Izikiẹl 28
28
Aroẹmrẹ Kpahe Ovie ri Taya
1Ota rẹ Ọrovwohwo de bru vwe rhe. 2Ọmọ rẹ ohwo, ta kẹ osun rẹ Taya, E nẹ Ọrovwohwo Ọghẹnẹ tare:
Fikiridie udu wẹn herẹ,
wọ da rha tanẹ, mẹvwẹ ọghẹnẹ,
mi tidia agbara rẹ eghẹnẹ na,
vwẹ uherevie rẹ abadi,
yẹ ohwo wo ruẹ, wọ dia Ọghẹnẹ-ẹ,
owene wo dje oma wẹn ghwanghwanre kerẹ oghẹnẹ–
3wo ghene ghwanre nọ Daniẹl;
o vwo emu ọvuọvo rọ djahe kẹ wẹ-ẹ,
4vwẹ oma rẹ aghwanre wẹn vẹ erianriẹn wẹn
ọye wo vwo vwo efe kẹ oma wẹn;
wo de koko oro ve idọnọ efuafon
phihọ uwevwi rẹ efe wẹn.
5Vwẹ ẹghwanre rode wọ vwọ chueki na
ọye efe wẹn vwo bu na,
udu wẹn da rhe vọn vẹ eheri fiki rẹ efe wẹn na–
6vwẹ ọtiọye na e nẹ Ọrovwohwo Ọghẹnẹ tare;
Fikiridie wo roro oma wẹn ghwanghwanre kerẹ ọghẹnẹ,
7ọtiọye, nighe, Me cha reyọ erhorha rhe vwọ so wẹ,
ẹgborho ro me muoshọ ejobi;
ayen ki che yoro elọkọ rayen vwọ kpahe
erhuvwu rẹ ẹghwanre wẹn na
kẹ ayen miovwi urinrin wẹn.
8Ayen ki keke uwe phihọ evun rẹ Ukpotọ,
ku wo ghwu ughwu rẹ ohwo re hweri
vwẹ uherevie rẹ abadi.
9Ku wo je tanẹ, mẹvwẹ Ọghẹnẹ,
vwẹ irharo rẹ otu ri hwe we na,
ye wewe ohwo ghevweghe, wọ dia ọghẹnẹ-ẹ,
vwẹ obọ rẹ ihwo re wan we oma na?
10Wo che ghwu ughwu rẹ upheruphe
vwẹ obọ rẹ erhorha,
kidie me tarọ nure, eriyin Ọrovwohwo Ọghẹnẹ tare.
Uvwerhe Kpahe Ovie ri Taya
11Ota rẹ Ọrovwohwo da rhoma bru vwe rhe: 12Ọmọ rẹ ohwo, teye ugoroviẹ phihọ kẹ ovie ri Taya, re wọ ta kẹ, E nẹ Ọrovwohwo Ọghẹnẹ tare:
Wẹ oka rẹ orugba,
rọ vọnre vẹ ẹghwanre
rọ gbare vẹ erhuvwu.
13Obo Idẹn wọ epha, udju rẹ Ọghẹnẹ na;
oragha koragha ro yovwiri ejobi e vwo rhurhu we,
kanelia, topaz, kugbe jasper,
krisol, beril, kugbe onix,
safaya, carbuncle, emerald;
ra vwẹ oro ru ọye ẹghwẹphihọ o wẹn
vẹ ona re bru phihọ owẹ.
Vwẹ ẹdẹ ra ma wẹ na
ọye a rhuẹrẹ ayen phihọ.
14Omamọ rẹ shẹrub ra vwẹ evwri te ọye e ru we phihọ;
wọ da hẹ enu rẹ ugbenu ọfuanfon rẹ Ọghẹnẹ;
vwẹ evun rẹ uherevie rẹ ibieragha rẹ erhanre wọ da yan.
15Wọ re abe vwẹ idjerhe wẹ-ẹn
nẹ ẹdẹ ra vwọ ma wẹn rhe,
bẹsiẹ ra ke rhe mrẹ orukuruku vwẹ obọ wẹ.
