KENDEU 7
7
Duinaii
1 Rampaube Noah dade rang eh, “N kelak pelane de ngngwa liem ga nlüt lu; I nang rünne kideu pelane gade petaube teikela ngau lu. 2Renet gade makaune kenci ketsamtsam kenana kecu sena nda teu lalu, dede makaune nci kemakbe peseu pepui rünne teu lu. 3Nruine de ketsamtsam kenana kecu sena teu lu. Aiciu eh makaune nah nruine ketsamtsam de peu kideu ga ring eh hinghcu dai lu kerane. 4Cu gade lang senane cai I tingrui lang gaizie nah cide tingmui tingba ziee 40 ge rui zie, ciciu eh I tei kelu kaungih kengngih de nkap di kerane” debeu. 5Ge Noah Rampaube rang kebeu keheibe de tei lu.
6Kideube reu duinaii kegwang dau Noah mmi 600 di. 7#Mat. 24:38-39; Luk. 17:27.Pa nah pe nau, nah pe napei dung nah penui nau dung, duinaii mbai lu kerane liem ga nlüt lu. 8Makaune ketsamtsam pepui peseu nah nruine ketsamtsam pepui perie gege eh, nci nah nci kemak leune, 9Noah ze ngngwa liem ga nlüt lu, Tinggwang sam kaikebeu nzwa. 10Lang senane cai dui kehegak gwang.
11 #
2 Pe. 3:6. Noah mmi 600 dige, kei na bekei 17 benai kideu kang gade duilet leune letba degai, tingrui kikam dung pelane nkei gai, 12ciciu eh tingmui tingba ziee redai kideu ga tingrui mie. 13Cipau nai Noah penai pe nau nah penai na Shem, Ham, nah Japheth, nah penui nau dung ze ngngwa liem ga nlüt lu. 14Penui ze si eh makaune leu, kauruine nah renaam kaune, keceu kedi, nah nruine ketsamtsam leune lüt lu. 15Ring kela ketsamtsam pepui peseu gege Noah ze ngngwa liem ga lüt lu, 16Tinggwang sam kaikebeu nzwa. Pecai Rampaube Noah nlüt kedi cai kikambe nkui di.
17Duinaii ziee 40 ge bam di, nah dui be cuk di eh liem nlihm lalu buidi. 18Dui be cukki di, nah pe reu ga liem nlihm ladi. 19Cide cuk süt eh kideutuh hutube dung de gumpwa di; 20cide cuh reureu eh kideutuh kehu dung reu zumsau 25 swa hu di. 21Kideu ga kauring leune tsaidi nruine leu, makaune leu, nah mina leune. 22Kideu reu ngngih kela leune tsaidi. 23Rampaube kideu reu kaungih kengngih de nkap di mina, makaune, nah nruine dung. Kebangh bedung au Noah nah liem ga pecu ngngwa kela dung de rünne. 24Ziee 150 ge dui be cam miedi mene bam di.
Currently Selected:
KENDEU 7: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.