Matay 20
20
1Konde iṉongo ny’ôrôṽa nyi r’egolaṉi g’ôṉivi wi nagô, agènd’ibanga sôdu gô pangaṉa n’aṉaga gô janja gô ntyagi yè y’igoli. 2N’ayè pangaṉa pa na mongi janja fura gô ntyugu, arôm̃i yè waô gô ntyagi yè y’igoli. 3N’agèndi yè vo igwèra ny’ararô ny’ôwenja; ayeṉi yè am̃ori wi kum̃aṉa gw’igôliṉô eṽilô fo. 4N’awulinyi yè waô inè: Gèndagaṉi kè gô ntyagi yam̃ y’igoli; mi be pa ṉwè nt’are kwèkwè gôre ṉwè gô pô. N’agèndi waô. 5N’arô kèndi yè vo igwèra ny’ôrôṽa na vo igwèra ny’ eṉôgôm̃i, alend’ egolaṉi mèmô. 6N’agèndi yè vo igôm̃i ny’agwèra n’igwèr’im̃ori, aliṽiny’am̃ori nkum̃aṉaga gw’igôliṉô, n’awulinyi yè waô inè: Ntiṉa nde yi kum̃aṉa ṉwè ôwenja wôdu vèṉo eṽilô fo? 7N’awiṉizi waô yè inè: Konde e zel’ôma re pangaṉa pa na zwè. Awulinyi yè waô inè: Gèndagaṉi kè gô ntyagi yam̃. 8Nkôlô, ôṉivi wi ntyaga awulinyi nyôngô yè inè: Weye mongi wi janja, ko pa waô ipi saô, mpakilyaga gôr’aṉum̃uṉa agènda gôr’alônga. 9N’aṽyeṉi waô w’avakilyi gô janja igôm̃i ny’agwèra n’igwèr’im̃ori, n’avenyô waô ôm’edu fura. 10N’aṽyeṉ’alônga, mpikilyaga inè, wi be pô vyagaṉô; ndô w’avenyô kè ôm’edu fura. 11Gw’avenyô waô w’alagalagi gôr’ôṉivi wi nagô, awulya inè: 12Aṉum̃uṉa wiṉo w’ajanja kaô igwèr’im̃ori dadyè, kô wè panga waô egolaṉi ga zwè, yi re sindiṉa p’irwaṉô ny’ôwenja ni mpyô y’ôwenja. 13Ndô awiṉizi awuliny’ôm̃ori gôre waô inè: Ndeg’wam̃, mi pa dendiṉo mbe; ô pa pangaṉa na myè fura? 14Wong’iyo, ko kèndaga. Mi bela gô p’ôṉum̃uṉa wiṉo ga wè. 15E zele kwèkwè gôre myè gô denda ni yom̃i yam̃imè ga nte tonda myè? Ge intyo nyo nyi r’iṽe konde my’ar’ômbya? 16Yeṉo aṉum̃uṉa wi be dônga, n’alônga wi be num̃uṉa.
17Gw’avandagi Yesu gô Yerusalèm, awongi yè igôm̃i ny’iṉèngi n’iṉèngi mbaṉi g’ôzamba, n’awulinyi yè waô gô mpoṉo inè: 18Vônaṉi, azwè panda gô Yerusalèm, n’Ômwaṉa w’ôma e be nozô gôr’imiṉisè impôlô n’irèndisi. 19Wi be pè ôgara w’ijuwa, anozè gôr’aṉongo, ko waô sèlyè, aziṽè n’impava, aṽanyè gô krosi; ndô e be tôngwa gô ntyugu yi ntyarô.
20Vovo aṽyeṉi ngwè y’awaṉa wi Zebeday gôre Yesu, azaviṉè, aṽambyè ndaga. 21N’awulinyè yè inè: Ô bel’ande? Awulinyè yè inè: Zômbya nè, awaṉi wam̃ wiṉo aṽaṉi wi ga lwaṉe baru gw’iṉongo nyo, ôm̃ori g’ôgo wo ôṉôm̃yè n’ôm̃ori g’ôgo wo ônyantwè. 22Ndô Yesu awiṉizi nè: Aṉwè pa mya nte bambya ṉwè. Aṉwè ko jolya gô jong’imogi nyi be jongô myè? Awulyi waô inè: Azwè ko jolya. 23N’awulinyi yè waô inè: Rèti, aṉwè be jong’imogi nyam̃, ndô gô dwaṉa baru g’ôgo wam̃ ôṉôm̃yè na g’ôgo wam̃ ônyantwè, arang’iyam̃ gô pa, ndô yi be pô gôre waô w’arangiṉô yô ne Reri yam̃. 24Ndô gw’ayogyô igôm̃i ny’iṉèngi yeṉo, w’aṽendiṉi awareri yaô aṽaṉi. 25N’aweyô waô ne Yesu, awulya inè: Aṉw’avôrô inè, ivangiṉi y’aṉongo yi pangiṉa waô, n’avôlô wi bong’anyanga gôre waô. 26E ze dwaṉe yeṉo gôre ṉwè. Ndô ôm’edu e bele dwaṉ’ôm’ômpôlô gôre ṉwè, e ga lwaṉe nyôngô yaṉi; 27n’ôm’edu e bela gô dwaṉa gw’ewônjô gôre ṉwè, e ga lwaṉ’ôsaki waṉi. 28Yeṉo r’Ômwaṉa w’ôma; e re bye gô janjiṉô, ndô gô janjiṉa na gô p’em̃èṉo zè ôraṽô gôr’awenge.
29Gw’alubwi waô avila gô Yerikô, Yesu azôngyô n’aṉag’awenge. 30Na vôna, apoku ambaṉi m’avegagi baru g’ôzamba wi mpoṉo, gw’ayogyô mô inè, Yesu e pyagaṉa, m’alagiṉi yè inè: Vôgiṉa zwè, Rera, ômwaṉa wi David! 31N’alegyô waô n’aṉaga iṉè, wi ga lwaṉe dodo; ndô w’arôngi vyagaṉô inè: Vôgiṉa zwè, Rera, ômwaṉa wi David! 32N’agum̃aṉi Yesu gôre, aweya waô, awulya inè: Aṉwè bela myè gô dendiṉa ṉwè ande? 33Awulinyi waô yè inè: Rera, antyo mazô mi ga ṉunguṉô. 34N’avôgiṉô waô ne Yesu, awat’antyo maô; n’azunge nungwi antyo maô, n’azôngi waô yè.
Currently Selected:
Matay 20: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.