Deg - 1990 Edition (Non-Drama - NT)

Wobɛlbwa mumpar Korowii aa wola nyundua ne harɛ tae mɔɔ la, dɛ Korowii Nyoa Wobol la lole. Dɛ o ne Korowiirii lole, asɛ o ne o bwa ɛ beŋkpoŋ. Dɛ onee ja Korowii nɛɛ mumpar la.
O nɛɛ Korowii che dɛ ta komɛlbwa. Kontaale bɛlbwa toole waa wola o nɛɛ cheɡɛ dɛ tao. Korowii Nyoa Wobol la bee Korowii mkpa do, asɛ ɡɛ mkpa nɔ ɡe ɛ kɛŋɔ nii dɛɛ chaah nɛwɛnyini sie. Nii nɔ lole dɛɛ chaah biro ta, kɛ biro ta wone tɔɔ ŋwɛnɛ ó chaah bɔr kahonɛ bwa.
Dɛ baa bɛl lole baa yerɔ Jɔn. Korowiirii tomɔ ŋɔ ó ba bol nii la waa dɛ chaah nɛwɛnyini sie la waa nɛra be, ásɛ ba no dɛ yarada. Dɛ Jɔn ɡbaɡba laa ɡɛ nii la. Balaa o ba dɛ ba bol nɛn waa ɛ nii tenten la waa ásɛ nɛra jemɛ o wa. Korowii Nyoa Wobol laanee nii kasinteŋ waa dɛ ba harɛ nɔ ta dɛ́ ba pili nɛwɛnyini sie la.
O nɛɛ Korowii che dɛ ta nɛwɛnyini, kɛ waa ba harɛ ta bonɔ la, nɛwɛnyini ta on jemɛ. O ba o ɡbaɡba harɛ ta, asɛ o ɡbaɡba nɛra vɛoh. Kɛ nɛra la te bwa baa lɛo dɛ yaradao la, o tɛɛ ba kpeɡri kɛŋɔ bá ɛ Korowii bii. Ŋwɛnɛ nɛwɛnyini aa cheɡɛ o ta dɛɛ lolɛ bii la, kɛɛ nɛwɛnyini pɛla, kɛɛ nɛwɛnyini tetoora ta laa ba lol ba ba ɛ Korowii bii. Korowii kpeɡri taa a che ba berɛ o bii.
Korowii Nyoa Wobol la baa berɛ nɛwɛnyini, dɛ ba so ya be. Ya na o jirima waa dɔa, dɛ jemɛ kɛŋɔ Korowii Bibeŋkpoŋ laanee on. Dɛ o wobɛlbwa wer, asɛ o dɔ kasinteŋ ɡe kohona.
O waa Jɔn faa bol kohona dɛɛ ŋɔ, “Nɛn n fa aa dɛ bol o waa dɛ ŋɔ men tɔ sie o nɛɛ kɛ o ɡwaa mɛ, dɛkalkɛŋɔ o lole mɔɔ ba lol mɛ la, on la.” Korowii chao kohona asɛ o ɡe na ya sum dɛɛ tɛ yaa andɛɛɡa saŋ bɛlbwa, waa wola ɡel bwa. Mosis nɛɛ Korowii che dɛ ba Mmara la ne. Yeesu Kristo ɡe nɛɛ nɛn nɛɛ suna ne kasinteŋ bwa che dɛ ba harɛ ta. Nomɛlbwa ta Korowii nae bwa. O Bibeŋkpoŋ waa pɛlo la, on ɡela nɛwɛnyini jemɔ.


A wola bɛl, Juu tena nomonome baa lɔ Jerusalam la tomɛ ba sɔfore ne Lewi dea tena ŋɔ bá ka bɔɔ Jɔn o nɛnsoo. Waa waa bola dɛ kpɔ di Yeesu danseɛ laanee nɔ. Baa bɔɔro ɡɛ la, o ta nyoa tɔe. O bol kasinteŋ ŋɔ, “Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la laa men.”
Anee ba bɔɔro ŋɔ, “Aah dɛ umee hen ɔ? Elaejaa hen kɛɛ?”
Asɛ o ŋɔ, “O laa men.”
Anee ba ŋɔ, “Korowii keame laanee hen kɛɛ?”
Asɛ o ŋɔ, “Akai.”
Belaa ba ŋɔ, “Baɡle he nɛnsoo yá jemɛ, dɛ́ won dɔ wobɛl ka bol nɛra baa tomɛ yaa la be. Nɛn besoo hɛɛ lii he te nɔ?”
Belaa Jɔn kpɔ Korowii keame Aesaya waa o fa aa bola la chaŋ ba ŋɔ,
“Menee naate waa dɛ bol waa takpeɡ ne
pua hɛŋle ɡbo harɛ ta dɛ ŋɔ,
‘Hé ɡel he we-ɛɛla toɡre, dɛ́ kpɔ he te
dɛɛ kpa he Dɔɔ bala’ la.”
Anee nɛra Farisii tena la aa tom ba la bɔɔ Jɔn ŋɔ, “He ŋɔ Kristo la laa hen, Elaeja ɡe laa hen, Korowii keame la ɡe laa hen, aah dɛ ɛrɛɛ he ɛ dɛ won dɛɛ sɔ nɛra Korowii neɔ?”
Belaa Jɔn ŋɔ, “Nee n te kpɔ dɛɛ sɔ nɛra Korowii ne. Nomɛl lɔ he bini taraken haa wola on jemɛ. Men bala mɔɔ o ba, kɛ o ɡwaa mɛ. Maa o napaa tee kwaraa dɔ.”
Bwɛɛ baa dɛ yerɔ Bɛtani o do Jɔɔdan Moo la wee leebɔr pera la, belaa a ɡɛ waa nɔ chiɡ. Dɛ belaa Jɔn ɛɛ sɔ nɛra Korowii ne.

