Mark 9
9
1Arô bulinyi yè waô inè: Rèti mi bulinya ṉwè inè, ar’awèwo gôre waô wi kum̃aṉa vèṉo wi re wi ze juwe, kaô w’ajeṉ’iṉongo ny’Anyambyè nyi bya ni ngulu.
2Ntyugu ôrôṽa pyagaṉa pa, Yesu awongi Pyère, ni Yakobu, ni Yôan, agèndya waô gô nômba ndôndwi, waô dadyè. N’agalwi edidi zè gw’azô maô; 3ingoy sè s’arweṉi kezôkezô, pupu pôlô, e zel’ôma gô ntye are ko jolye jombunya sô yeṉo. 4N’awôm̃unyi Eliya ni Môsès gôre waô, n’agambagi waô ni Yesu. 5Awiṉizi Pyère, awulinye Yesu inè: Ôṉènji, are mbya gôre zwè gô dwaṉa vèṉo; azwè ga nôge saka rarô, em̃ori gôre wè, n’em̃ori gôre Môsès, n’em̃ori gôr’Eliya. 6Konde e re mye nt’agambi yè, konde w’aryeṉi pôlô. 7Aṽyeṉi evindi aliṽiṉa waô, n’agogw’inyôy avila gw’evindi inè: Wiṉo n’ômwaṉi wam̃ wi tondô myè; yogiṉôṉi yè. 8N’azunge pôn’iṉèngi vingôvingô, ndô wi pa jeṉ’ôma kaô Yesu dadyè na waô.
9Gw’azum̃iṉi waô avila gô nômba, Yesu azômbyi waô inè, w’awuliny’ôma isam̃u y’ajeṉô waô, kaô Ômwaṉa w’ôma atôngwa avila gw’ijuwa. 10Avigi waô igamba mè, aṽambyaṉa inè, itôngwa avila gw’ijuwa ezom̃a nde?
11Aṽambyô yè n’iṉèngi yè inè: Ntiṉa nde yi buly’irèndisi inè, Eliya e ga lônge bye? 12N’awiṉizi yè waô inè: Rèti Eliya e be dônge bya, alwaṉiz’isam̃u yôdu. Ndô ntiṉa nde yi re tèndô pa g’ômwanja w’Ômwaṉa w’ôma inè, ayè ko sindiṉ’isam̃u imyenge ko yè pèdyô? 13Ndô mi bulinya ṉwè inè, Eliya abyeṉi, ndô wi re yè dendiṉa pa isam̃u yôdu nt’aṽeli waô, ga nt’are tèndô pa g’ômwanji wè.
14Gw’aṽyeṉi waô gôr’iṉèngi yè, w’ayeṉi aṉag’awenge pingwavingwa pa waô, n’irèndisi ndôṽage mpaga na waô. 15Ndô gw’azunge jeṉi aṉaga Yesu, w’am̃ami pôlô, n’avali waô mangô gô sanguṉè. 16N’aṽambyi yè iṉèngi yè inè: Ezom̃a nde z’adôṽaga ṉwè mpaga na waô? 17N’ôm̃ori gôr’aṉaga awiṉizi yè inè: Ôṉènji, mi bag’ômwaṉi wam̃ gôre wè, are n’iṉiṉa ny’im̃am̃u. 18Mbôry’edu yi kôtô yè ne nyô nyi pôsunyè gô ntye, agogw’ivuṉi agomb’anô nkègèrè, agènde ntyèla. My’agwen’iṉèngi yo inkolo gô tômb’iṉiṉa mè, ndô wi pa jolya. 19Yesu awulinyi waô inè: Èñ, ivôm̃a nyi r’ibekelya fo; ôlingô sèṉi wi be dwaṉa myè na ṉwè? Ôlingô sèṉi wi be sindiṉa myè ṉwè? Ṽagaṉi yè gôre myè. 20N’aṽagi waô yè gôre yè. Na gw’azunge jeṉi ômwaṉa Yesu, iṉiṉa ny’azunji yè pôlô; avôswi yè gô ntye, azambakala agogw’ivuṉi. 21N’aṽambyi Yesu rerè y’ômwaṉa inè: Ezom̃a ziṉo zi ga byeṉe yè atweṉi ôlingô sèṉi? Awiṉizi yè inè: avila gw’erumbe zè. 22Gômbe yenge iṉiṉa nyi re yè punga pa g’ôgôṉi na gw’aṉingô gô jôṉè. Ndô j’awè ko jolye dend’ezom̃a, yeṉa zwè ekèṽa, ko nunguṉa zwè. 23N’awulinyô yè ne Yesu inè: J’aw’ajolya! ... Isam̃u yôdu ko jolyô gôre yè yi bekelya. 24N’awôgiṉi rerè y’ômwaṉa pelè inè: Mi bekelya! Ṉunguṉ’itwaṽekelyi sam̃. 25Gw’ayeṉi Yesu aṉag’awenge wi bya ni mangô, azèmb’iṉiṉa ny’isèkè, awulinya nyô inè: Iṉiṉa ny’im̃am̃u ni mpôge, mi sômbyo inè, gogwa avila gôr’ômwaṉa wiṉo, ko arô jingiṉa nyèṉè gôre yè. 26N’agogwi nyô, awôgiṉa, azunjè ni ngulu mpôlô. N’arweṉi ômwaṉa g’ebende. Yeṉo awulyi awenge inè, ajuwi. 27Ndô Yesu agôti yè g’ôgo, aṉongunyè. N’agum̃aṉi yè gôre.
