Sénoufo, Nyarafolo

A Kulocɛliɛ Pìle ni 'Zezi kɔ́ri wè nɛ̀ yiri waama kùlo mɛ́ lè gbòdolilo kàfɔli wi sari wi pun de wéli. A wi sɛ́nì sún le nɛ̀ taa cɛnyɛ togosiin, pìliye togosiin. A fungo 'wi taa. A Setɛni wi 'pɛn wi kúrugu bè pa wi puu wéli, nɛ̀ pɛ́nì wi yɛ: «A ki yē muɔ yē Kulocɛliɛ Jaa wè, ma juu nɛ́ sìndɛniyɛ nyáà ní yè, yi- kò búru wêli.»
A Zezi wi 'siɛnnugoro kɛn dè nɛ́ jo: «Kulocɛliɛ siɛnsɛbɛrɛ ti 'jo:
Suro yákuɔ bɛ̀ʔ siɛn béri líi bé sí puu sìi nɛ̄ʔ,
nɛ̀ sí ki yaʔa siɛnrɛ ó siɛnrɛ dáà ti yigi Kulocɛliɛ nyuɔ nī gè,
tiī nɛ siɛn kanʔa wi kòrí sìi nɛ̄ .»
A gbòdolilo kàfɔli wi 'wi kɔ́ri nɛ̀ kɛ́ Zerizalɛmi mɛ́, Kulocɛliɛ kàʔa wàlidɛngɛgɛ gè, nɛ̀ sɛ́nì wi tárigɛ Kulocɛliɛ Gbùʔɔrɔsaʔa mijuulo naamɛ gè nɛ́ wi yɛ: «A ki yē muɔ yē Kulocɛliɛ Jaa wè, kún ma tuu; nɛ́ ki cɛ́n Kulocɛliɛ siɛnsɛbɛrɛ ti 'ki juu nɛ́ jo:
Kulocɛliɛ wi bé ki juu bè gbɛ̀ngɛ
wi nyìʔɛnɛ tundunminɔ mɛ́ bèle
muɔ kɛnmɛ nɛ̄ bè,
pe- muɔ tuʔɔlɔ bè cò
pe kiyɛ nī yè,
kire ga buu
muɔ tɔligɔ káà fǎga círi daa
kàdɛnigɛ káà nɛ̄ʔ .»
A Zezi wi 'wi yɛ: «Kulocɛliɛ siɛnsɛbɛrɛ míɛni ki juu nɛ́ jo: Fǎga jo muɔ bé muɔ Kàfɔli Kulocɛliɛ puu wè bè wéliʔ .»
A gbòdolilo kàfɔli wi ní nɛ̀ wi kɔ́ri nɛ̀ kɛ́ nɛ́ wi ní nyagurukpaʔaligɛ naamɛ gè, gìi ki 'kpàʔala yi mìɛni nɛ̄ yè; nɛ̀ sɛ́nì duniya kùlofɔliyɔ yi mìɛni tìɛ wi nɛ̄ nɛ́ yi cɛ̀nmɛ ní bè, nɛ́ wi yɛ: «A muɔ 'káguro wáa mi yiʔɛ mɛ́ gè nɛ̀ mi gbùʔɔrɔ wè, m'bé dàa ti mìɛni kɛn dè muɔ mɛ́.»
A Zezi wi sí wi yɛ: «Núgo mi táanni Setɛni ! Kulocɛliɛ siɛnsɛbɛrɛ ti 'ki juu nɛ́ jo:
Te muɔ Kàfɔli Kulocɛliɛ
wire gbùʔɔrɔ́ ,
wire nigbe mɛ́
muɔ 'yɛli bèri baara .»
Kire lɛ̀lɛ nī lè a gbòdolilo kàfɔli wi 'wi yaʔa yanyige nɛ̄, a nyìʔɛnɛ tundunminɔ 'fali nɛ̀ pɛn wi kúrugu nɛ̀ pɛ́ni kele kúu wi mɛ́.