Tɔ aa pera la, Jɔn na Yeesu kɛŋɔ waa dɛ ba o be. Belaa Jɔn ŋɔ nɛra o ne baa cheɡa la be ŋɔ, “Hé na Korowii Pebie waa dɛ ba nɛra bwa wechɔɡa laa dɛ́ kpɔ ba nɛɛ la! O waa n faa bol ŋɔ, ‘Nomɛl lɔ n habɔɔ dɛɛ ba, dɛ ɡwaa mɛ, dɛkalkɛ o lole mɔɔ ba lol mɛ’ la. Dɛ n ɡbabir fa aa on jemɛ, kɛ o waa n ba dɛ baa sɔ nɛra Korowii nee ásɛ Israel tena jemɔ.”
Jɔn bol Yeesu waa ja ŋɔ, “N na Korowii Doma la aa le nyundua kɛŋɔ borɔnoma, dɛ ba so o nɛ. N te fe aa jemɛ kɛ onee, kɛ Korowii waa lee mɛ ŋɔ ń ba kpɔ nee dɛɛ sɔ nɛra Korowii nee laanee ɡela n jemɔ. O ŋɔ n be ŋɔ, ‘Hɛɛ na n Doma laanee o ba so naate nɛ. On dɛɛ ba n Domadɛɛɡe kpɔe dɛ sɔ nɛra la.’ A ɡɛ waa nɔ chiɡo n na, anomanta, n dɛ ŋɔ he be ŋɔ Korowii Biee on.”

Tɔ aa pera la, dɛ Jɔn ne o habɔteŋra banɛ cheɡɛ bela ja. O na Yeesu o baa kaa, asɛ dɛ ŋɔ, “Hé na Korowii Pebie la!”
Waa ŋɔ ɡɛ la, o habɔteŋra banɛ la noɔ, dɛ ka teŋɛ Yeesu nɛ. Belaa Yeesu ke nyiŋi dɛ na kɛ baa teŋɛ o nɛ, asɛ o bɔɔ ba ŋɔ, “Bɔkwaa hɛɛ nyin ɔ?”
Asɛ ba bɔɔro ŋɔ, “Rabae, lee he dem doɔ?” Rabae munii nɛn waa dɛ chaɡle wa.
Belaa o ŋɔ, “Hé ba na.”
Asɛ ba la dɛ ka na o dem. Dɛ a bɔ jɔmɔra dɔŋ anaarɛ, asɛ ba so o be bela wee ba jo.
Dɛ Andriu ɛ nɛra banɛ la Jɔn aa bol waa ba no dɛ teŋɛ Yeesu nɛɛ la bini bɛl. Seemɔn Pita nimee on. Waa waa tɔ sie ɛ laanee kɛŋɔ o kaa nyin o dɔɔ Seemɔn bɔr, dɛ ŋɔ o be ŋɔ, “Ya na Mɛsaya la.” Mɛsaya munii Kristo. O la Seemɔn ne Yeesu be. Belaa Yeesu nyiŋu dɛ ŋɔ, “He sɔne Seemɔn. Jɔn biee hen. Taraken baa dɛɛ yerɛɛ Sefas.”

Tɔ aa pera la, Yeesu ɛo kɛŋɔ wɛɛ la Galilia harɛ taa. O kaa na Felep dɛ ŋɔ o be ŋɔ, “Baa teŋɛ n nɛ!”
Dɛ Felep bwɛɛ Bɛtsaeda, belaa Andriu ne Pita ɡe le. Felep ɡe kaa na Nataaneɛl, dɛ ŋɔ o be ŋɔ, “Ya na naate Mosis aa chwerɛ o waa Korowii Tɔn bini la. O waa Korowii keamere la ɡe chwerɛ la. O sɔne Yeesu. Josef waa le Nasarɛt la biee.”
Belaa Nataaneɛl ŋɔ, “Nasarɛt ɡe, kondɛɛɡe besoo dɛ́ won le bela ɔ?”
Anee Felep ŋɔ, “Ba ba na nɔ!”
Yeesu aa na Nataaneɛl wɛɛ ba o be la, o ŋɔ, “Israel te tentenee nɔ. O waa dɔ kasinteŋ kɛrɛdɛ!”
Belaa Nataaneɛl bɔɔro ŋɔ, “Ɛrɛɛ he ɛ jem mɛ nɔ?” Asɛ Yeesu chaŋo ŋɔ, “Haa lɔ fiɡ la mun la, n nae mɔɔ Felep ka yerɛ la.”
Anee Nataaneɛl ŋɔ, “Nomoa, Korowii Biee hen. Henee Israel tena Kooro la.”
Asɛ Yeesu ŋɔ o be ŋɔ, “Maa ŋɔ he be ŋɔ n nae fiɡ la mun la waa he den yarada mɛ nɔ naa? Hɛɛ na wejenaa a ɡwaa anɔ!” Yeesu ŋɔ ba be ŋɔ, “Kasinteŋ, n dɛ ŋɔ he be, hɛɛ nao nyundua aa pila, ásɛ nyundua toroma che bela tu dɛɛ ba Men Nɛn Bie be, dɛ berɛ teeh dɛɛ kaa.”

Słuchaj Jɔn 1