2 ਕੁਰਿੰਥੁਸ 8
8
ਮਸੀਹੀ ਦਾਨ
1 #
ਰੋਮ 15:26
ਭਰਾਵੋ ਅਤੇ ਭੈਣੋ, ਅਸੀਂ ਤੁਹਾਨੂੰ ਮਕਦੂਨਿਯਾ ਦੀਆਂ ਕਲੀਸੀਯਾਵਾਂ ਦੇ ਉੱਤੇ ਹੋਈ ਪਰਮੇਸ਼ਰ ਦੀ ਕਿਰਪਾ ਦੇ ਬਾਰੇ ਦੱਸਣਾ ਚਾਹੁੰਦੇ ਹਾਂ । 2ਉਹਨਾਂ ਦੀ ਪਰੀਖਿਆ ਬਹੁਤ ਜ਼ਿਆਦਾ ਦੁੱਖਾਂ ਦੇ ਰਾਹੀਂ ਹੋਈ ਹੈ ਪਰ ਇਹ ਹੋਣ ਤੇ ਵੀ ਉਹਨਾਂ ਦਾ ਅਨੰਦ ਮਹਾਨ ਹੈ, ਉਹਨਾਂ ਨੇ ਆਪਣੀ ਭਾਰੀ ਗ਼ਰੀਬੀ ਵਿੱਚ ਵੀ ਖੁੱਲ੍ਹੇ ਦਿਲ ਨਾਲ ਦਾਨ ਦਿੱਤਾ ਹੈ । 3ਕਿਉਂਕਿ ਮੈਂ ਇਸ ਗੱਲ ਦਾ ਗਵਾਹ ਹਾਂ ਕਿ ਉਹਨਾਂ ਨੇ ਆਪਣੀ ਪਹੁੰਚ ਦੇ ਅਨੁਸਾਰ ਸਗੋਂ ਪਹੁੰਚ ਤੋਂ ਵੀ ਵੱਧ ਕੇ ਆਪਣੀ ਮਰਜ਼ੀ ਨਾਲ ਦਿੱਤਾ ਹੈ । 4ਉਹਨਾਂ ਨੇ ਸਾਡੇ ਅੱਗੇ ਬੇਨਤੀ ਕੀਤੀ ਕਿ ਅਸੀਂ ਉਹਨਾਂ ਨੂੰ ਵੀ ਪਰਮੇਸ਼ਰ ਦੇ ਲੋਕਾਂ ਦੀ ਸੇਵਾ ਵਿੱਚ ਹੱਥ ਵਟਾਉਣ ਦਾ ਮੌਕਾ ਦੇਈਏ । 5ਇਹ ਸਾਡੀ ਉਮੀਦ ਤੋਂ ਕਿਤੇ ਜ਼ਿਆਦਾ ਸੀ । ਉਹਨਾਂ ਨੇ ਪਹਿਲਾਂ ਆਪਣੇ ਆਪ ਨੂੰ ਪ੍ਰਭੂ ਦੇ ਹੱਥ ਅਤੇ ਫਿਰ ਆਪਣੇ ਆਪ ਨੂੰ ਪਰਮੇਸ਼ਰ ਦੀ ਇੱਛਾ ਦੇ ਨਾਲ ਸਾਡੇ ਹੱਥ ਸੌਂਪਿਆ । 6ਇਸ ਸੇਵਾ ਦਾ ਕੰਮ ਪਹਿਲਾਂ ਤੀਤੁਸ ਨੇ ਸ਼ੁਰੂ ਕੀਤਾ ਸੀ ਇਸ ਲਈ ਅਸੀਂ ਉਸ ਅੱਗੇ ਬੇਨਤੀ ਕੀਤੀ ਕਿ ਉਹ ਤੁਹਾਡੇ ਵਿੱਚ ਇਸ ਦਾਨ ਦੀ ਸੇਵਾ ਦੇ ਕੰਮ ਨੂੰ ਪੂਰਾ ਕਰੇ । 7ਤੁਸੀਂ ਹਰ ਤਰ੍ਹਾਂ ਬਹੁਤ ਅਮੀਰ ਹੋ, ਵਿਸ਼ਵਾਸ ਵਿੱਚ, ਬੋਲਣ ਵਿੱਚ, ਗਿਆਨ ਵਿੱਚ, ਉਤਸ਼ਾਹ ਵਿੱਚ, ਇੱਥੋਂ ਤੱਕ ਕਿ ਸਾਨੂੰ ਪਿਆਰ ਕਰਨ ਵਿੱਚ ਵੀ । ਇਸ ਲਈ ਹੁਣ ਇਸ ਦਾਨ ਦੀ ਸੇਵਾ ਵਿੱਚ ਵੀ ਆਪਣੇ ਆਪ ਨੂੰ ਇਸੇ ਤਰ੍ਹਾਂ ਅਮੀਰ ਸਿੱਧ ਕਰੋ ।
