Matiu 17
17
Kemaŋkura nɛ Yesu nya be asheŋ
(Maak 9:2-13; Luuk 9:28-36)
1Asheŋ nɛ Yesu malga na be nchɛnshe be kaman nɛ e keta Pita nɛ Jeems nɛ mo sipo Jɔn nɛ mo nɛ bumo nawule ya dii kebee jeŋgreŋ ko so n ya chena ndoŋ gbrɛbi. 2Ndoŋ nna nɛ e kilgi kanaŋ ko bumo be anishito nɛ mbe anishiakpa fuli to a nyɛkpɛ fanɛ epeŋi nɛ mbe asɔbuuso malɛ fuli to parr a kpa edɛ. 3Kumo be kaman nɛ bebɛsopo asa na wu anebi Mosis nɛ anebi Elaija ka ba kaa malga Yesu kutɔ. 4Ndoŋ nna nɛ Pita kaŋɛ Yesu: “Enyɛnpe, anyi be kebaawɔ nfe ere nyalɛ ga. Nɛ fee sha, meeŋ yuu abuu asa nfe nɛ kukoŋwule e baa la feya nɛ kukoŋwule e baa la Mosis peya nɛ kukoŋwule malɛ e baa la Elaija peya.” 5E kraa malga nna nɛ kuwɔlpa nyɛkpɛso ko lar nɛ kumo be kiyoyul ba buu bumo so nɛ ebɔl shi kuwɔlpa na to ŋ kaŋɛ: “M Pibinyɛn shaso nɛ ma kagbene fuli mo so ga nde. Men baa nu mbe kɔnɔ.” 6Bebɛsopo na ka nu loŋ nɛ kufu pɛ bumo nɛ b tɔr m pugi bumo be anishi so. 7Ama Yesu ba beta m beta bumo nseŋ kaŋɛ: “Men niŋi to, men sa maa lɔ kufu.” 8B ka niŋi to ŋ keni nɛ Yesu nawule e yil, esa kama maŋ naŋ ti mo so.
9Ndoŋ nna nɛ bumo kikɛ fara a gbelge kebee na so nɛ Yesu ji bumo asoe to ŋ kaŋɛ: “Men sa maŋ kaŋɛ esa kikɛ kusɔ nɛ men wu na be asheŋ hale nɛ ma, Nyiŋgbasa Pibinyɛn e ya tiŋi luwu to.”
10Nɛ bebɛsopo na bishi mo: “Nɛ manɛ e ba nɛ mbraŋinipoana na bee kaŋɛ fanɛ anebi Elaija daga kejuŋkpar m ba na?” 11Nɛ Yesu kaŋɛ bumo: “Kashenteŋ, Elaija bee juŋkpar a ba nɛ e ba lɔŋɛ kusɔ kama n yili. 12Ma alɛ e kaŋɛ menyi na fanɛ Elaija teŋ ba, ama basa maŋ pin mo nseŋ wora mo kusɔ kama nɛ k par bumo. Loŋ koŋwule na malɛ gbagba chap nɛ ma, Nyiŋgbasa Pibinyɛn gba beeŋ wu tɔrɔ bumo be enɔ to.” 13E ka malga le be asheŋ ere n loge nɛ bebɛsopo na pin fanɛ Jɔn kabɔrɛbɛrpo be asheŋ nɛ e daa malga a sa bumo na.
Yesu ka chɛ kebinyɛnbi nɛ mbuibi lubi tɔr so na be asheŋ
(Maak 9:14-29; Luuk 9:37-43a)
14B ka bɛta m ba jimaŋ na kutɔ nɛ kanyɛn ko ba Yesu kutɔ m ba gbir mbe anishito 15nseŋ kaŋɛ: “Enyɛnpe, jande wu ma pibinyɛn kuwɔr. E bee tɔr kegbuŋgbuŋ nna nɛ k bee tɔrɔ mo ga hale a shin nɛ e bee kaa tɔr edɛ to ŋko nchu to. 16M bar mo fo bebɛsopo kutɔ nna fanɛ b chɛ mo, ama b maŋ tiŋ.” 17Nɛ Yesu bishi bebɛsopo na: “O menyi mbreebi, nuso be basa lubi e la menyi nɛ men maŋ kɔ yirda ere bre? Nuso be kechɛr nɛ menyee sha fanɛ n chɛr menyi kutɔ? Nɛ nuso be kanyiti nɛ menyee sha fanɛ n naŋ ta ŋ keta menyi? Men bar kebia na ma kutɔ nfe.” 18B ka bar mo mo kutɔ nɛ e fiɛ kiyoyu lubi na so nɛ k lar kebia na to nɛ e nya eleŋ epul na to. 19Kesheŋ ere be kaman nɛ bebɛsopo na ŋana m ba bishi Yesu: “Manɛ e ba nɛ anyi ere maŋ tiŋ n ju kiyoyu lubi na?” 20Nɛ Yesu kaŋɛ bumo: “Men be yirda ka maŋ shi so nɛ men maŋ tiŋ na. Ma e kaŋɛ menyi kashenteŋto na fanɛ nɛ men be yirda baa du fimbi fanɛ kakilia be kebi gba, menyeeŋ tiŋ ŋ kaŋɛ kebee ere le: ‘Pulgi fo kumu nfe n yɔ ndoŋ ere!’ Nɛ k pulgi. Shɛŋ shɛŋ maaŋ baa du menyi so kpakpa. 21[Ama le be kiyoyu ere bre maa lar esa to loŋ ama bebɛsopo na baŋ kishi nna ŋ kule Ebɔrɛ.]”
