ၸႃႇၶရီႉ 5
5
ရူႇပႃႇရူင်ႇလူၺ်ႈလွင်ႈၵဵၼ်လိၵ်ႈမိၼ်
1လႆႈသမ်ႉ ၵဝ်ဢဝ်တႃၵဝ် ႁႅၼ်တူၺ်းလႄႈ ႁၼ်ၽိုၼ်လိၵ်ႈ ဢၼ်မိၼ်ဢႅၼ်ႇယူႇၼၼ်ႉဢေႃႈ။- 2မၼ်းၼၼ်ႉ ထၢမ်တီႈၵဝ်လႄႈဝႃႈ၊ မႂ်းႁၼ်ၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊ ၵဝ်လဝ်ႊလၢတ်ႈလႄႈဝႃႈ၊ ၵဝ်ၶႃႈႁၼ်ၽိုၼ်လိၵ်ႈ ဢၼ်မိၼ်ဢႅၼ်ႇယူႇၶႃႈဢေႃႈ။ ၼႃႈယၢဝ်းမၼ်း မီးသၢဝ်းသွၵ်ႇ၊ ၼႃႈပွတ်းမၼ်း မီးသိပ်းသွၵ်ႇၶႃႈဢေႃႈ၊ ဝႃႈၼင်ႇၼႆဢေႃႈ။- 3မၼ်းၼၼ်ႉၵေႃႈ လၢတ်ႈတီႈၵဝ်လႄႈဝႃႈ၊ ဢၼ်ၼၼ်ႉ ပဵၼ်တၢင်းၵိၼ်ႇတၢင်းဝႃႈ ဢၼ်ၸွတ်ႇတူဝ်ႈၵႂႃႇ ၵႃႈၼႂ်းမိူင်းတင်းမိူင်းဢေႃႈ။ ၶဝ်ၸိူဝ်းဢၼ် ၸၢင်ႈလၵ်ႉၸၢင်ႈလိူတ်ႈၵႃႈမီးၼၼ်ႉ တၵ်းလႆႈၶၢမ်ႇတၢင်းဢၼ် ပႄႇၽဵဝ်ႈပႅတ်ႈ ၸွမ်းၵႃႈၼင်ႇဢၼ် ပႃးၵႃႈၼႂ်းၽိုၼ်လိၵ်ႈၼၼ်ႉ ၽၢႆႇၼိုင်ႈ ၼၼ်ႉဢေႃႈ။ ၶဝ်ၸိူဝ်းဢၼ် ႁဵတ်းတၢင်းဢၼ်ၵိၼ်ႇဢၼ်ဝႃႈ ၵႃႈမီးၼၼ်ႉ တၵ်းလႆႈၶၢမ်ႇတၢင်းဢၼ် ပႄႇၽဵဝ်ႈပႅတ်ႈ ၸွမ်းၵႃႈၼင်ႇဢၼ် ပႃးၵႃႈၼႂ်းၽိုၼ်လိၵ်ႈၼၼ်ႉ ၽၢႆႇၼိုင်ႈ ၼၼ်ႉဢေႃႈ။- 4ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းဢဝ်ၽိုၼ်လိၵ်ႈၼၼ်ႉဢွၵ်ႇ၊ မၼ်းတၵ်းၶဝ်ႈၵႂႃႇၵႃႈၼႂ်း ႁိူၼ်းၵေႃႉဢၼ်ၸၢင်ႈလၵ်ႉၸၢင်ႈလိူတ်ႈၼၼ်ႉ ဢိၵ်ႇတင်း ၵႃႈၼႂ်းႁိူၼ်းၵေႃႉဢၼ် ဢဝ်ၼႃႇမႃႉၸိုဝ်ႈသဵင်ၵဝ် ႁဵတ်းတၢင်းဢၼ်ၵိၼ်ႇဢၼ်ဝႃႈ ဢၼ်ဢမ်ႇၸိုဝ်ႈ၊ဢမ်ႇၸႂ်ႈ ၼၼ်ႉသေလႄႈ ၵိၼ်ႁိူၼ်းၼၼ်ႉ ဢိၵ်ႇလူၺ်ႈၵၼ်တင်းမႆႉၸိင်မၼ်း တင်းမၢၵ်ႇႁိၼ်မၼ်း ၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
ရူႇပႃႇရူင်ႇလူၺ်ႈလွင်ႈမႄႈယိင်းဢၼ်ၼင်ႈၼႂ်းဢေးၽႃႇ