Bà pe cé Zan cò wè nɛ̀ tɔ́n kasuu nī wè, á Zezi ti 'lúʔu dè, a wi 'yiri baa kire tiʔɛ nī gè nɛ̀ kɛ́ Galile tɛ́nimɛ mɛ́. Wiì sɛ́nì tɛ́ni Nazarɛti kàʔa nīʔ, a wi 'kɛ́ nɛ̀ sɛ́nì tɛ́ni Kapɛrinawu kàʔa nī, ki cé yiʔɛ wáa cáʔa mɛ́ gè, Zabulɔn nɛ́ Nafitali tɛ́nimɛ nī. A kire 'ki kɛn siɛnrɛ dáà Kulocɛliɛ siɛnjuuwo wi cé juu dè Ezayi wè, a ti 'fori nɛ̀ paʔa; wi cé jo:
Zabulɔn tɛ́nimɛ,
muɔ nɛ́ Nafitali tɛ́nimɛ ní bè,
koligo gáà ki tòrí
Zurudɛn cáʔa kúrugu gè,
Galile tɛ́nimɛ bè
nabɔnminɔ kùlo lè,
kùlo níì nī siɛnnɛ
pe 'puu tɛ́ninɛ yebilige nī gè,
pe 'kpìɛnmɛ nyaa kpuɔbɔ wálilɛ,
nɛ̀ pínɛ tálogo gíì ki 'puu
kùu wuɔmɔ nī bè,
kpìɛnmɛ nyɛ́nì yiri pe nɛ̄  !
Kire lɛ̀lɛ nī lè a Zezi wi séli nɛ Kulocɛliɛ siɛnrɛ jáari dè nɛ́ jo: «Ye- yiʔɛ yeli funyɔ nī yè, nɛ̀ taʔa gíi nɛ̄, Nyìʔɛnɛ Kùlofɔligɔ ki 'sìʔɛrɛ nɛ̀ kpɔni yeli nɛ̄.»


Bà Zezi wi 'puu nɛ tári nɛ tòrí Galile kuʔɔjii nyuɔ nɛ̄ gè, a wi sɛ́nì Siimɔ nyaa, n'ŋɛ pe yeri Piɛri wè, nɛ́ Andire, wàa nɛ́ wi siinyɛni, pe jùɔlɔ wáari luʔɔ nī gè. Ki 'nyaa fúɔcobilo bīɛlɛ pe 'puu. A Zezi wi 'pe yɛ: «Ye- taʔa mi nɛ̄, m'bé yeli kpíʔile yeli de siɛnnɛ caa majo kɛnmɛ bíì nɛ̄ yeli nɛ fúɔlɔ cògí bèle.»
A pe 'fali nɛ̀ jùɔlɔ yaʔa bèle baa, nɛ́ líɛ nɛ̀ taʔa wi nɛ̄.
Bà wi 'sìʔɛrɛ cɛ̀ri wè, nɛ̀ siinyɛninɛ pálì siin nyaa, Zebede jaala Zaki nɛ́ wi cɔni Zan; pe 'puu tɛ́ninɛ pe kɔ́ri nī gè nɛ́ pe tuu Zebede ní wè, nɛ pe jùɔlɔ yori bèle. A wi 'pe yeri. A pe 'fali nɛ̀ kɔ́ri yaʔa gè baa nɛ́ pe tuu ní wè, nɛ́ líɛ nɛ̀ taʔa Zezi nɛ̄ wè.


A Zezi wi 'líɛ nɛ tòrí Galile tɛ́nimɛ pi mìɛni nī bè nɛ siɛnnɛ tɛnmɛ bèle pe tɛnmɛzaaya nī yè, níɛ Kùlofɔligɔ ki Kataanna Siɛnrɛ jáari dè, nɛ yaama feliye yi mìɛni pori nɛ́ siɛnkpɔlilɔ pe mìɛni ní bèle kùlo nī lè. A wi míʔɛ ki 'yiri Siirii kùlo ni mìɛni nī lè; a siɛnnɛ pe 'kò nɛ báan nɛ́ pe yaala feliye yi mìɛni ní wi kúrugu, nɛ̀ gbòdolilofɔlilɔ pínɛ bèle, nɛ́ tuulofɔlilɔ ní bèle, nɛ́ lolilo ní bèle; wi pe mìɛni pori. A siɛnniʔɛmɛ 'líɛ nɛ̀ taʔa wi kúrugu. Pe cé kɔ́n Galile tɛ́nimɛ nī, nɛ́ Kàaya Kiɛ kùlo wuulo ní bèle, nɛ́ Zerizalɛmi wuulo ní bèle, nɛ̀ fàri Zude tɛ́nimɛ wuulo nɛ̄ bèle nɛ́ Zurudɛn cáʔa kúrugu wuulo ní bèle.

Słuchaj Matiye 4