ROMMITE 16
16
Mimal chibai bukna
1Kenkria khua a saptuam nasemtu, i sanggamnu uh Phoibi na kiang uah kung meltheihsak hi. 2Toupa min a misiangthoute bang a na napom ua, na panpih uh a ngaihna teng a na panpih ding un, ajiak aman zong mi tampi ana panpihta a, keimah ngei zong ahung panpihta hi.
3Krist Jesu a hung panpihte Prisila leh Akuila chibai hung buksak un; #Nst. 18.2. 4amau`n ka hinna a dingin a ngawng uh adawh ua. Amauh tung guak ah hilou in, Jentel saptuam jousiahte tungah zong kipahthu ka gen ahi. 5Tuachimah bangin a inn ua saptuam kikhawmte zong chibai hung buksak un.
Akhaia gam a Krist a gah masapen, ittak Epaneta chibai hung buksak un. 6Na lak ua semgim Mari zong chibai hung buksak un. 7Ka chipihte lak a ka thong tangpih, sawltakte lak a zong a minthangtak, Krist a zong keisang a om masajaw Andronika leh Junia chibai hung buksak un.
8Toupa a ka ittak Amphliata chibai hung buksak un. 9Krist a i naseppih Urbana leh, ka ittak Staki chibai hung buksak un. 10Krist a mi ahih kichian Apelle chibai hung buksak un. Aristobala inkuan a mite chibai hung buksak un. 11Ka chipih Herodion chibai hung buksak un. Toupa a om Norkissa inkuante chibai hung buksak un.
12Toupa a om Triphena leh Triphosa chibai hung buksak un. Toupa nna hahsep mahmah, ittak Persi chibai hung buksak un. 13Toupa a telsa Rufa leh anu, keinu zong hi, chibai hung buksak un. 14Asinkrita, Phlegon, Hermi, Petroba, Hermas tualeh akiang ua om unaute chibai hung buksak un. 15Philologa leh Julia, Neria leh a sanggamnu, tualeh Olimpa leh akiang ua misiangthou omte jousiah chibai hung buksak un.
16Kitawpna siangthou in chibai ki buktuah un, Krist a saptuamten chibai a hungbuk uhi.
Thuhilh tawpna
17Tualeh unaute aw: kihilhna dan nou ahung kihilh nasan uh kalh lam a kikhenna leh pukna siamkhiatute chiamteh ding leh kiheisan dingin kung ngen hi! 18Ajiak pen huachibang miten I Toupa uh Jesu Krist nna asem kei ua, amauh gilpi nna asemjaw uhi. Tualeh kampha leh kamsiam in mimawlte akhem nak uhi. 19Ajiak na thuman dan uh mijousiah lak ah akithang a, tuajiakin natung uah ka kipak hi. Hinanleh silhoih lam a napil ua, sil gilou lam a namawl uh ka deih hi. 20Tualeh lemna Pasian in setan pen tomkhat zoh chiangin nakeng nuaiah ahung tuandensak ding hi.
I Toupa Jesu hehpihna na kiang uah om hen.
21Ka naseppih Timothi leh ka chipihte Lusia, Jason tualeh Sosipater in chibai ahung buk hi. #Nst. 16.1. 22Keimah, Tertia, hih laikhak gelhpa in, Toupa min in chibai kung buk hi.
23Gaia, keileh saptuam jousiah jintunnapa in chibai ahung buk hi. Khuasung dangka kemtu Erasta leh unaupa Kuarta in chibai ahung buk hi. #Nst. 19.29; 1 Kor. 1.14; 2 Tim. 4.20.
Gualjawlna
24I Toupa uh Jesu Krist hehpihna na tung uah om hen. Amen.
Kipahthu genna thumna
25Tuin amah ka tangthupha gen bang leh thugu`k kilakna bangbang a, Jesu Krist ki tangkoupihna bang a noute na ginna ua hung dingkipsak theipa, hua thugu`k pen tanglai sawtpi sung phualgu`k a na om. 26Hinanleh tu a tangtawn Pasian thupiak dungjui a Jawlneite laibu in, ginna thumanna dingin nam jousiah kiangah theihsak in a omta hi.
27Apil Pasian guak kiangah Jesu Krist jiakin tangtawn in thupina om hen. Amen.
Currently Selected:
ROMMITE 16: THKHBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