Yesu ka naŋ malga mbe luwu be asheŋ
(Maak 9:30-32; Luuk 9:43b-45)
22Kachako Yesu nɛ mbe bebɛsopo ka ba shɛr Galili nɛ e kaŋɛ bumo: “Baaŋ ta ma, Nyiŋgbasa Pibinyɛn m bɔɔ basa enɔ 23nɛ b mɔ ma, ama kumo be kachɛ sasopo to Ebɔrɛ beeŋ naŋ tiŋi ma luwu na to.” Nɛ bebɛsopo na be ŋgbene jija bumo ga.
Bɔrɛlambu to be lampo be asheŋ
24Yesu nɛ mbe bebɛsopo ka ba Kapɛɛniam nɛ ndoŋ be bɔrɛlambu be lamposɔpoana ba bishi Pita: “Men be Eŋinipo maa ka bɔrɛlambu be lampo na ŋko?” 25Nɛ Pita kaŋɛ bumo: “Mm, e bee ka.” Pita ka ba luri laŋ to Yesu e fara m malga, e yɛ: “Saimɔn, kaŋɛ ma kusɔ nɛ fee fɛ kesheŋ ere to. Fee tama fanɛ durnya ere to be bewura bee sɔ lampo ashi bumo gbagba be mbia kutɔ ŋko basa pɔtɛ nɛ baa sɔ?” 26Nɛ Pita kaŋɛ: “Basa pɔtɛ nɛ baa sɔ.” Nɛ Yesu kaŋɛ mo: “Kumo ere bumo be mbia maŋ ti so nna na. 27Ama ŋkpal a ka maŋ daga an ka fɛl bumo na so, yɔ kepagboŋ na to n ya lɛ dariwa m bugi kɔrɔtɔ nɛ feeŋ fara m pɛ na be kɔnɔ to. Feeŋ nya kemansherbi kumo to. Lara kumo n ya ka ma nɛ fo be lampo.”
Currently Selected:
Matiu 17: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
Matiu 17
17
Kemaŋkura nɛ Yesu nya be asheŋ
(Maak 9:2-13; Luuk 9:28-36)
1Asheŋ nɛ Yesu malga na be nchɛnshe be kaman nɛ e keta Pita nɛ Jeems nɛ mo sipo Jɔn nɛ mo nɛ bumo nawule ya dii kebee jeŋgreŋ ko so n ya chena ndoŋ gbrɛbi. 2Ndoŋ nna nɛ e kilgi kanaŋ ko bumo be anishito nɛ mbe anishiakpa fuli to a nyɛkpɛ fanɛ epeŋi nɛ mbe asɔbuuso malɛ fuli to parr a kpa edɛ. 3Kumo be kaman nɛ bebɛsopo asa na wu anebi Mosis nɛ anebi Elaija ka ba kaa malga Yesu kutɔ. 4Ndoŋ nna nɛ Pita kaŋɛ Yesu: “Enyɛnpe, anyi be kebaawɔ nfe ere nyalɛ ga. Nɛ fee sha, meeŋ yuu abuu asa nfe nɛ kukoŋwule e baa la feya nɛ kukoŋwule e baa la Mosis peya nɛ kukoŋwule malɛ e baa la Elaija peya.” 5E kraa malga nna nɛ kuwɔlpa nyɛkpɛso ko lar nɛ kumo be kiyoyul ba buu bumo so nɛ ebɔl shi kuwɔlpa na to ŋ kaŋɛ: “M Pibinyɛn shaso nɛ ma kagbene fuli mo so ga nde. Men baa nu mbe kɔnɔ.” 6Bebɛsopo na ka nu loŋ nɛ kufu pɛ bumo nɛ b tɔr m pugi bumo be anishi so. 7Ama Yesu ba beta m beta bumo nseŋ kaŋɛ: “Men niŋi to, men sa maa lɔ kufu.” 8B ka niŋi to ŋ keni nɛ Yesu nawule e yil, esa kama maŋ naŋ ti mo so.
9Ndoŋ nna nɛ bumo kikɛ fara a gbelge kebee na so nɛ Yesu ji bumo asoe to ŋ kaŋɛ: “Men sa maŋ kaŋɛ esa kikɛ kusɔ nɛ men wu na be asheŋ hale nɛ ma, Nyiŋgbasa Pibinyɛn e ya tiŋi luwu to.”
