Daniẹl 4
4
Orhuẹ ri Nebukadreza
1Onana ovuẹ rẹ ovie Nebukadreza vwo rhe ihwo ejobi, ẹgborho ejobi, vẹ ephẹrẹ ejobi, re dia otọ rẹ akpọ na ejobi: ufuoma bu phihọ kẹ ovwan!
2Me mrẹ re nẹ oyovwi kẹ vwẹ mi vwo dje eka vẹ igbunu rẹ
Ọghẹnẹ ro me kpenu ejobi ru kẹ vwẹ
3Mavọ oka rọye rho te,
mavọ igbunu rọye vwo ẹgba te!
Uvie rọye uvie ri bẹdẹ,
isuesun rọye herọ nẹ uvwiẹ re te uvwiẹ.
4Mẹvwẹ, Nebukadreza, me hẹ evun rẹr egbomọphẹ vwẹ evun rẹ uwevwi mẹ, ọ ji ghwe yovwẹ kẹ vwẹ vwẹ evun rẹ ighẹn mẹ. 5Me da vwerhẹ evwerhẹ ro mu vwẹ oshọ, ri mi vwo shevwerhẹ ehwa mẹ, eroro vẹ emramrẹ re kọn ro vwẹ uyovwi da nẹrhẹ oshọ mu vwẹ. 6Kọye mi de ghwoghwo nẹ e se evwaghwanre ri Babilọn ejobi rhe vwe, rere ayen fan otọ rẹ evwerhẹ na kẹ vwẹ. 7Etiyin otu rẹ egbẹnẹkẹ, vẹ idjene, ihwo ri Kaldia, Kugbe otu re fan otọ rẹ isio da rhe, me da ta evwerhẹ na kẹ ayen, ẹkẹvuọvo ayen sa vwẹ evwerhẹ na vẹ otọ rọye phia kẹ vwẹ-ẹ. 8Ukuko rọye, Daniẹl de rhe mudia vwẹ obaro mẹ–ohwo re wene odẹ rọye phihọ Bẹlteshaza, odẹ rẹ ẹdjọ mẹ, ohwo re erhi rẹ eghẹnẹ efuanfon vọn oma–me da ta evwerhẹ na kẹ, tanẹ, 9E Belteshaza onotu rẹ evwaghwanre na, fikiridie me riẹnre nẹ erhi rẹ eghẹnẹ efuanfon hẹ evun wẹn o rhe vwo emuigbunu ọvo rọ sa bẹn kẹ wẹ-ẹ, ọna evwerhẹ re me vwerhẹre na; fan otọ rọye kẹ vwẹ. 10Obo me mrẹre vwẹ ọke ri mi vwo shevwerhẹ ehwa na ke ena. Nighe, me da mrẹ urhe ọvo vwẹ uherevie rẹ akpọ na, ugrọgrọ rọye kpenu gangan. 11Urhe na da rhe rho gigirigi, enu rọye de duvwu obe irharheghe, kasan kasan vwẹ evun rẹ akpọ na ejobi kọ sa mrẹ. 12Ẹbe rọye pha yoyovwi, emamọ rọye buebu gbidi, kẹ emuọre vwọ kẹ ihwo ejobi. Eranvwe rẹ aghwa na kẹ otọ rẹ ophie rọye e dia, eghọn rọye kọye emephran rẹ irharheghe dia, oma rọye kọye ihwo ejobi da ria.
