Sirak 23
23
1O Lod, yu dadi blong mi an Lod long laef blong mi. Plis no letem olketa toktok blong mi seleva fo mekem mi foldaon. 2Mi laekem yu fo wipim mi long olketa tingting blong mi, mekem Waes blong yu hemi stretem maen blong mi. Mi no laekem fo yu isi long mi taem mi rong, an mi no laekem yu fo yu lukluk nomoa long olketa sin blong mi. 3Mekem mi fo no save gohed fo sin moa, olketa enemi bae i no tekova long mi fo meksem long mi.
4O Lod, yu dadi blong mi an God long laef blong mi. Plis yu helpem mi, mekem mi no save kamap praod. 5Plis yu stopem evri nogud tingting long mi. 6No letem wei fo laekem plande samting, hemi winim mi, an no letem olketa nogud wei fo tekova long mi.
Fo mekem promis
7Olketa pikinini blong mi, yufala mas lisin gud long wanem mi talem abaotem stretfala toktok. Yufala mas falom wanem mi tisim yufala, an bae yufala no foldaon insaet long trap. 8Praod wei blong olketa nogud pipol an wei wea olketa save tokspoelem narafala pipol, hem nao hemi spoelem olketa ya.
9No#Matiu 5:34; Jemes 5:12. duim diskaen wei fo mekem promis, an no yusim nating holi nem blong God olowe. 10Slev wea olketa wipim olowe, bodi blong hem hemi boela olowe tu. Man hu hemi promis olowe long holi nem blong God, bae hemi sin olowe tu. 11Eniwan hu hemi promis olowe long holi nem blong God, hol laef blong hem bae hemi barava nogud olowe. Ya, bae God hemi panisim olketa long famili blong hem tu. Sapos hemi no duim wanem hemi promisim, olsem, hemi rong nao ya. Sapos hemi les fo duim wanem hemi promisim, hemi barava rong tumas nao. Sapos hemi mekem laea promis long fastaem, bae trabol hemi kasem evriwan insaet long famili blong hem.
Nogud toktok
12Wanfala kaen toktok hemi nogud an save kilim man dae. !Letem no eniwan long Israel hemi talem ravis toktok olsem, nogud trabol hemi kasem hem! Olketa gud pipol no save talem kaen toktok olsem, bae olketa kipim olketa seleva sef long wei ya. 13No yusim ravis toktok wea hemi doti, bikos hemi save mekem yu sin. 14Yu mas lukaot gudfala, nogud taem yu stap wetem olketa impoten pipol, yu maet talem samfala ravis toktok wea yu save talem olowe. Yu mas tingim hao nao bae filing blong mami an dadi blong yu. Long dea nao bae yu sem tumas an bae yu suea long datfala de wea yu bon kam long hem, an wandem fo yu dae nomoa. 15Sapos yu yusim ravis toktok olowe, bae yu no save lusim nao go-go kasem taem yu dae.
Sin wetem man o woman
16Plande kaen sin nao save mekem Lod hemi kros tumas. Bat fo man laekem sin wetem woman o woman wetem man, hemi barava hot tumas olsem faea wea hemi laet bikfala an bonem evrisamting. An man hu hemi gohed fo hapi fo sin wetem woman, bae hemi gohed go-go faea ya hemi barava bonem hem finis. 17Kaen man olsem, hemi laekem evri woman nomoa, an bae hemi gohed nomoa olsem go-go hemi dae.
18Man hu hemi sin wetem narafala woman, hemi no tinghae long waef blong hem, hemi tingim hem seleva nomoa. Hemi tok olsem, “No eniwan bae hemi save. Mi no wari long enisamting. Hemi tudak long hia an no eniwan save lukim mi. An fo Lod hu hemi hae tumas, hemi nating luksave nomoa ya.” 19Diskaen man hemi fraetem nomoa olketa narafala pipol. Hemi no luksave nomoa wea ae blong Lod hemi ten taosen taem braet winim san, an hemi lukim evrisamting wea yumi duim nomata yumi trae fo haedem. 20Lod hemi save finis long evrisamting bifoa hemi mekem disfala wol, an evrisamting wea bae hemi kamap bihaen. 21Bae olketa kasholem disfala nogud man ya long taem wea hemi nating save long hem an panisim hem long ae blong evriwan.
22Diskaen wei hemi semsem tu long woman hu hemi go olobaot long olketa deferen man, an hemi garem pikinini long narafala man. 23Fas samting wea hemi duim nao, hemi brekem lo blong Lod hu hemi hae tumas. Mektu samting nao, hemi sin agensim hasban blong hem. An mektri samting nao, hemi durong wetem narafala man, an hemi garem pikinini long narafala man ya hu hemi no hasban blong hem. 24Bae olketa pikinini i safa long sin blong mami blong olketa, 25an bae olketa faendem dat olketa i no blong eni grup long pipol o eni famili. An bae olketa tekem woman ya go long kot fo jajem hem an meksem long hem. 26Pipol bae tokspoelem hem long wanem hemi duim, nomata bihaen taem wea hemi dae finis. 27An evriwan wea bae i bon kam bihaen, bae i luksave dat no enisamting hemi gud moa winim wei fo tinghae long Lod. An no enisamting hemi suit moa winim wei fo falom olketa strongfala toktok blong hem.
Currently Selected:
Sirak 23: SIDC
Highlight
Share
ਕਾਪੀ।
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.