Sirak 22
22
1-2Pipol hu i les tumas i olsem hip long siti. Olketa save duim ravis samting an no eniwan hemi wande go kolsap long olketa.
Advaes fo pikinini
3Pikinini wea hemi no save herem advaes hemi save meksem tumas long dadi blong hem. An hemi barava nogud tumas sapos hemi wanfala pikinini gele. 4Gele hu hemi waes, bae hemi maritim wanfala gud man, bat gele hu hemi krangge, bae mekem dadi blong hem fo sore an krae. 5Gele hu hemi no garem gudfala tingting, bae hemi meksem long dadi an hasban blong hem. An tufala bae no tinghae long hem.
6Fo tisim pikinini long rong taem, hemi olsem fo hapi an singsing long taem blong dae. Bat hemi waes samting nao fo panisim pikinini an fo wipim hem.
7Taem yu traem fo advaesim krangge man, hemi olsem taem yu traem fo joenem wanfala glas kap wea hemi brek. Hemi olsem tu taem yu traem fo wekapem long wanfala man taem hemi dip slip. 8-10Fo eksplenem samting fo krangge man, hemi olsem fo eksplenem samting fo man hu hemi haf slip yet. Taem yu finis, bae hemi ask olsem, “Wanem nao yu talem?”
11Yumi sore an krae fo olketa man dae bikos olketa no garem wei fo lukim laet. Hemi gud sapos yumi sore an krae fo olketa krangge pipol, bikos olketa no garem wei fo kamap waes. Olketa man dae ya, hemi gud i res nao, 12an yumi#Jenesis 50:10; Judit 16:24. save sore an krae nomoa fo sevenfala de. Bat krangge pipol an olketa nogud pipol i sore long hol laef blong olketa.
13No visitim olketa krangge pipol o stap longtaem wetem olketa. Yu mas stap farawe long olketa, nogud olketa spoelem yu. Sapos yu duim olsem, bae yu save stap long piis, an no garem trabol falom krangge wei blong olketa. 14Olketa pipol ya, olketa olsem aean, an hemi had tumas fo advaesim olketa. An nem wea hemi fitim fo kolem olketa nao, “krangge.” 15Hemi isi tumas fo karim baeg blong san, o baeg blong solt o aean, bat hemi had tumas fo stap tugeta wetem krangge pipol.
16Timba wea olketa nilam strong long haos hemi had tumas fo hemi slak taem etkuek hemi sekem. Yumi save lanem man fo yusim save blong hem an gudfala tingting blong hem long hadtaem. 17Tingting blong man wea hemi waka gudfala, hemi olsem wanfala strongfala wol wea olketa dekoretem gud. 18Smolfala ston wea hemi stap antap long wol, hemi no save stap taem win hemi bloum go. Ya, krangge tingting blong man wea hemi save mekem hem fo fraet, bae hemi no save stanap strong taem olketa samting ya i kam wea olketa mekem hem fo fraet.
Gudfala fren
19Sapos yu pusum go wanfala pis stik long ae blong yu, bae wata hemi kamaot. An sapos yu brekem haat blong wanfala man, bae yu lukim barava filing blong hem. 20Sapos yu sutim olketa bed long ston, bae olketa fraet an ranawe. An sapos yu tokspoelem fren blong yu, bae fren blong yutufala hemi finis nao. 21-22Nomata yu raoa an tokraf long fren blong yu, hemi had yet fo yu lusim hem, bikos yu save stretem wetem hem. Bat sapos yu praod an yu talemaot haed tingting blong hem, an yu tokspoelem hem, bae hemi jes lusim yu nao.
23Yu mas mekem olketa pua pipol hu stap wetem yu fo trastem yu, mekem long gudfala taem blong olketa bae yu save hapi tugeta wetem olketa. Sapos yu wande kaban gud wetem olketa long gudfala taem blong olketa, yu mas saetem olketa long taem blong trabol hemi kasem olketa.
24Smok an hot blong faea mas kamaot fastaem bifoa faea hemi laet, olsem ravis toktok hemi kamaot fastaem bifoa trabol hemi kam.
25Bae mi no fraet nao fo satem fren blong mi long trabol, an bae mi no lusim fren blong mi long taem hemi nidim mi. 26Bat sapos hemi duim enisamting fo spoelem mi, evriwan hu i save long hem bae olketa agensim hem.
Prea fo help agensim sin
27Lod, plis helpem mi fo lukaot gudfala long evrisamting wea mi talem, mekem maos blong mi no save spoelem mi.
Currently Selected:
Sirak 22: SIDC
Highlight
Share
ਕਾਪੀ।
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.