If you would like a copy of this version please contact info@davaraudiobibles.org

The Holy Bible Sunuwar © 2011 Wycliffe Bible Translators Inc. (Text)
Sunuwar Old Testament Audio Bible ℗ 2025, Davar Partners International. (Audio)

Sunuwar Old Testament

मिनु नोले आदम आ मीश हव्‍वा नु इम्‍माक्‍त। मिनु हव्‍वाम कोव़ज कुरशा, तौ का थि‍माक्‍त। हव्‍वामी “परमप्रभु यावेमी आं कली वारच पा आल का गेती” देंमाक्‍त। मिनु आ नें काइन वोदा बाक्‍त। मिनु मेको आ नोले लेंशा अर्को तौ का यो थि‍माक्‍त। मेको कली हाबील नें वोदा बाक्‍त। हाबील काइन आ लोक्‍ब बाक्‍माक्‍त। मेको आल निक्‍शी कोल्‍शा, हाबील भेडा गोठला दुम्‍माक्‍त। काइन चहिं रू ङा गेय पाइब दुम्‍माक्‍त।
काबु काइनमी आ रू ङा सिश्‍शो मारेइ मारेइ थोव़क परमप्रभु यावे कली चढ़ेवा बाक्‍त। हाबीलमी आ ङोंइती गिक्‍शो पाठा आ श्‍ये नु बोंसो परमप्रभु यावे कली चढ़ेवा बाक्‍त। मिनु परमप्रभु यावेमी हाबील आ चढ़ेशो ब्रवा बाक्‍त। तन्‍न काइन आ चढ़ेशो मब्रवा बाक्‍त। मिनु काइन आ कुल राव किक्‍पा चुरमाक्‍त। मिनु परमप्रभु यावेमी काइन कली “मारदे चुरे? मारदे राव किक्‍ङे? गे रिम्‍शो पाप्‍तीवी हना, गो इ कली मब्राइनुङा ङा? ब्राइनुङ। गे मरिम्‍शो पाप्‍तीवी हना, मुर साइक्‍ब जन्‍तु खोदेंशो पा, पाप इ लाप्‍चोमी बाक्‍ब। मिनु इ कली माल्‍ब। गे इ मरिम्‍शो थुं कली ग्राङो” देंमाक्‍त।
मिनु काइनमी आ लोक्‍ब हाबील कली “रूमी लस” देंमाक्‍त। मिनु रूमी बाक्‍सानु, काइनमी हाबील कली सदा बाक्‍त। मिनु परमप्रभु यावेमी काइन कली “इ लोक्‍ब ते बाक्‍म?” दे हिल्‍लो पवा बाक्‍त। मिनु काइनमी “ङाद, गो आं लोक्‍ब आ गोठला नङा ङा?” देंमाक्‍त। मिनु मेकोमी “नेनो, मार पवी? इ लोक्‍ब आ हुशेमी आं कली खप रे ब्रेश्‍शो नेंता। मुल गे सराप रशा, इ रू रे खेरचा पुंइसीनेवे। मारदे हना इ लोक्‍ब आ हुश मेकेर जारशो बाक्‍ब। मुल रे गे रू ङा गेय पवीनु, मारेइ मग्रेल्‍ब। रागी प्रोंइशा, गाक्‍ब मुर दुम्‍चा माल्‍नेवे” दे परमप्रभु यावेमी देंमाक्‍त।
मिनु काइनम परमप्रभु यावे कली “इन गेशो सजाइ ठेयब बाक्‍ब। मोमो श्‍येत गेतीनी हना, फाल्‍ने मचाप्‍नुङ। मुलाक्‍ती आं कली आं रू रे ग्रुंइ‍ताक्‍यीनी। मिनु इन नेक्‍था बाक्‍चा मताइनुङ। गो मुल रागी प्रोंइशा, गाक्‍ब मुर दुम्‍नुङ। आं कली सुम थित्‍तेक्‍म हना यो, साइक्‍नीम” देंमाक्‍त। मिनु परमप्रभु यावेमी “ममाइ, सुइमी इ कली साइक्‍तेमी हना, इ तशो सराप मेको कली ७ खेयप रचा माल्‍ब” देंमाक्‍त। मिनु परमप्रभु यावेमी “काइन कली सुइमी मसदमेक्‍ल” दे आ रांम चिनु वोदा बाक्‍त। मिनु नोले काइन परमप्रभु यावे आ ङोंइती रे लमाक्‍त। मिनु एदेन आ पूर्ब गे, नोद माइश्‍शो रागीम जाक्‍दीश्‍शा बाक्‍माक्‍त।

मिनु काइन आ मीश नु इम्‍माक्‍त। मिनु मेकोमी कोव़ज कुरशा, हनोक थि‍माक्‍त। मिनु काइनम सहर का सेला बाक्‍त। मेको सहर कली आ तौ हनोक आ नें खोदेंशो पा हनोक नें वोदा बाक्‍त। हनोकमी इराद थि‍माक्‍त। इरादमी मेहुयाएल थि‍माक्‍त। मेहुयाएल मेथुशाएल आ आफ दुम्‍माक्‍त। मेथुशाएल लमेक आ आफ दुम्‍माक्‍त।

मिनु लमेकमी मीश निक्‍शी चाक्‍गा बाक्‍त। का आ नें आदाह नु अर्को आ नें चिल्‍लाह बाक्‍माक्‍त। मिनु आदाहमी याबाल थि‍माक्‍त। मेको ताम्‍बुम बाक्‍ब नु गोठम बाक्‍ब बस्‍तु योव़ब आन किकी पिपी बाक्‍माक्‍त। मेको आ लोक्‍ब आ नें यूबाल बाक्‍माक्‍त। मेको बीना नु मुइक्‍तीके ताप्‍ब आन किकी पिपी बाक्‍माक्‍त। मिनु चिल्‍लाहमी तूबल-काइन थि‍माक्‍त। मेकोमी कांसा नु फलाम के मार मार सेल्‍तीक गेय पवा बाक्‍त। तूबल-काइन आ समी नामा बाक्‍माक्‍त। मिनु लमेकमी आ मीश निक्‍शी आस कली “आदाह नु चिल्‍लाह, आं लोव़ नेनीस, गे लमेक आ मीश निक्‍शी, आं सेंदा नेंशा, होस पसे। गो मुर का साइक्‍ता। मारदे हना मेको ठिटामी आं कली तुप्‍ती। काइन साइक्‍ब ७ खेयप क्‍येक्‍क लेत्‍चा पुंइसीब हना, लमेक साइक्‍ब ७७ खेयप क्‍येक्‍क लेत्‍चा पुंइसीब” देंमाक्‍त।

मिनु आदम लेंशा आ मीश नु इप्‍शा, तौ का थि‍माक्‍त। मेको कली सेथ नें वोदा बाक्‍त। हव्‍वामी “परमप्रभुमी हाबील आ पा ङा अर्को तौ का गेती। मारदे हना काइनमी हाबील कली साइक्‍तु” देंमाक्‍त। मिनु सेथमी यो तौ का थि‍माक्‍त। मिनु मेको कली एनोश नें वोदा बाक्‍त। मिनु मेना रे मुरपुकीमी परमप्रभु यावे कली पुंइचा नु ठेयब सेल्‍चा गोव़मे बाक्‍त।

Słuchaj उत्पत्ती 4