Popularne wersety biblijne z Habakuk 1

Udostępnij

An Yawe hemi tok olsem, ?Olketa pipol blong mi. Yufala mas lukluk gudfala long olketa narafala kantri ya. Bae yufala seke fogud long olketa samting wea bae yufala lukim. No longtaem, bae wanfala samting hemi hapen. An taem yufala herem nius abaotem, yufala nating save bilivim nomoa.

(Profet) !O Yawe! ?Fo hao long nao bae yu no lisin kam nomoa long mi, taem mi gohed fo kraeaot go long yu fo helpem mifala? ?Fo hao long nao bae yu no sevem mifala, taem olketa nogud pipol i gohed fo barava mekem mifala safa?

?Waswe nao yu letem mi fo lukim olketa ravis samting ya? ?Hao nao yu save letem olketa ravis samting i gohed fo hapen olsem, bat no duim nomoa enisamting fo stopem? Evriwea raonem mi, pipol i gohed fo kilim man dae, an gohed fo spoelem evrisamting. Long evri ples, pipol i gohed fo raoa, an gohed fo faet.

Pipol no falom olketa tising blong yu, an olketa nating falom stretfala wei blong yu fo jaj. Olketa nogud pipol i gohed fo sensim stretfala wei ya fo ravis wei. Hem nao olketa gohed fo tekova from olketa stretfala pipol.