13Nighe, mi vwo shevwerhẹ ehwa, me da mrẹ emramrẹ vwẹ evun rẹ evwerhẹ mẹ, ọrhẹrotọ ohwo ọfuanfọn, o de wotọ nẹ obo odjivwu rhe. 14O de kperi gangan tanẹ, She urhe na teye otọ re wọ nyavwe eghọn rọye kufia, hrọre ẹbe rọye nu, re wọ je hra emamọ rọye, jẹn eranvwe na djẹ nẹ otọ rọye, re ephran na rhan nẹ eghọn rọye. 15Ẹkẹvuọvo yan jẹn uchuku rọye vwo otọ vwẹ ọghrọrọ rẹ utehru vẹ ẹrovwo vwọ gba, vwẹ ohri rẹ odi eboba re hẹ aghwa na. Jẹn irho rẹ obenu rho kuo, ghare ẹkẹn rọye vẹ eranvwe re ria odi vwẹ aghwa kugbe. 16Jẹn iroro rọye rhẹriẹ nẹ ọ rẹ ohwo, wo rhe jẹn a vwẹ iroro rẹ eranvwe kẹ, wo rhe jẹn ẹgbukpe ighwrẹn wan wẹn tavwe. 17Ọnana orhiẹn rẹ erhẹrotọ na bruru, ọrhiẹn na ọye eta rẹ ihwo efuanfon na, rere oba rọye, ihwo rẹ akpọ vwọ riẹn nẹ ọ rọ me kpenu ejobi ri suẹn uvie rẹ ihwo, nẹ ohwo ro jere ọye ọ vwọ kẹ, ohwo ro me kpotọ kọye ọ vwọ ka obenu. 18Evwerhẹ nana kọye mẹvwẹ, Ovie Nebukadneza, vwerhẹre. We, E Belteshaza, fan otọ rọye, fikiridie ihwo ri vwo aghwanre vwẹ uvie mẹ na, sa fan otọ rọye kẹ vwẹ-ẹ ẹkẹvuọvo wo se ruo, kidie erhi rẹ eghẹnẹ efuanfon na hẹ evun wẹn.
19Etiyin Daniẹl, re se odẹ rọye Bẹlteshaza ofu de rhi dje krekri, iroro rọye da djẹ oshọ muo. Ovie na da ta, Belteshaza wo jẹ evwerhẹ na yẹrẹ otọ rọye e fan, mu we oshọ-ọ. Bẹlteshaza da kpahe kẹ, Ọrovwovwe, e jẹn evwerhẹ na dia vwọ kẹ ihwo rẹ ivun wẹ miovwẹ re otọ rọye rha dia kẹ ivwighrẹ wẹn. 20Urhe ru wọ mrẹre na, rọ rhoro ọ da rhe dia gigirigi na, rẹ obenu rọye de rhi te obo irharheghe na, rẹ akpọ ejobi da sa mrẹ na; 21rẹ ẹbe rọye epha yoyovwi rẹ emamọ rọye da rha dia buebu na, rẹ ihwo ejobi da mrẹ emuọre vwẹ enu rọye na, rẹ eranvwe rẹ aghwa ejobi da dia ophie rẹ obotọ rọye, emephran rẹ irharheghe ejobi da dia eghọn rọye. 22Ọye owẹ, E Ovie, ro rhe rho wọ da rhe goma gigirigi. Ọrho wẹn de rhi kpenu o de rhi te odjuvwu, otọ ru wo suẹn, de rhi te oba rẹ akpo na ejobi. 23Rẹ ovie rha rhe vwọ mrẹ ọrhẹrotọ, ohwo ọfuanfon ro nẹ obo odjuvwu cha, rọ tanẹ, she urhe na teye otọ re wọ rha guọghọ, ẹkẹvuọvo yan jẹ uchuku rẹ awọ rọye vwo vwẹ evun rẹ otọ na, wọ rha vwẹ ọghrọrọ rẹ utehru vẹ ẹrovwo vwọ gba, vwẹ evun rẹ odi ebọba rẹ aghwa na, wọ rhe jẹn irho rẹ odjuvwu rho kuo, wọ rha ghare ẹkẹn rọye vẹ eranvwe re ria vwẹ aghwa kugbe; bẹsiẹ rẹ ẹgbukpe ighwrẹ vwọ wan vrẹn. 24Ọnana ọye hẹ otọ rọye, E Ovie. Ọna eghwoghwo rẹ ọ ro Me kpenu ejobi, ọye ri bru ọrovwovwe rẹ ovie rhe na, 25nẹ, a cha djẹ we nẹ ohri rẹ ihwo, wọ vẹ eranvwe rẹ aghwa kọye gba cha dia, ke che ru we vwọ re odi kerẹ erhuẹn, oma wẹ kọ kpọrhọ vẹ irho ro nẹ obo odjuvwu cha, ẹgbukpe ighwrẹ kọ wan wẹn vrẹn bẹsiẹ wọvwọ riẹn nẹ ọ rọ Me Kpenu ejobi ri suẹn uvie rẹ ihwo, nẹ ọ vwọ kẹ ohwo ro jere. 26Kirobo ra vuẹrẹ nẹ o yan jẹ uchuku rẹ awọ re urhe na vwọ na, uvie wẹn kọ dia kẹ wẹ nẹ ọke wo vwo segbuyota nẹ odjuvwu ri suẹn. 27Fiki rẹ ọtiọye, E Ovie, gbe nyo uchehro mẹ, siobọ nẹ umwemwu rere wo ru emu esiri, vẹ orukuruku wẹn, re wo ni arodọvwẹ kẹ ihwo rẹ eshenyẹ, siẹvo ufuoma wẹn ke ruo gro phihọ.
