KENDEU 8
8
Duinaii Cang kedi
1Tinggwang Noah nah liem ga pecu ngngwa kela makaune pelane de nsungta dima; pa tingkai tei gui gai, ge dui cip miedi. 2Kideu kang ga duilet ki dung nah ting ga tingrui kikam dung de nkui di. Tingrui tadi, 3nah ziee 150 ge dui cam reureu miedi. 4Kei sena bekei 17 benai liem Ararat deutuh ga mtak bam di. 5Dui cam reureu di, nah kei kerei bekei lang nai ge benai kideutuh dung ngau pet ti.
6Ziee redai cai Noah kebaaki ge nkei gai 7eh hegak gede lang mpet gai. Cide gwang dai tadi, dede cip mie kemaktane lim togwa bam di. 8Cidau Noah dui him kedi ci lu kerane tamhau gede lang mpet gai dai, 9dede dui ne hangdeu pelane gumpwa bamreu kecune, tamhau be mtak kera ni ngau luma. Cide liem ga caili gwang di, nah Noah pe ba keto pet cide de keu nlüt lu. 10Pa lang senane kwa gai eh tamhau bede lang mpet dai gai.
11Cide tinghegi olive nei kering ge nki lü peda nli gwang dai. Cine Noah dui be him mie kedi ci lu. 12Pecai pa keda lang senane kwalu nah tamhau bede piage lang gai dai; cupia cide nli gwang tadi.
13Noah mmi 601 dige, kei ge bekei lang nai ge benai dui be cahng di. Noah liem com de keu di, delü pie togwa gai, ge hangdeu be cahng di zeu kecu ngau lu. 14Kei na bekei ziee 27 benai kideube tsangking di.
15Tinggwang Noah dade cu, 16“N nau, n name nah penui nau dung de ngngwa lü liem gade mpet lu. 17Nruine nah makaune pelane de ncu si eh ngngwa mpet lu, ciciu eh penui lungh hingh lü kideu pelane reu haam lu kerane” debeu. 18Cine Noah pe nau, pe name, nah penui nau dung de ngngwa liem gole mpet lu. 19Makaune nah nruine pelane penui kenzwa dung pemaa tei eh liem gade mpet lu.
Noah Ratak ge Ketei
20Noah Rampaube ze ratakbam ge tei lu; pa makaune, nah nruine renet gade kencibe ketsamtsam ket keu ciak lu, delü cidung pelane pwa ratak tei eh recabam gage pummui ru gai. 21Ratak tei kegai rim de Rampaube pesui lu, nah pa pekatei peda de, “I madaude mina ta ziemne kideube de reset kang gage kai dai lakta; I pa pe henane gade pe lungcet dung au mau kecu ci. I madaude henai pia ketei nzwa kaungih kengngih de nkap dai lakta. 22Kideu kebamtane ling kecu nah luhlüt ting bam mui zie. Kenkung nah kelum, hepwak nah tingka, tingba nah tingmui bam muihzie.”
Currently Selected:
KENDEU 8: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.