Ruut 4
4
BOOQAS RUUT ABITEH
1Booqas magaalah culmal daffeyna elle aban arac gexeeh, wokkel daffee. Too waqdi Alimelekik xayi ramadah yan numuy Booqas edde yaabeh sugehiyya wokke yemeete. Booqas kaa yuble waqdi, «Annah amey akkel daffey» kaak iyye. Too waqdi woo num yemeeteh wokkel daffee. 2Sarrak Booqas magaalah idoolah yan tabna numuh kaadu seeceeh, «Akkel daffeya» iyyeeh; too waqdi woo mari kaadu wokkel daffee. 3Tohuk lakal woo numuk iyyeemih, «Noqmi away Mooyab rasuk tuduureeh, neh ramad luk yen Alimelek baaxo taylammem faxxaah; 4atu wohim taaxigem faxxintam yot celta. Hay tonnal, faxxek, a maray akkel daffeyah yanihiyyah foocal xaamitaay, faxe waytek kaadu, ken foocal ‹Mafaxa› inxic. Macaay intek, a baaxo xaamaanamih cakki naharat elle yamaatem kooy; ku lakal elle yamaatem yoo» kaak iyye.
Woo num woo waqdi, «Meqeh hay, anu xaameyyo» kaak iyye.
5Too waqdi Booqas kaak iyyeemih, «Nabam meqe hay. Noqmik woo baaxo xaamta waqdi, baaxo Alimelek-buxah-mari akah nagra innah, Ruutuy gubnah tanihiyya kaadu cigissam kol tan. Tonnal rabe numih ikoyta kee migaq baye kaletto» kaak iyye.
6Too waqdi woo num, «Nagra yi xaylol akak amaate waytek, wonnalaay, atu xaamite waytek, anu a baaxoh limok raaqah an» kaak iyye.
7Too dabaanal duyye aylammee kee duyye-duyyet milaage yakken waqdi, aylammee kee milaage yakke num ibak kabella eyyeqqa heeh xaama numul yeceem, Israayil marih qaadah luk yen. Too kabella yeyyeeqeenik wadir, caagid gaba kalem elle aaxaguk yenen.
8Tonnal woo num Booqasak, «Atu xaamit» iyyeeh, ibak kabella eyyeqqa heeh, Booqasal yecee.
9Too waqdi Booqas magaalah idoola kee wokkel suggu 'ye marak inkih iyyeemih, «A saaku Alimelek kee kay xayloy Kilyon kee Maclon deqsitte, luk sugga 'tem inkih Noqmi-gabak xaamaamih sumaq siini. 10Toh lih kaadu Ruutuy Mooyabah toobokeeh Maclon abbaxuk suge yi barra tekkeeh; yi lakal aham Alimelek buxah mari nagrele. Kay buxah mari kay nagrak mayawqa. Tohul ta saaku sumaaqah tanim siini» iyye.
11Tokkel sugte magaalah idoola kee raqqa 'ye mari inkih iyyeemih, «Nanu a saaku tekkeemih sumaq kinninoh. Digibte barra, Raacel kee Liyay Israayil ummatta akak raddehiyya innah YALLI tet abay. Efrata-gulubuk inkih gaddali koo abay; Beetlacam magaalal kaadu migaq-gexxo le num koo abay. 12A barrat YALLI koh yecee xaylo, Yuuda kee Tamaari fanak yooboke Fares deqsita numih xaylo tekkem yakkoonay» axcuk dooqa kaah aben.
13Tohuk lakal Booqas, Ruut abiteh buxah tet bee. YALLI bagut baxa teetik heeh, lab baxa kaah xalte. 14Too waqdi agbi Noqmik annah iyye. «YALLA fayla taafay! A saaku YALLI amo akak wagitta lab-baxa koh yecee. Yooboke awki Israayil rasul migaq-gexxo le num yakkay. 15Ruut koo kicnaah, malcina lab-baxi xiqaamak fula koh xiqte. Away absuma koh bahteeh; a absumi idoolinnal ruffu koo heeleeh, qande kot heele» teetik iyyen.
16Noqmi yooboke awka tukkuqeh, gurumbal isik hayya hayteeh, amo kaak wagitte. 17Cuggaaneh agbi inkih, «Noqmih lab-baxi yooboke» iyyen.
Yooboke awkak migaaqah Yoobad iyyen. Yoobad Yiisa xale; Yiisa kaadu Malik Dawud xale.
FARESIK RADE MARIH SAMAD ELLE YANIM ANNA
18-22Fares, Cesram xaleeh, Cesramaay Raam xale. Raam Qamnadab xaleeh, Qamnadab Nacson xale. Nacson Salmon xaleeh, Salmon Booqas xaleeh, Booqas Yoobad xaleeh, Yoobad Yiisa xaleeh, Yiisa Dawud xale.
Currently Selected:
Ruut 4: NKM
Highlight
Share
ਕਾਪੀ।
Want to have your highlights saved across all your devices? Sign up or sign in