28Enana ejobi da rhe phia kẹ Ovie Nebukadreza. 29Vwẹ oba rẹ emeranvwe ihwivẹ rhi vwo te, kọ yan vwẹ enu rẹ ighẹn rọye vwi Babilọn, 30etiyin ovie na da ta, Onana dia Babilọn rọde na, re me vwẹ ẹgba vẹ ogangan mẹ bọn rọ dia ighẹn rẹ ovie vwọ kẹ urinrin vẹ ọrho mẹ? 31Ọke rẹ ota na je vwo unu rẹ ovie na, urhuru ọvo de nẹ odjuvwu rhe, E Ovie, Nebukadneza we ọye a ta ota na kẹ; Uvie na vrẹn nẹ obọ wẹn nure. 32Ka cha djẹ we nẹ ohri rẹ ihwo, ohri rẹ eranvwe rẹ aghwa kọye wọ dia, ke ru we vwọ re odi kere erhuẹn, ikpe ighwrẹ kẹ wan vrẹn tavwe, bẹsiẹ wọ vwọ riẹn nẹ ọ ro Me Kpenu ejobi ri suẹn uvie rẹ ihwo, ohwo ro jere ọye ọ vwọ kẹ. 33Siẹvuọvọ na ota na da ghwa sẹ kẹ Nebukadneza. A da djẹ nẹ ohri rẹ ihwo, kọ ria odi kerẹ erhuẹn, oma rọye da rhe kpọrhọ vwẹ irho ro nẹ obo odjuvwu rhe, ẹton rọye de rhi gro kerẹ iphoro rẹ ugo, ififawọ vẹ ififabọ rọye ke epha kerẹ ififawọ rẹ ephran.
34Re oba rẹ ẹdẹ na rhi vwo tẹ, Mẹvwẹ, Nebukadneza da kpare epharo nẹ obo odjuvwu, etiyin iroro mẹ de rhivwi bru vwẹ rhe, etiyin mi de jiri ọ ro Me Kpenu ejobi, mi de jiro me da vwẹ ọghọ kẹ ohwo rọ herọ bẹdẹ;
kidie isuesun rọye isuesun ri bẹdẹ,
uvie rọye herọ nẹ uvwiẹ re te uvwiẹ.
35Ihwo re dia akpọ na ejobi e kere ayen kerẹ emu diodi;
obo ri jere ọye o ruẹ vwẹ ohri rẹ otu rẹ obo odjuvwu
vẹ ohri rẹ ihwo re dia akpọ na;
o vwo ohwo ọvuọvo rọ sa da obọ rọye jẹ-ẹ
yẹrẹ ta kẹ nẹ, die wọ ruẹ?
36Vwẹ ọke yena, iroro mẹ de bru vwẹ rhe; fiki rẹ urinrin rẹ uvie mẹ, ọrho mẹ vẹ erhuvwu mẹ de rhivwi bru vwẹ rhe. Edieguare mẹ vẹ ehọnvwọre mẹ da guọnọ o vwẹ mrẹ, owọ mẹ de rhi muọtọ kokoroko vwẹ evun rẹ uvie mẹ, a da rha vwẹ ọrho buebu efa vwọ ba kẹ vwẹ. 37Asakiephana Mẹvwẹ, Nebukadneza de jiri ji mu ọghọ kẹ Ovie rẹ odjuvwu kidie iruo rọye ejobi shephihọ, idjerhe rọye uyota, ihwo re yan mu oma kpenu ejobi kọ sa vwẹ ayen kpotọ.
Currently Selected:
Daniẹl 4: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.