16Vwẹ evun rẹ eki obuebu ru wọ chua na
wọ da rhe vọn vẹ ozighi, wọ de rhi ru umwemwu;
Me da djẹ wẹ kufia kirobo ri tuoma nẹ ugbenu rẹ Ọghẹnẹ,
shẹrub ro sun we da djẹ wẹ kufia
nẹ uherevie rẹ ibieragha rẹ erhanre na.
17Udu wẹn da rhe vọn vẹ eheri fiki rẹ erhuvwu wẹn;
wo de miovwi aghwanre wẹn fiki
rẹ erhuvwu wẹn.
Mi de mu we teye otọ;
Me da ban wẹ phihọ vwẹ obaro rẹ ivie,
rere ayen vwọ tọn ẹro rayen vi we.
18Vwẹ oma rẹ orukuruku obuebu wẹn
vwẹ eki rẹ ọghware ru wọ chua
wọ de vwo gbe ẹshẹ wẹn ku,
kọye mi de duvwu erhanre phihọ uherevie wẹn
ọ da tọrhẹ owẹ,
mi de hirhe uwe phihọ iwurhie vwẹ enu rẹ otọ na
vwẹ obaro rẹ ihwo ejobi re mrẹ wẹ.
19Ihwo ejobi re riẹn wẹn vwẹ ohri rẹ ihwo na
ofu de dje ayen kẹ wẹ;
wo rhi te oba ro muoshọ re
wọ gbe cha dia rhiri bẹdẹ ọfa-a.
Aroẹmrẹ Kpahe Sidọn
20Ota rẹ Ọrovwohwo de bru vwe rhe: 21Ọmọ rẹ ohwo, tọn opharo wẹn vi Sidọn,
ru wọ mraro kpahọ, 22re wọ ta, E nẹ Ọrovwohwo Ọghẹnẹ tare:
Nighere, mi mu kpahe owẹ, E Sidọn,
ki mi vwẹ urinrin mẹ phia vwẹ ohri wẹ.
Ke ayen riẹn nẹ mẹvwẹ Ọrovwohwo
vwẹ ọke ri mi de gu ẹdjọ vwẹ evun rọye,
re me da vwẹ urimrin mẹ phia vwẹ evun rọye,
23kidie mi che ji emiavwe bro rhe,
ọbara kọ cha dia irhuvwu rọye;
i re hweri ki che she vwẹ evun rọye,
fiki rẹ ọlọkọ rọ vwọ so ayen vwi kabọ kabọ.
Etiyin kẹ ayen riẹn nẹ mẹvwẹ Ọrovwohwo.
24Vwọ kẹ uwevwi rẹ Izrẹl ebẹ gbe dia rọ bẹre ohwo ọfa-a eyẹ odjigbe ro duvwu ohwo gbe dia ọfa-a vwẹ ohri rẹ ihwo re dia kẹrẹ re reyọ ayen vwọ jehwẹ. Etiyin ayen ke riẹn nẹ mẹvwẹ ọye Ọrovwohwo na.
25E nẹ Ọrovwohwo Ọghẹnẹ tare: Ọke mi de rhi koko uwevwi rẹ Izrẹl nẹ ohri rẹ ihwo ra hra ayen ra na, ra da vwẹ urinrin mẹ phia vwẹ oma rẹ ayen vwẹ obaro rẹ ẹgborho na, Eeiyin kẹ ayen cha dia otọ rẹ obọ rayen re me vwọ kẹ odibo mẹ Jekọp. 26Ayen ke cha dia dẹn vwẹ evun rọye, ayen ke cha bọn iwevwi ke kọn ogba ri vain. Ayen ke dia dẹn, vwẹ ọke ri mi de che gu ẹdjọ rẹ ihwo re dia kẹrẹ ayen re vwẹ ayen jehwẹ. Etiyin kẹ ayen riẹn nẹ mẹvwẹ Ọrovwohwo Ọghẹnẹ rayen.
Currently Selected:
Izikiẹl 28: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.