10Nɛ bebɛsopo na bishi mo: “Nɛ manɛ e ba nɛ mbraŋinipoana na bee kaŋɛ fanɛ anebi Elaija daga kejuŋkpar m ba na?” 11Nɛ Yesu kaŋɛ bumo: “Kashenteŋ, Elaija bee juŋkpar a ba nɛ e ba lɔŋɛ kusɔ kama n yili. 12Ma alɛ e kaŋɛ menyi na fanɛ Elaija teŋ ba, ama basa maŋ pin mo nseŋ wora mo kusɔ kama nɛ k par bumo. Loŋ koŋwule na malɛ gbagba chap nɛ ma, Nyiŋgbasa Pibinyɛn gba beeŋ wu tɔrɔ bumo be enɔ to.” 13E ka malga le be asheŋ ere n loge nɛ bebɛsopo na pin fanɛ Jɔn kabɔrɛbɛrpo be asheŋ nɛ e daa malga a sa bumo na.
Yesu ka chɛ kebinyɛnbi nɛ mbuibi lubi tɔr so na be asheŋ
(Maak 9:14-29; Luuk 9:37-43a)
14B ka bɛta m ba jimaŋ na kutɔ nɛ kanyɛn ko ba Yesu kutɔ m ba gbir mbe anishito 15nseŋ kaŋɛ: “Enyɛnpe, jande wu ma pibinyɛn kuwɔr. E bee tɔr kegbuŋgbuŋ nna nɛ k bee tɔrɔ mo ga hale a shin nɛ e bee kaa tɔr edɛ to ŋko nchu to. 16M bar mo fo bebɛsopo kutɔ nna fanɛ b chɛ mo, ama b maŋ tiŋ.” 17Nɛ Yesu bishi bebɛsopo na: “O menyi mbreebi, nuso be basa lubi e la menyi nɛ men maŋ kɔ yirda ere bre? Nuso be kechɛr nɛ menyee sha fanɛ n chɛr menyi kutɔ? Nɛ nuso be kanyiti nɛ menyee sha fanɛ n naŋ ta ŋ keta menyi? Men bar kebia na ma kutɔ nfe.” 18B ka bar mo mo kutɔ nɛ e fiɛ kiyoyu lubi na so nɛ k lar kebia na to nɛ e nya eleŋ epul na to. 19Kesheŋ ere be kaman nɛ bebɛsopo na ŋana m ba bishi Yesu: “Manɛ e ba nɛ anyi ere maŋ tiŋ n ju kiyoyu lubi na?” 20Nɛ Yesu kaŋɛ bumo: “Men be yirda ka maŋ shi so nɛ men maŋ tiŋ na. Ma e kaŋɛ menyi kashenteŋto na fanɛ nɛ men be yirda baa du fimbi fanɛ kakilia be kebi gba, menyeeŋ tiŋ ŋ kaŋɛ kebee ere le: ‘Pulgi fo kumu nfe n yɔ ndoŋ ere!’ Nɛ k pulgi. Shɛŋ shɛŋ maaŋ baa du menyi so kpakpa. 21[Ama le be kiyoyu ere bre maa lar esa to loŋ ama bebɛsopo na baŋ kishi nna ŋ kule Ebɔrɛ.]”
Yesu ka naŋ malga mbe luwu be asheŋ
(Maak 9:30-32; Luuk 9:43b-45)
22Kachako Yesu nɛ mbe bebɛsopo ka ba shɛr Galili nɛ e kaŋɛ bumo: “Baaŋ ta ma, Nyiŋgbasa Pibinyɛn m bɔɔ basa enɔ 23nɛ b mɔ ma, ama kumo be kachɛ sasopo to Ebɔrɛ beeŋ naŋ tiŋi ma luwu na to.” Nɛ bebɛsopo na be ŋgbene jija bumo ga.
Bɔrɛlambu to be lampo be asheŋ
24Yesu nɛ mbe bebɛsopo ka ba Kapɛɛniam nɛ ndoŋ be bɔrɛlambu be lamposɔpoana ba bishi Pita: “Men be Eŋinipo maa ka bɔrɛlambu be lampo na ŋko?” 25Nɛ Pita kaŋɛ bumo: “Mm, e bee ka.” Pita ka ba luri laŋ to Yesu e fara m malga, e yɛ: “Saimɔn, kaŋɛ ma kusɔ nɛ fee fɛ kesheŋ ere to. Fee tama fanɛ durnya ere to be bewura bee sɔ lampo ashi bumo gbagba be mbia kutɔ ŋko basa pɔtɛ nɛ baa sɔ?” 26Nɛ Pita kaŋɛ: “Basa pɔtɛ nɛ baa sɔ.” Nɛ Yesu kaŋɛ mo: “Kumo ere bumo be mbia maŋ ti so nna na. 27Ama ŋkpal a ka maŋ daga an ka fɛl bumo na so, yɔ kepagboŋ na to n ya lɛ dariwa m bugi kɔrɔtɔ nɛ feeŋ fara m pɛ na be kɔnɔ to. Feeŋ nya kemansherbi kumo to. Lara kumo n ya ka ma nɛ fo be lampo.”
Currently Selected:
:
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation