Matay 19
19
1Arweṉi nè gw’amazi Yesu agamba miṉo alubwi avila gô Galile, agènda gô ntye yi Yuda, gô ntye mori yi Yoridan. 2N’azôngyô yè n’aṉag’awenge, n’ayingi yè waô vovo.
3N’aṽyeṉ’ifarisi gôre yè gô dembè, awulya inè: Are kwèkwè gôr’ôma gô tômb’ômwantô wè gô ndagi edu? 4Awiṉizi yè inè: Aṉwè pa tanguṉa inè, ôvangi avangi, avila gw’ipakilya, ôṉôm̃e n’ômwantô, awulya inè: 5Yeṉo, ôṉôm̃e e ga rige reri yè ni ngi yè, ko yè jôngô gôr’ômwantô wè, ko waô aṽaṉi dwaṉ’ôzôṉ’ôm̃ô? 6Yeṉo wi zel’aṽaṉi nyèṉè, ndô ôzôṉ’ôm̃ô. Sambô ezom̃a zi r’Anyambyè jônga pa, z’aṽangunyô n’ôma. 7W’awulinyi yè inè: Sambô Môsès azômbyi gô p’ezangô z’itômba gô tômb’ômwantô sè? 8Awiṉizi yè waô inè: G’ômwanja wi njoliṉi y’irèm̃i yaṉi ayiviri Môsès inè, aṉwè ga rômb’antu waṉi; ndô e re pegege yeṉo avila gw’ipakilya 9Ndô mi bulinya ṉwè inè: Ôm’edu e tômb’ômwantô wè, kaô gô ntiṉa y’ôṽelaṉô, ko yè jômb’ômwèṉè, gambèṉè e dèwa na wi ngaṉi, n’ayè yi jômb’ômwantô are tômbô pa e dèwa kè na wi ngaṉi.
10Awulinyô yè n’iṉèngi yè inè: J’adwaṉa yeṉo gôr’ôṉôm̃e n’ômwantô wè, gambèṉè e zele mbya gô jômba. 11Awiṉizi yè waô inè: Aṉaga waôdu wi re kôtiz’igamba nyiṉo, ndô kaô waô wi re pô pa nyô. 12Konde ar’ivanguṉe y’ayanyô yeṉo avila gw’ambum̃u m’angi saô; ar’ivanguṉe kè y’avangunyô n’aṉaga; ar’ivanguṉe kè y’avanguny’ikuṽi yaômè g’ômwanja w’iṉongo ny’ôrôṽa. Ôma re ko jolye kôtiz’igamba mè, e ga gôtize nyô.
13Vovo aṽagyô awaṉa gôre yè inè, e ga ralye waô ago mè, ko yè kambiṉa g’ômwanji waô. Ndô iṉèngi y’alegi waô. 14N’awulyi Yesu inè: Yiviraṉi awaṉa, ko alegaṉi waô bya gôre myè, konde iṉongo ny’ôrôṽa nyi re gôre waô wi r’egolaṉi ga waô. 15N’aralyi yè waô ago, n’alubwi yè avila vovo.
16Na vôna, aṽyeṉ’ôma awulinye Yesu inè: Ôṉènji, ezom̃a nde eṽya zi be dendô myè, ko mi dèng’em̃èṉo za koṉako? 17N’awiṉizè yè inè: Ntiṉa nde yi bambyo myè g’ômwanja w’ezom̃a zi r’eṽya? Ar’ôm̃ori ar’ômbya. J’aw’abela gô jingiṉa gw’em̃èṉo, venjavenj’ampanga. 18Awulinyè yè inè: Ampanga meṉi? N’awiṉizi Yesu inè: Ayôṉ’ôma; alèwa na wi ngaṉi; ayufa; aṽèrinya; lube reri yo ni ngi yo; 19ko tond’ôrangaṉô wo g’ôkuṽi womè. 20N’awulinyô yè n’iwanjo inè: Agamba miṉo môdu mi re mô penjavenja pa; ezom̃a nde zi pe butô myè? 21N’awulinyô yè ne Yesu inè: J’aw’abele dwaṉa keka pa, ge kôle yom̃a yi re na wè, ava yô gôr’ikuge, gambèṉè ô be dwaṉa n’igumba g’ôrôṽa. Avila vovo ko bya azônga myè. 22Ndô gw’ayogyô iwanjo agamba miṉo, agèndi yè gèṽagèṽa, konde avegagi n’igumb’inyenge. 23N’awulinyi Yesu iṉèngi yè inè: Rèti, mi bulinya ṉwè inè, eṉam̃i zi be dwaṉe jola gô jingiṉa gw’iṉongo ny’ôrôṽa. 24Mi tô bulinya ṉwè inè: Re dèla gôre kamèli gô solya gw’igola nyi ntômbô, vyagaṉô na gôr’eṉam̃i gô jingiṉa gw’iṉongo ny’Anyambyè. 25Na gw’ayogyô iṉèngi yeṉo, w’am̃ami pôlô, awulya inè: Sambô, mande re ko jolye sungiṉô? 26N’avônyô waô ne Yesu, awulinya waô inè: Igamba nyiṉo gôr’aṉaga ny’ayolyô, ndô gôr’ Anyambyè isam̃u yôdu ko jolyô.
27Vovo awiṉizi Pyère, awulinyè inè: Vôna, azw’are tiga pe yom̃a yôdu azôngo; sambô ezom̃a nde zi be dwaṉa gôre zwè? 28N’awulinyô waô ne Yesu inè: Rèti, mi bulinya ṉwè inè, aṉwè yi re sônga pa myè, gô be tô pangô yom̃a yoṉa, gô be dwaṉ’ Ômwaṉa w’ôma baru gw’eka z’ivendi nyè, aṉwè kè aṉwè be dwaṉa baru gw’igôm̃i nyi ka ni ka ṽaṉi, ko ṉwè jèkèlya igôm̃i ny’imbuṽe ni mbuṽe mbaṉi s’Israèl. 29N’ôm’edu are tiga p’awôngi yè aṉôm̃e, ge yombi yè, ge reri yè, ge ngi yè, ge ômwantô wè, ge awaṉi wè, ge intyagi sè, ge inagô sè g’ômwanja w’ini nyam̃, e be pô nkam̃a y’inyongo, ko yè niv’em̃èṉo z’egômbe zôdu. 30Alông’awenge wi be num̃uṉa, n’aṉum̃uṉa wi be dônga.
Currently Selected:
Matay 19: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.