Popularne wersety biblijne z इफिसियों 4

Udostępnij

योकिया पन दयावान जां साफ दिल बाऐ बंणा जां जिहीं परमेश्वरै मसीह मझ तुवाड़ै अपराध माफ क्यै, तिहियें तुवे बि योकिया केरै पाप माफ करा।

मतलब पूरी दीनता सिंउ जां नम्र भौ-करि प्रेम सिंउ धीर रखि करि योकिया केरी गलती मनियां करा।

कोई बि गन्दी गल तुवाड़ु मुहां किना ना निकोहिया, पण तैन्हांं गला बोला, जै मैहणुवां केरै तेईनी जरूरी अत्ति। जै तैन्हां विश्वासा मझ मजबूत भूंणेरै तेईनी मजत करिया। तां फिरी जै किछ बि तुवे बोलेलै, तैस शुणनारैरा भला कांना।

हर प्रकारेरी कड़वाहट जां प्रकौप, गुस्सा, लड़ाई-झगड़ा जां निंदा जां सभ नफरती तुहां किना दूर करियो।

अगर तुहां गुस्सा ऐईछिया, ता ध्यान रखै कि तुवे कोई बि पाप ना करिया; ऐठणीरै तेईनी संन्हैरा भूंणा किना पेहिलै तुवाड़ा गुस्सा शांत भौ गहिया। जां गुस्सा करि-करि तुवे शैताननी धोखा दींणैरा मौका मेईं देया।

ऐठणीरै तेईनी तुवे अपड़ै पुराणै पापी स्वभाव जां अपड़ै पुराणै जीवन जींणेरै तरीकै छडि दिया, जै वासनाय जां धोखै किना भ्रष्ट आ। ताकि पवित्र आत्मा तुवाड़ै विचारा जां व्यवहारा नवाँ बंणाता गहिया। केईनी कि परमेश्वरै तुहांनि अक नवाँ स्वभाव दितौरा, जै बिल्कुल तेसेरै अपड़ै स्वभावा सैयि आ। ऐठणीरै तेईनी ऐस नवें स्वभावेरै अनुसार सही मायनै मझ धर्मी जां पवित्र जीवन जिआ।

ऐहीं कांनेरी कोशिश करा ताकि तुवे लगातार मिलि-जुलि करि रिय्हा; केईनी कि तुवे परमेश्वरेरी आत्माय ला अक बंणाईयोरै अत्तै।

ऐ मसीह थ्या जेनि ऐ जिम्मेवारी कलीसियैनि दित्ती, तेनी किछ खास चैलै भूंणेरै तेईनी चुणै, जां किछ भविष्यवक्ता बणनेरै तेईनी, जां किछ खुशखबरी शुणांणेरै तेईनी, जां किछ विश्वासिया केरी रखवाली कांनेरै तेईनी जां तेन्हांनि शिख्रांणेरै तेईनी चुणै। तेन्हैरी जिम्मेवारी ऐ आ, कि सैक्यै परमेश्वरेरै मैहणुवां तेसैरा कंम कांनेरै तेईनी तियार करिया, जेनि ला मसीहरा शरीर मतलब जै विश्वासी अत्तै, सैक्यै मजबूती सिंउ बढ़तै गहिया। ऐ त्यो-तेईनी जारी रींहणु, ज्यो-तेईनी कि असै अपड़ै विश्वास जां परमेश्वरेरै पुत्रेरै बारै मझ अपड़ि समझि मझ अक ना भौ गांहथै, तां असै सिद्ध बंणी गांहणै, जिहीं मसीह बंणौरा। जां असै पूरी तरह सिंउ तैस सैयि बंणी गांहणै।

ता अबै ऐम्हियां किना असु बच्चै सैयि व्यवहार कांना बंद करि दींणा चेहिंथा। अबै असै तैस हल्की किश्ती सैयि नत्तै, जैस संमुन्द्रेरी छाल्ही कदि इस दिशाय मझ ता कदि ओस दिशाय मझ ढक्यांतीं रींहथी। ऐठणीरै तेईनी असु धौखैबाज मैहणुवां केरी तैन्हांं झूठिया शिक्षाईया मझ ना फसणु चेहिंथु, जै सच लगती। बल्कि प्रेमा मझ सच बोलि करि असु हर गलै मझ मसीह सैयि सिद्ध बंणनु चेहिंथु, जै विश्वासिया केरू मुंडक आ।