5လႆႈသမ်ႉ တမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ်ၼၼ်ႉ ဢွၵ်ႇသေလႄႈ လၢတ်ႈတီႈၵဝ်လႄႈဝႃႈ၊ မိူဝ်ႈလဵဝ်ၼႆႉ ဢဝ်တႃမႂ်းႁႅၼ်တူၺ်း လွင်ႈတၢင်းဢၼ်ဢွၵ်ႇၼႆႉတႃႉ၊ ဝႃႈၼင်ႇၼႆသေယဝ်ႉ၊- 6ၵဝ်ထၢမ်လႄႈဝႃႈ၊ ဢၼ်ၼၼ်ႉၸမ်ႉ ပဵၼ်ၵႃႈသင်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၼၼ်ႉ လၢတ်ႈလႄႈဝႃႈ၊ ဢၼ်ၼၼ်ႉ ပဵၼ်ဢေးၽႃႇ ဢၼ်ဢွၵ်ႇမႃးဢေႃႈ၊ ဝႃႈၼင်ႇၼႆသေယဝ်ႉ၊ သမ်ႉလၢတ်ႈထႅင်ႈလႄႈဝႃႈ၊ ဢၼ်ၼႆႉပဵၼ်ပုင်ႇႁၢင်ႈၶဝ် ၵႃႈၼႂ်းမိူင်းတင်းမိူင်းဢေႃႈ၊ ဝႃႈၼင်ႇၼႆဢေႃႈ။- 7ၵဝ်သမ်ႉႁၼ်ၶႅပ်းၸိုၼ်း ဢၼ်မူၼ်းဝႆႉလႄႈ မီးတလၢၼ်ႇတၢၼ်ႇၼိုင်ႈၼၼ်ႉ ယွင်ႈၶိုၼ်ႈၵႂႃႇၵႃႈၼိူဝ်လႄႈ မႄႈယိင်းၵေႃႉၼိုင်ႈ ၼင်ႈယူႇၵႃႈၼႂ်းၵၢင်ၵွၵ်းဢေးၽႃႇၼၼ်ႉဢေႃႈ။- 8မၼ်းလၢတ်ႈလႄႈဝႃႈ၊ မႄႈယိင်းၼႆႉ ပဵၼ်တူႉၸရိူၵ်ႈဢပႅတ်ႈဢေႃႈ၊ ဝႃႈၼင်ႇၼႆသေလႄႈ ဢဝ်မၼ်းၼၼ်ႉ ၶျႃးသႂ်ႇဝႆႉ ၵႃႈၼႂ်းၵၢင်ဢေးၽႃႇၼၼ်ႉလႄႈ ဢဝ်ၶႅပ်းၸိုၼ်းၼၼ်ႉ တၢင်ႇႁူမ်ႇသႂ်ႇဝႆႉ ၵႃႈၼိူဝ်ပၢၵ်ႇဢေးၽႃႇၼၼ်ႉဢေႃႈ။- 9လႆႈသမ်ႉ ၵဝ်ဢဝ်တႃၵဝ် ႁႅၼ်တူၺ်းလႄႈ ႁၼ်မႄႈယိင်းသွင်ၵေႃႉ ဢွၵ်ႇမႃးလႄႈ မီးလူမ်းၵႃႈၼႂ်းပိၵ်ႇၶဝ်ယူႇ သေလႄႈ ပိၵ်ႇၶဝ်ၼၼ်ႉ မိူၼ်ၸိူဝ်ႉၼင်ႇ ပိၵ်ႇၼူၵ်ႉၵွၼ်ႇၼၼ်ႉ ဝႆႉလႄႈ သွင်ၶႃၼၼ်ႉ ဢွၼ်ၵၼ်ဢုမ်ႈႁွပ်ႇဢဝ် ဢေးၽႃႇၼၼ်ႉ ၶိုၼ်ႈၵႂႃႇၵႃႈၼႂ်း ၵႄႈဝူင်ႈၵၢင်လိၼ်မိူင်း တင်းၽႃႉၵၢင်ႁၢဝ်ဢေႃႈ။- 10ၵဝ်ထၢမ်တီႈတမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊ သွင်ၶႃၼၼ်ႉ ဢွၼ်ၵၼ်ဢုမ်ႈႁွပ်ႇဢဝ် ဢေးၽႃႇၼၼ်ႉ ၵႂႃႇၵႃႈတီႈလႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 11မၼ်းၵေႃႈ လၢတ်ႈတီႈၵဝ်လႄႈဝႃႈ၊ သွင်ၶႃၼၼ်ႉ ဢွၼ်ၵၼ်ႁွပ်ႇဢဝ်ၵႂႃႇ ႁႂ်ႈလႆႈႁဵတ်းႁိူၼ်း ပုၼ်ႈမၼ်းၵႃႈၼႂ်းမိူင်းသီႉၼႃႉပုၼ်ႉဢေႃႈ။ မိူဝ်ႈဢၼ် တႄႇႁဵတ်းႁိူၼ်းၼၼ်ႉ ယဝ်ႉၼၼ်ႉၸိုင်၊ တၵ်းလႆႈဢဝ်မႄႈယိင်းၼၼ်ႉ ၶျႃးတီႈယူႇဝႆႉ ၵႃႈၼိူဝ်ၶူင်ႇမၼ်းဢေႃႈ၊ ဝႃႈၼင်ႇၼႆဢေႃႈ။
Currently Selected:
ၸႃႇၶရီႉ 5: CBMS
Highlight
Share
ਕਾਪੀ।
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship