انجیل متی 21
21
عیسی شاهانه آمیین به اورشلیم
1وختی عیسی و چَه شاگرده اورشلیم شهره نزدیک آبنده، آرسسنده دِه بیت فاجی که زیتون کوک به. چاوش عیسی دو گِله اِشتن شاگردش بخِرسانِسنده، 2اَوان نه باتشه: «اَ دِهی که شاما پَرانِکه، بِشا. اَدَمی که شا دِه دِله، البحل، ایگله خری چَوه خره کره نه وینا که وا دِوَسه بییَنده. اَ دو گله آکرا و چِمن وَر بوَعرا. 3اَگم کسی شاما نه چی ای باتشه، باجا: ”خداوند اَوان لازم داره،“ و اَ اَلَبَحل اَوان خِرسانه.» 4اِم کار ببه تا اَ چیانی که پیغمبر، پیشگویش کرده به، بیبی، که واتش به:
5«اورشلیم نه، مقدسه کوه کیلی نه باجا،
”دییَس اِشته پادشاه فروتنی نه اِشته ور آمییر،
خره سرک دنشته آمییر،
خَره کره سرک دنشته آمییر.»
6اَ دو گله شاگرد بِشنده و اَجوره که عیسی دَستورش آدیه به بِکَردشانه. 7اَوان خر و خره کره شان بوعرده و اِشتن خَلوشان چوان سرک دِرنده و عیسی دنشته. 8پِره جماعتی نی اِشتن خَلوشان راه سرک جیکرده و علوده ای نی داره لاخه شان بِبِریه، راک جیکردشانه. 9جماعتی که عیسی پرانِنَه شییردنده و جماعتی که چَوه پَشدنه آمییردنده، جرنَه واتردشانه:
«نجات، داوود پادشا زا طرف نه آیه!
«مبارک اِسه اَ کسی که خداونده نامه نه آیه!
«نجات عرش برین نه آیه!»
10وختی عیسی اورشلیمه شهره دِلَه دِشِه، همه‌ی شهر شور و شوق دگسنده. مردمه آپرسَرده: «اِم کیه؟» 11اَ جماعت باتشانه: «اِم اَ عیسای پیغمبره، جلیلیه، ناصره مردمکه!»
عیسی معبده تمیز آکره
12اَ موقع عیسی بِشه معبده دله و همه‌ی کسانی که معبدک خرییردشانه و خورتردشانه، برکردشنده بر و صرافان میزش اَوگاردنسنده و کوتر خروشان بساطش هندیگر بیزی 13اَواننه باتشه: «اشعیا پیغمبره کتابک نیویشته بیه، ”چِمَن کیینه دعا کییه واجنده، “ امّا شاما اَوه ران ”دِزان لانه“ رچ آکرده.»
14معبدک، کوره و شَله عیسی وَر بامنده و عیسی اَوانش شفا آدا. 15ولی وختی سران کاهنان و توراته معلمین عیسی معجزاتشان بینده و ایزه نی بیندشانه خُوردنه معبدک بلند صصنه واترنده: «نجات، داووده پادشاه زا طرفنه، آیه» پِر عصبانی آبنده. 16اَوه عیسی نه باتشانه: «اَشنوسَری اِمه چِه واترنده؟» عیسی جواو بدا: «آها. مگم کتاب زبورک خواندران نی که،
«”خُوردنه و شِت آخَره خُوردنه نی اِشتن زواننه
اَوه ستایش کَرنده؟“»
17عیسی اَوش ول آکردنده و اَ شهرنه بشه. اَ بشه بِیت‌عَنْیا ده و شَوِه را اَگا بندَرس.
انجیله داره خشک آبیین
18تولیصِبحی زو وقتی عیسی آگَردِسرده اورشلیمه شهر، وَشیرش ببه. 19راه کِنارَک، اَنجیله داری بیندشه و بِشه چه طرفه را، اَما چی ای لیوه غیراز نیویندشه. پس دارِنه باتشه: «تِه دَ هرگز میوه موعَری!» البحل دارَه خشک آبییا. 20شاگرده وقتی اِمِشان بینده مات آبنده و باتشانه: «چنجوره اَنجیله دارَه البحل خُشک آبیا؟» 21عیسی جوابش بدا: «حقیقتا، شاما نه واجم، اَگم ایمان بدارا و شَک مَکرا، نه تَینا تانا اِم کاره بکرا، بَلکم حتی اگم اِم کوهِنه باجا ”اِنگاردِنَه برا و بِش دریاک دِگن،“ اِنجوره بی. 22اگم ایمان بِدارا، هر چی دعاک بگَرانه، اَرَگیرا.»