8ਮੈਂ ਤੁਹਾਨੂੰ ਹੁਕਮ ਨਹੀਂ ਦੇ ਰਿਹਾ ਸਗੋਂ ਦੂਜਿਆਂ ਦੇ ਉਤਸ਼ਾਹ ਬਾਰੇ ਤੁਹਾਨੂੰ ਦੱਸ ਕੇ ਤੁਹਾਡੇ ਪਿਆਰ ਦੀ ਪਰਖ ਕਰ ਰਿਹਾ ਹਾਂ । 9ਤੁਸੀਂ ਸਾਡੇ ਪ੍ਰਭੂ ਯਿਸੂ ਮਸੀਹ ਦੀ ਕਿਰਪਾ ਬਾਰੇ ਜਾਣਦੇ ਹੀ ਹੋ ਕਿ ਉਹ ਕਿੰਨੇ ਅਮੀਰ ਸਨ, ਫਿਰ ਵੀ ਉਹ ਤੁਹਾਡੀ ਖ਼ਾਤਰ ਗਰੀਬ ਬਣ ਗਏ ਕਿ ਉਹਨਾਂ ਦੀ ਗ਼ਰੀਬੀ ਦੁਆਰਾ ਤੁਸੀਂ ਅਮੀਰ ਬਣ ਜਾਵੋ ।
10ਇਸ ਬਾਰੇ ਮੇਰਾ ਇਹ ਵਿਚਾਰ ਹੈ ਜਿਹੜਾ ਤੁਹਾਡੇ ਭਲੇ ਲਈ ਹੈ, ਪਿਛਲੇ ਸਾਲ ਤੁਸੀਂ ਇਹ ਕੰਮ ਕਰਨ ਵਿੱਚ ਨਾ ਕੇਵਲ ਪਹਿਲ ਕੀਤੀ ਸਗੋਂ ਇਸ ਨੂੰ ਕਰਨ ਦੀ ਇੱਛਾ ਵੀ ਪ੍ਰਗਟ ਕੀਤੀ ਸੀ । 11ਇਸ ਲਈ ਇਸ ਨੂੰ ਪੂਰਾ ਕਰੋ । ਜਿਸ ਤਰ੍ਹਾਂ ਤੁਸੀਂ ਇਸ ਕੰਮ ਨੂੰ ਸ਼ੁਰੂ ਕਰਨ ਦੇ ਚਾਹਵਾਨ ਸੀ, ਉਸੇ ਤਰ੍ਹਾਂ ਹੁਣ ਇਸ ਨੂੰ ਜੋ ਕੁਝ ਵੀ ਤੁਹਾਡੇ ਕੋਲ ਹੈ, ਉਸ ਦੇ ਨਾਲ ਪੂਰਾ ਕਰੋ । 12ਜੇਕਰ ਕੋਈ ਦਾਨ ਦੇਣ ਦੀ ਇੱਛਾ ਕਰਦਾ ਹੈ ਤਾਂ ਪਰਮੇਸ਼ਰ ਉਸ ਦੇ ਕੋਲੋਂ ਉਸ ਚੀਜ਼ ਦੀ ਮੰਗ ਨਹੀਂ ਕਰਦੇ ਜਿਹੜੀ ਉਸ ਦੇ ਕੋਲ ਨਹੀਂ ਹੈ ਸਗੋਂ ਪਰਮੇਸ਼ਰ ਉਹ ਹੀ ਸਵੀਕਾਰ ਕਰ ਲੈਂਦੇ ਹਨ ਜਿਹੜੀ ਉਹ ਦਿੰਦਾ ਹੈ ।