28Gw’ayingiṉi Yesu gô nagô, iṉèngi yè y’aṽambyi yè ntyorya inè: Ntiṉa nde yi re zwè e pa jolya gô tômb’iṉiṉa mènyoṉo? 29Awulinyi yè waô inè: Ôṉongo wiṉo w’ayolye kogwe kaô n’ikambiṉa.
30Alubwi waô avila vovo, avyagaṉa gô Galile. Ndô Yesu e pa bel’ôma gô mya yeṉo. 31Konde aṉènj’iṉèngi awulinya waô inè: Ômwaṉa w’ôma e be pô gw’ago m’aṉaga, ko waô jôṉè, n’ayè jôṉô pa ntyugu ntyarô pyagaṉa pa, gambèṉè e be tôngwa. 32Ndô iṉèngi yi pa kôtiz’igamba mè, n’aryeṉi waô gô tô bambyè.
33Aṽyeṉi waô gô Kapèrnaum. Na gw’avegagi yè gô nagô, Yesu aṽambyi waô inè: Ôsam̃u nde w’adôṽôgô ṉwè mpaga gô mpoṉo? 34Ndô w’alwaṉi dodo, konde gô mpoṉo w’alôṽaṉagi mpaga inè, ômpôlô gôre waô mande. 35N’alwaṉi yè baru, awey’igôm̃i n’aṽaṉi awulinya waô inè: Jog’ôm’edu abele dônga, gambèṉè e be dwaṉ’ôṉum̃uṉa wa waôdu ni nyôngô ya waôdu. 36N’awongi yè ômwaṉ’erumbe, alôṽyè gô garegare yaô, n’avaryè yè, awulinya waô inè: 37Ôm’edu e bong’ômwaṉ’erumbe ga wiṉo gw’ini nyam̃, e bonga myè; n’ôm’edu e bonga myè e pa bonga myè, ndô ayè y’arôm̃i myè.
38Awulinyô yè ne Yôan inè: Ôṉènji, azw’ayeṉi ôma e tômb’aṉiṉ’ambe gw’ini nyo, n’alegi zwè yè, konde e pa sônga zwè. 39Ndô Yesu awiṉizi nè, alegaṉi yè; konde e zel’ôma wi be dend’elemba gw’ini nyam̃, are ko sunge kamba myè mbe. 40Ayè yi re pa sira zwè e kaṉa zwè. 41Ôm’edu e be jonja ṉwè elasi z’aṉingô gw’ini nyam̃, konde aṉwè mongi wi Krist, rèti mi bulinya ṉwè inè, averiṉô n’ipi sè.
42Ndô, j’ôm’edu asogiz’ôm̃ori gôr’awangô wiṉo wi bekelya myè, are mbya gôre yè gô diryô idw’ivôlô nyi kiliṉ’imba g’ômpele wè, ko yè pungô gô mbeṉe.
43J’ôgo wo w’asogizo, zèra wô nkwe; are mbya gôre wè gô jingiṉa gw’em̃èṉo eṉèm̃a, vyagaṉô na gô dwaṉa n’ago ambaṉi, ko wè kènda gw’elôngô z’ôgôṉi, g’ôgôṉi wi re w’aṉim̃e du. 44[Gô r’ôgu waô w’ayuwe, n’ôgôṉi kè w’aṉim̃e du.] 45J’ôgôlô wo w’asogizo, zèra wô nkwe; are mbya gôre wè gô jingiṉa gw’em̃èṉo eṉèm̃a, vyagaṉô na gô dwaṉa n’agôlô ambaṉi awalô gw’elôngô z’ôgôṉi, g’ôgôṉi mè wi re w’aṉim̃e du. 46[Gô r’ôgu waô w’ayuwe, n’ôgôṉi kè w’aṉim̃e du.] 47Na j’intyo nyo ny’asogizo, rômba nyô, are mbya gôre wè gô jingiṉa gw’iṉongo ny’Anyambyè n’intyw’im̃ori, vyagaṉô na gô dwaṉa n’antyw’ambaṉi awalô gw’elôngô z’ôgôṉi, 48gô r’ôgu waô w’ayuwe, n’ôgôṉi kè w’aṉim̃e du. 49Konde ôm’edu e be kekizô n’ôgôṉi. 50Ezanga zi r’ezom̃’eṽya; ndô j’ezanga z’asambwa, aṉwè be tô sôgiza zô n’ande? Lwaṉaṉi n’ezanga gw’ikuṽi yaṉimè, ko dwaṉaṉi n’am̃ènjè aṉwè na ṉwè.
Currently Selected:
Mark 9: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.