2 KORINT 5
5
1Kheakü isa lakhi alomi khimyam thsümünimsho, mihtsürü khahnü müthsükhi yinmi ching lün yam Thrünpuh kilimnü lah de isanü mükheahlah. 2Tüsho yinmi ching yo thüyam isa kheak phukihpü khide künsahde isa mulong dukchoh, 3junangde ju phuyukhinü isa bünkeang müngüde alabah. 4Tümüde isa ha khimyam ching lachoki, isa mulong duklah tüsho hahmülang lah, tümütüsho isa muphuyupü yung tüshe yinmi yamnü aphudopü künlah, junangde tümü ashepü lanü rhangdungnü muyuabahbah. 5Shepünü isa thsungkheak harü tsanglungkhea, shepünü isa kilim mütsanmükhi thsüde Me jihkheanü, ju Thrünpuh ah.
6Jumonü isa kamruhroro mulong tode lah; isa ha pang yam ching lachokia Atungpuh kheaknü chamkhibah lah de isanü mükheahlah, 7tümüde isa akinnü tsahchoh, angükhinü yung. 8Isa mulong tode lah, tüsho isanü pang kheaknü chamkhibah Atungpuh lung thüyam ching lapü mulonglah. 9Jumonü isa thüyam ching yungsho chamkhibah lalashe, isanü api asühshihpü mükkheahkih thsüchoh. 10#Rom 14.10Tümüde isa alala Khrista thiyukhap binkiu miki labah, junangde mihbüm abannü pang ching rhimokhi ayannü atsü yungsho amütsü leangkhibah.
Khrista hode Thrünpuh ki Müyamrü
11Jumonü, Atungpuh trekhi mükheahde isanü mihtsürübo münityukchoh; tüshe isa tümüanü Thrünpuhnü mükheahlah, tüsho nüsa lümkhi ching she ju mükheahlah de inü akin lah. 12Kheaküshe isanü nüsa ki shilode mütha tüshe isa dünkheak kükheangpü nüsa ki amütsan jihchoh, junangde nihbuh yakli chingnü yungde mihtsürü lalim kheak lülüshishirü ki nüsanü alokhukbah. 13Tümütüsho isa ju isa tsangde lasho, ju Thrünpuh thsungkheak lah; isa ju isa lümkhi alungki ching lasho, ju nüsa thsungkheak lah. 14Tümüde Khrista amuzhonü isa danlochoh, tümütüsho alala dünkheaknü khülang shedo de isanü mütsanlah, jumonü api shekhi ching alalanü shihcham luchoh. 15Tüsho alala dünkheaknü api she, junangde sherü rhangdung lanü kheaküa nihbuh thsungkheak müla tüshe arü dünkheak shebah arhang kamlobuh thsungkheak labah.
16Jumonü kheakünü ründe isanü sheshe mihtsürü lalim yande mükheahyuk; isanü khülang ki Khrista ju mihtsürü lalim yande kheahyuka lalashe kheaküa isanü api ju jude müthsü. 17Jumonü khürü Khrista ching lasho, api aso thrünlokhi ah; awünbe hode tsodo, kheahang, aso arüdo. 18Ha alala Khrista hode isa api lung tsüarihkhi tüsho tsüarihkhi tankih rhimo isa kilim jihbuh Thrünpuh kilimnü lah; 19juju mihtsürübonü arü azhihde neak yihbeakkhi mükhede Thrünpuhnü alomi ju Khrista ching anihbuh kilim tsüarihshih. Tüsho apinü isa kilim tsüarihkhi yusheak jihdo. 20Jumonü Thrünpuhnü isa hode tuthsukkhi nangde, isa ju Khrista yo limburü ah. Khrista thsung thsüde isanü nüsa ki mushuchoh: Thrünpuh kheak tsüarihang. 21Tümüde isa ju api lung Thrünpuh yo thiyuro-lungkirü kampü thsüde apinü isa dünkheaknü neak mümükheahbuh neak yihbeakshih.
Currently Selected:
2 KORINT 5: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.