mitɔn bǐ kpó. É jló ɖɔ mi ní xwedó gbetakɛ́n émítɔn e un ná mi égbé din lɛ́ɛ, bó xwedó sɛ́n émítɔn e un ná mi égbé din lɛ́ɛ; énɛ́ ɔ́, é ná nyí ɖagbe nú mi.

È ka ná ɖɔ ɔ́, Mawu Mavɔmavɔ, Mawu mitɔn ɔ́, é ɖokpónɔ wɛ nyí Mawu; é wɛ nyí Aklúnɔ aklúnɔ lɛ́ɛ tɔn; Mawu ɖaxó wɛ, lobo dó xɛsi. É nɔ́ nɔ awo mɛ nú mɛ ɖěbǔ ǎ; é ká nɔ́ yí ajɔ ɖo mɛ ɖěbǔ sí ǎ.

Mi bo jó miɖée dó bǐ nú Mawu Mavɔmavɔ, Mawu mitɔn, bó má sɔ́ tlí tó ɖě ó.

É nɔ́ jɛ ahwan tɔ́cyɔvǐ lɛ́ɛ kpó asúkúsi lɛ́ɛ kpó jí; é nɔ́ ná nǔɖuɖu kpó avɔ kpó to ɖěvo mɛ nu e ɖo mi gɔ́n lɛ́ɛ.

É wɛ mi ná nɔ́ kpa susu ná; é wɛ nyí Mawu ɖokpó e mi ɖó é; é wɛ wa nǔ ɖaxó ɖaxó lɛ́ɛ, nǔ e dó xɛsi lɛ́ɛ bɔ mi mɔ.”

“Mi ní ɖó sísí nú Mawu Mavɔmavɔ, Mawu mitɔn; mi nɔ sɛn ɛ; é ɖokpónɔ géé wú wɛ mi ná ɖó kan dó bó ná nɔ sɛn; é ɖokpónɔ sín nyǐkɔ wɛ mi ná nɔ́ xwlé.

Mawu Mavɔmavɔ, Mawu mitɔn wɛ ɖó jǐnukúnsin káká yi fí e é kponu ɖó é, bó ɖó ayǐkúngban kpó nǔ e ɖ'é jí lɛ́ɛ bǐ kpó.

Hǔn mi lɔmɔ̌ ní yí wǎn nú to ɖěvo mɛ nu e ɖo mi mɛ lɛ́ɛ, bó ká nɔ́ flín ɖɔ émí lɔmɔ̌ kó nyí jǒnɔ ɖo Ejípu tomɛ kpɔ́n.