Popularne wersety biblijne z कुलुस्सियों 3

Udostępnij

जेख्णी तुहां योकिया मझ कोई शिकायत भुई ता योकिया केरी सैहि ल्या जां योकिया केरै अपराध माफ करा जिहीं परमेश्वरै तुवाड़ै पाप माफ क्यौरै अत्तै, तिहियें तुवे बि करा।

स्वर्गा मझ परमेश्वरै तुहां मैहणुवां केरै तेईनी जै आशीषि रखोरी अत्ति, तैन्हांं पनि लगातार ध्यान दींतै रिय्हा। तैन्हांं बुरा कंमा मेईं करा जै धरती पनि मैहणु कातै रींहथै।

जां तुवे मैहणु जै बि कम करा पूरा मंन ला करि करा, ऐहीं सौचि करि कि मैहणुवां केरै तेईनी नत्तै कातै पण प्रभुरै तेईनी कातै अत्तै।

ऐठणीरै तेईनी जेख्णी परमेश्वरै तुवे अपड़ै पवित्र मैहणु बंणनेरै तेईनी चुणोरै अत्तै जां तुहां सिंउ प्रेम काता, ता तुवे धिरास रखणै बाऐ, दयालु, विनम्र, कोमल, जां सहनशील बंणा।

हर टैंम मसीहरै संदेशेरै बारै मझ सौचा ताकि ऐ सभ-किछ तैस काबु मझ करिया जै तुवे कातै जां सौचतै; जां पूरै ज्ञानै ला योकिया शिख्रा जां बत्त लुहातै रिय्हा जां अपड़ै मंना मझ धन्यवाद करि-करि परमेश्वरेरै भजन जां स्तुति जां आत्मायरै गीत लांतै रिय्हा। जै किछ बि तुवे बोलिया या करिया, सै सभ-किछ सभ प्रभु यीशुरू नाँ लै-करि करा जां प्रभु यीशुरी वजहि ला पिता परमेश्वरैरा धन्यवाद करा।

सभनियांं किना खास कम जै तुहां कांना चेहिंथा सै ऐ आ कि योकिया सिंउ प्रेम करा, ऐहीं कांने ला तुवे पूरी तराहि सिंउ अकजुट भौ गांहणै।

ऐ ऐहीं चारै आ जिहीं परमेश्वरै तुवे मौरा मझां जींतै क्यै, जेख्णी मसीह तेनी मौरा मझां जींता केया। ता तेसैरी ईच्छा करा जै परमेश्वरै तुवाड़ै तेईनी स्वर्गा मझ रखौरू आ, जेठि मसीह परमेश्वरा किनि सभनियां किना खास जगाय पनि बेठौरा।

सै शांति जै मसीह दींता तैस अपड़ै दिला पनि राज कांना देया, केईनी कि तुवे सभ एकि ऐ शरीरेरै अंग अत्तै। ऐठणीरै तेईनी तुवे योकिया सिंउ शांति सिंउ बेशणेरै तेईनी शदाउरै अत्तै। जां हमेशा परमेश्वरैरा धन्यवाद कातै रिय्हा।

ऐठणीरै तेईनी तैन्हांं बुरा कंम कांने बंद करा जै तुवाड़ै पाप बाऐ स्वभावा सिंउ जुड़ौरै अत्तै, मतलब व्यभिचार, अशुद्धता, बुरू सौचणु, बुरी ईच्छाय जां लालच जै मूर्तिया केरी पूजा कांने बराबर आ।

केईनी कि तुवाड़ा पाप कांने वा स्वभाव मरि गियौरा जां तुवाड़ा नवाँ जीवन मसीह सेईतै परमेश्वरा मझ छपौरा।

पण अबै तुहां ऐकेई सारी गलै मतलब गुस्सा, नाराजगी, बैरभाव, निंदा, गंदी गलै हमेशेरै तेईनी कांनी छडि देया।

योकिया सिंउ झूठ मेईं बोला, केईनी कि तुहैं अपड़ा पुरांणा पापी स्वभाव जां सारै बुरै कम छडि दितोरै अत्तै। अबै तुवे अक नवें मैहणु बंणी गियोरै अत्तै, ऐ नवाँ स्वभाव असेड़ै बणांणै बाऐ परमेश्वरा सैयि जादा किना जादा भूंता गांहथा जां ऐठणीरै तेईनी सै तैस अच्छै तरीकै सिंउ समझैला।

हे लाड़ो! तुवे अपड़ि-अपड़ि लाड़िया सिंउ प्रेम रखा, जां तैन्हांं सिंउ नम्र बेशा।

हे बच्चो! जै किछ बि तुवाड़ै माँ-बब तुहांनि कांननी बोत्तै, तैस करा, केईनी कि प्रभु ऐनि ला खुश भूंता।

हे लाड़ियो! अपड़ै-अपड़ै लाड़ा केरै आधीन बेशा केईनी कि मसीह पीछै चलणारानि ऐहै ठीक आ।