13ਸਾਡੀ ਇੱਛਾ ਇਹ ਨਹੀਂ ਕਿ ਦੂਜਿਆਂ ਦੀ ਮਦਦ ਕਰਨ ਦੀ ਖ਼ਾਤਰ ਤੁਸੀਂ ਲੋੜ ਤੋਂ ਜ਼ਿਆਦਾ ਭਾਰ ਹੇਠਾਂ ਦੱਬ ਜਾਵੋ ਸਗੋਂ ਇਸ ਦਾ ਆਧਾਰ ਬਰਾਬਰ ਹੋਣਾ ਚਾਹੀਦਾ ਹੈ । 14ਇਸ ਸਮੇਂ ਤੁਹਾਡਾ ਵਾਧਾ ਉਹਨਾਂ ਦਾ ਘਾਟਾ ਪੂਰਾ ਕਰੇਗਾ ਪਰ ਉਹ ਸਮਾਂ ਵੀ ਆਵੇਗਾ ਜਦੋਂ ਉਹਨਾਂ ਦਾ ਵਾਧਾ ਤੁਹਾਡਾ ਘਾਟਾ ਪੂਰਾ ਕਰੇਗਾ । ਇਸ ਤਰ੍ਹਾਂ ਦੋਵੇਂ ਪਾਸੇ ਬਰਾਬਰੀ ਹੋਵੇਗੀ । 15#ਕੂਚ 16:18ਪਵਿੱਤਰ-ਗ੍ਰੰਥ ਵਿੱਚ ਲਿਖਿਆ ਹੈ,
“ਜਿਸ ਮਨੁੱਖ ਨੇ ਜ਼ਿਆਦਾ ਇਕੱਠਾ ਕੀਤਾ,
ਉਸ ਦੇ ਕੋਲ ਲੋੜ ਤੋਂ ਜ਼ਿਆਦਾ ਨਾ ਨਿਕਲਿਆ ।
ਜਿਸ ਨੇ ਥੋੜ੍ਹਾ ਇਕੱਠਾ ਕੀਤਾ,
ਉਸ ਦੇ ਕੋਲ ਲੋੜ ਤੋਂ ਘੱਟ ਨਾ ਨਿਕਲਿਆ ।”
ਤੀਤੁਸ ਅਤੇ ਉਸ ਦੇ ਸਾਥੀ
16ਪਰਮੇਸ਼ਰ ਦਾ ਧੰਨਵਾਦ ਹੋਵੇ, ਜਿਹਨਾਂ ਨੇ ਤੀਤੁਸ ਨੂੰ ਪ੍ਰੇਰਨਾ ਦਿੱਤੀ ਹੈ । ਉਹ ਉਸੇ ਤਰ੍ਹਾਂ ਤੁਹਾਡੀ ਮਦਦ ਕਰਨ ਦੇ ਲਈ ਤਿਆਰ ਹੈ, ਜਿਸ ਤਰ੍ਹਾਂ ਅਸੀਂ ਵੀ ਹਾਂ । 17ਇਹ ਨਹੀਂ ਕਿ ਉਹ ਸਾਡੀ ਬੇਨਤੀ ਕਾਰਨ ਪਰ ਉਹ ਆਪਣੀ ਇੱਛਾ ਨਾਲ ਤੁਹਾਡੇ ਕੋਲ ਆਉਣ ਦੇ ਲਈ ਚਾਹਵਾਨ ਸੀ । 18ਉਸ ਦੇ ਨਾਲ ਅਸੀਂ ਉਸ ਭਰਾ ਨੂੰ ਵੀ ਭੇਜ ਰਹੇ ਹਾਂ ਜਿਸ ਦਾ ਨਾਂ ਸ਼ੁਭ ਸਮਾਚਾਰ ਦੇ ਪ੍ਰਚਾਰ ਲਈ ਸਾਰੀਆਂ ਕਲੀਸੀਯਾਵਾਂ ਵਿੱਚ ਪ੍ਰਸਿੱਧ ਹੈ । 19ਕੇਵਲ ਇਹ ਹੀ ਨਹੀਂ ਸਗੋਂ ਕਲੀਸੀਯਾਵਾਂ ਨੇ ਉਸ ਨੂੰ ਇਸ ਦਾਨ ਸੇਵਾ ਦੇ ਲਈ ਸਾਡਾ ਸਾਥੀ ਚੁਣ ਕੇ ਭੇਜਿਆ ਹੈ । ਇਹ ਸੇਵਾ ਅਸੀਂ ਪ੍ਰਭੂ ਦੀ ਮਹਿਮਾ ਦੇ ਲਈ ਅਤੇ ਆਪਣਾ ਉਤਸ਼ਾਹ ਦਿਖਾਉਣ ਲਈ ਕਰ ਰਹੇ ਹਾਂ ।