عیسی اقتداره دربارشان سوال آپرسس
23وقتی که عیسی معبده دِله دِشه و مردمش تعلیم بدا. هَ زمان، سران کاهنان و قومه یهود شیخان چَوه وَر بامنده و باتشانه: «کامین حقنه اِم کاره کردری؟ کی اِم حقش ته آدییَه؟» 24عیسی باته: «اَزین شاماک سوالی دارم. اگم جواوران آدا، از نی شامانه واجم کامین حَقه نه اِم کاران کَرم. 25کی یحییش حق دیه به تعمید بِدَیه خدا یا انسان؟» اَوان اِشتن وَر بحثشان بکه و باتشانه: «اگم باجام خدا طرفنه به، آمانه واجه، ”پس چیه را ایمانران ناوَرده؟ “ 26اگم باجام انسانه طرف نه به، جماعتک تَرسام، چون همه یحیی پیغمبر زاننده.» 27پس عیسی جواوشان آدا: «آما نِزانام.» عیسی باته: «اَز نی شاما نه نِواجم چِه حَقِیینه اِم کاران کَرم.
دو گله زا مثال
28«شاما نظر چیه؟ مردکی دو گِله زا داشتشه. اِشتن پیله زا وَر بِشه و باتشه: ”کوله، اُوری بِشه اَنگوره باغک کار بِکه. 29چوه زا باتشه: ”اَز نیشیم.“ امّا چاوش چوه نظر دِگردس و بِشه.“ 30په ویلیه زا وَر بِشه و اَوِنه نی هم لاوشه باتا. ویلیه زا باتشه: ”از شیم، آقا،“ امّا نِشه. 31کامین اَ دو گله زا اِشتن پییَر گوسشان انجام بداه؟» جواوشان بدا: «اوّلین زا» عیسی اَوانه باته: «حقیقتا، شاما نه واترم، باجگیران و فاحشه هان شاما پَران تر خدا پادشاهی دله دیشینده. 32چون یحیی بامه و درسته راش شاما آمانس امّا شاما اَوران ایمان ناوَرده، ولی باجگیران و فاحشه هان اَوشان ایمان بوعرده و شاما حتی با اِم که اِمِران بینده، هنی شاما نظرران عوض آنکه و اَوران ایمان ناوَرده.
شروره باغبانان مثال
33«علوده مثلی گوش آدَیا. ملک صاحابی به که اَنگوره باغش رَچ آکه و چَوه دویرَنه حصارش بِنا. اَ اَنگوره اُو کتنه را باغه دلک حوضی رَچش آکه و نگهبانی دینه را ایگله برجی وا رَچش آکه. چاوَش اَنگوره باغش چند گِله باغبانه اجاره آدا و اِشتن علوده مملکتی را سفر بکردشه. 34وختی محصوله اَکَتنه فصل آرَسس، اِشتن نوکَرش بخرسانسنده باغبانان وَر تا چَوه میوه اَرَگیرنده. 35امّا باغبانه چوه نوکرانشان بِکَتنده، ایگله شان بیزی و اَدَرینِشان بوکوشته و اَدرینشان سِگ دِدار بِکَه. 36هنی، باغه صاحاب اولین صَفَرک پِرتر، نوکرانی چَوان وَره را بِخِرسانسشه، امّا باغبانه اَ نوکران نه نی اَجوره رفتار بِکَرده، 37آخر سر اِشتن زاش باغبانان وَره را بِخِرسانس و اِشتنش باته: ”چِمن زا حرمته نیا دارِنده.“ 38امّا اَ زمانی که باغبانه چَوه زاشان بینده، هندیگرنه باتشانه: ”اَنگوره باغه وارث اِمه. بایا اَوه بوکوشام تا چَه ارث آما آرسه.“ 39پس اَ کوله شان بِکَته و اَنگوره باغنه بَرکرده، بوکوشتشانه. 40ایزه شاما نظرک، وقتی باغه صاحاب بایه اِم باغِبانانه چِه کَره؟» 41اَوان عیسی نه باته: «اَ شرور باغبانان بی رَحمینه کوشه و اَنگوره باغه علوده باغبانان اجاره آدَیه تا برداشته فصله را چَوه میوه سهمه آدَینده.»
42عیسی اَواننه باتشه: «مگم کتاب زبورک خواندران نی که،
«”هَ سِگی که بَنایان اَوشانه رَد بکردا و فِر آدایا،
اِسا بنو اصلیه سِگ بیا.
خداوند اِم کارش کَرده
و اِم چاما نظرک عجیبه“ ؟
43پس شاما نه واترم خدا پادشاهی شاماک اَرَکته بی، و قومی آدَیه بی که چَوه محصولک، خداونده سهمه اَوه آدیینده. 44اَ کسی که اِم سِگِه سر جیگنه، خُرد آبی، و اَگم اِم سِگَه کسی سر جیگنیه، اَوه فِرچ آکریه.»
45وختی سران کاهنان و فَریسیان عیسی مثالِشان بشنوس، بِزانسشانه که چوان درباره لاوَه کردر. 46پس راهی پشه بنده که عیسی بیگیرنده، امّا جماعتک ترسردنده چون اَوه عیسی شان ایگله پیغمبر زانسرده.
Currently Selected:
انجیل متی 21: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company