Izikiẹl 29
29
Aroẹmrẹ Kpahe Ijipt
1Vwẹ ukpe rihwe, vwẹ emeranvwe rihwe, vwẹ ẹdẹ rihwivẹ rẹ emeranvwe na, ota rẹ Ọrovwohwo de bru vwe rhe: 2Ọmọ rẹ ohwo tọn opharo wẹn vi Fẹro ovie rẹ Ijipt, ru wọ mraro kpahọ vẹ Ijipt ejobi;
3ta ota, re wọ ta, E nẹ Ọrovwohwo Ọghẹnẹ tare:
Nighere, Me vwọ so wẹ,
Fẹro ovie rẹ Ijipt,
okpodjerivwi ro figberi
uherevie rẹ urhie rọye,
rọ tanẹ, Nile mẹ na ọ robọ mẹ;
mẹvwẹ re marọ.
4Me vwẹ oghọre sa ohwa wẹn,
ki mi ru iyeri rẹ ivwori wẹn re jephihọ esẹn wẹn;
ki mi kpono uwe nẹ uherevie rẹ ivwori wẹn na,
vẹ iyeri rẹ ivwori wẹn na ejobi
re jephihọ esẹn wẹn.
5Ke me kpare owẹ phihọ evun rẹ aghwa
te owẹ te iyeri re ivwori wẹn,
ku we she phihọ uphephẹ ghwroro,
a rha ghwẹ ovwan koko-o siẹvo kẹ esho-o.
Me vwẹ ovwan ru emuọre
kẹ eranvwe rẹ aghwa ta emephran rẹ enu.
6Etiyin ihwo re dia Ijipt ejobi ke cha riẹn nẹ mẹvwẹ Ọrovwohwo na. Fikiridie wọ epha kerẹ ọkpọ rẹ eyareya kẹ uwevwi rẹ Izrẹl. 7Ọke re ayen da vwẹ obọ ghane owẹ, wo mi vwirho, wọ me bere igabọ rayen; ọke rẹ ayen da vwẹ oma rẹro owẹ, wo mi vwirho, rere wo ru ehun rayen vwo nẹ ẹdia, 8fiki rẹ ọtiọye na enẹ Ọrovwohwo Ọghẹne tare: Nighe, Me cha vwẹ ọlọkọ bru we rhe, kọ cha nyavwe ohwo vẹ eranvwe nẹ uwe, 9otọ rẹ Ijipt ka cha kua fiọtọ ko hirhe phihọ erhurhu. Etiyin ayen ke riẹn nẹ mẹvwẹ Ọrovwohwo.
Fikiridie wọ tare, Nile ọ mẹ, mẹvwẹ re marọ, 10fiki rẹ ọtiọye na, nighere, ki mi mu kpahe owẹ, mi ji mu kpahe irhie wẹn, ki mi ru otọ rẹ Ijipt vwọ hirhe phihọ asan ra kua nu vẹ erhurhu diodi, nẹ Migdol re te Siyene, rhiri re te ughwru rẹ Itiopia. 11Owọ re ohwo gbi se chiyo wa-an, owọ rẹ eranvwe ji se chiyọ wa-an, ikpe ujuvẹ soso a rha mrẹ ohwo ro yere asan na-a. 12Ke me kua otọ rẹ Ijipt fiotọ vwẹ uherevie rẹ irere ra kua fiotọ na ejobi; irere rọye ka kua fiotọ ikpe ujuvẹ soso vwẹ ohri rẹ irere ra kua fiotọ na. Me hra ihwo rẹ Ijipt na ro ohri rẹ ẹgborho na, ka hra ayen nene ohri rẹ irho na ejobi.
13Kidie e nẹ Ọrovwohwo Ọghẹnẹ tare: Vwẹ oba rẹ ikpe ujuvẹ na ki nu si ihwo rẹ Ijipt na ejobi koko nẹ ohri rẹ ihwo ra hra ayen ra na; 14ke me rhoma vwẹ efe rẹ Ijipt rhivwi rhe, ke me vwẹ ayen rhivwi kpo otọ ri Patrọs, otọ rẹ ayen nurhe, kẹ etiyin ayen da dia uvie rẹ ayen kpoghono vwẹ akpọ na, 15o gbi mu oma rọye kpenu nọ ẹgborho ọfa-a, ki mi ru ayen hahavwe gangan re ayen de je ẹgborho ọfa esuo bẹdẹ. 16Ihwo rẹ Izrẹl gbe vwẹ ẹro suọ ọfa bẹdẹ-ẹ, re ayen da karohọ orukuruku rayen, rẹ ayen da dje bru ayen ra nẹ ọ cha ayen uko. Etiyin ayen ke riẹn nẹ mẹvwẹ Ọrovwohwo Ọghẹnẹ na.
17Vwẹ ukpe ruje gbẹ ighwrẹ, vwẹ emeranvwe rẹsosuọ, vwẹ ẹdẹ rẹ ẹsosuọ rẹ emeranvwe na, ota rẹ Ọrovwohwo de bru vwe rhe: 18Ọmọ rẹ ohwo, Nebukadreza ovie rẹ Babilọn da nẹrhẹ unuofovwi rọye wian owian gangan kpahe Taya, kuyovwi kuyovwi ejobi de gbe akpan kigabọ kigabọ ejobi da kpen bobobo, yẹ ekpuyovwi rọye eyẹ unuofovwi rọye mrẹ emu ọvuọvo mie Taya ro te vwọ hwa osa rẹ owian rẹ ayen wianre fiki rọye-e. 19Fiki rẹ ọtiọye na e nẹ Ọrovwohwo Ọghẹnẹ tare Nighere, Me cha vwẹ otọ rẹ Ijipt vwọ kẹ Nebukadreza ovie ri Babilọn, kọ ghwẹ efe rọye ejobi kpo o mi miovwo ọ me kua reyọ; kọye re cha dia osa vwọ kẹ unuofọvwi rọye. 20Me vwẹ otọ rẹ Ijipt vwọ kpẹvwẹ ẹse kẹ wẹ kidie wọ wian phihọ, fikiridie ayen wian kẹ vwẹ, eriyin Ọrovwohwo Ọghẹnẹ tare. 21Vwẹ ẹdẹ yena ki mi ruo re ighoro da wan nẹ uwevwi rẹ Izrẹl rhe, ki mi rhie unu wẹn vwẹ ohri rẹ ayen. Etiyin ayen ke riẹn nẹ mẹvwẹ Ọrovwohwo na.
Currently Selected:
Izikiẹl 29: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.