20ਅਸੀਂ ਸਾਵਧਾਨ ਹਾਂ ਕਿ ਕਿਸੇ ਨੂੰ ਵੀ ਇਸ ਖੁੱਲ੍ਹ-ਦਿਲੀ ਨਾਲ ਦਿੱਤੇ ਦਾਨ ਦੀ ਸੇਵਾ ਦੇ ਸੰਬੰਧ ਵਿੱਚ ਸਾਡੇ ਉੱਤੇ ਕੋਈ ਦੋਸ਼ ਲਾਉਣ ਦਾ ਮੌਕਾ ਨਾ ਮਿਲੇ । 21#ਕਹਾ 3:4ਸਾਡਾ ਉਦੇਸ਼ ਨਾ ਕੇਵਲ ਪ੍ਰਭੂ ਦੇ ਸਾਹਮਣੇ ਸਗੋਂ ਹੋਰਨਾਂ ਦੇ ਸਾਹਮਣੇ ਵੀ ਇਮਾਨਦਾਰ ਬਣਨਾ ਹੈ ।
22ਇਸ ਲਈ ਉਹਨਾਂ ਦੇ ਨਾਲ ਅਸੀਂ ਆਪਣੇ ਇਸ ਭਰਾ ਨੂੰ ਭੇਜ ਰਹੇ ਹਾਂ ਜਿਸ ਦੇ ਉਤਸ਼ਾਹ ਨੂੰ ਅਸੀਂ ਕਈ ਮੌਕਿਆਂ ਤੇ ਪਰਖ ਚੁੱਕੇ ਹਾਂ । ਉਸ ਨੂੰ ਤੁਹਾਡੇ ਉੱਤੇ ਬਹੁਤ ਭਰੋਸਾ ਹੈ ਇਸ ਲਈ ਉਸ ਦਾ ਉਤਸ਼ਾਹ ਹੁਣ ਹੋਰ ਵੱਧ ਗਿਆ ਹੈ । 23ਹੁਣ ਜਿੱਥੋਂ ਤੱਕ ਤੀਤੁਸ ਦਾ ਪ੍ਰਸ਼ਨ ਹੈ ਉਹ ਮੇਰੀ ਤੁਹਾਡੇ ਵਿੱਚ ਕੀਤੀ ਗਈ ਸੇਵਾ ਦਾ ਸਾਥੀ ਅਤੇ ਸੇਵਕ ਹੈ ਅਤੇ ਜਿੱਥੋਂ ਤੱਕ ਬਾਕੀ ਭਰਾਵਾਂ ਦਾ ਪ੍ਰਸ਼ਨ ਹੈ, ਉਹ ਕਲੀਸੀਯਾਵਾਂ ਦੇ ਪ੍ਰਤਿਨਿਧੀ ਹਨ ਅਤੇ ਮਸੀਹ ਦੀ ਮਹਿਮਾ ਕਰਦੇ ਹਨ । 24ਇਸ ਲਈ ਤੁਸੀਂ ਉਹਨਾਂ ਨੂੰ ਆਪਣੇ ਪਿਆਰ ਦਾ ਸਬੂਤ ਦਿਓ ਅਤੇ ਜੋ ਮਾਣ ਉਹਨਾਂ ਉੱਤੇ ਹੈ ਉਸ ਨੂੰ ਕਲੀਸੀਯਾਵਾਂ ਦੇ ਸਾਹਮਣੇ ਪ੍ਰਗਟ ਕਰੋ ।
Currently Selected:
2 ਕੁਰਿੰਥੁਸ 8: CL-NA
Highlight
Share
ਕਾਪੀ।
Want to have your highlights saved across all your devices? Sign up or sign in
Punjabi Common Language (North American Version):
Text © 2021 Canadian Bible Society and Bible Society of India