Hebrews 11 ਤੋਂ ਪ੍ਰਸਿੱਧ ਬਾਈਬਲ ਆਇਤਾਂ

ਸਾਂਝਾ ਕਰੋ

Ugpeqillghem liisimakestengngwaaghiinkut allgeghsaghqaqniluku sighmakegkaghput, ipapighqusiguq esghaghyaghqaqenghilkemnnun. Ugpeqilleghmegteggun ayumiim yugi itagnaqellengegkaagut Kiyaghneghmeng.

Ugpeqillngunani kitum alngunak efqughtepagningitaa Kiyaghneq. Kina alngunak tagiyukumi Kiyaghneghmun ugpeqepestaaghyaghqaqaa Kiyaghnelguniluku, akileghtughyaghqaqiillu ivaghipiilghiit ellmineng.

Ugpeqilleghqun liigikegkaqaghput Kiyaghneghem ulimaaqaa nuna akuzitmikun. Tamaakut aliilnguut ulimaaghuut esghaghyaghqaanghilngughmeng.

Ugpeqilleghqun Abraham‑em qaatkegkaqaa Kiyaghneq tuqlughaqngatni aghulaqesqelluku ilanganun nunam. Kiyaghneghem akequsaqaa taana nuna ellnganun tuunelleqniluku. Enkaam unitkaqaa ellmi nunani nallukluku navek pinaqutni. Ugpeqilleghqun kiyaghtekaaguq nunataaluni nunami Kiyaghneghem akequsaqegkaani. Tiintanitkaaguq katam Isaac‑enkuk Jacob‑enkuk pillghegketun. Elkegkenkallu allgeghtekaqaak Kiyaghneghem akequsaqegkaa taana nuna.

Ugpeqilleghqun Noah‑m nagatkaqii Kiyaghneghem kelengasaaghutkii tamaakut salin pingigalluki. Enkaam qaatkelluku Kiyaghneq angyaghpangllaqaaguq nengllugutni yugulinaluki ulevelleghmeng. Tawaten pilleghmikun Noah‑m nunam yugi nanqigtestekaqii Kiyaghneghmun aghyuughesqelluki. Ugpeqilleni apalluqluku Noah‑m allgeghtekaqaa elqughutngalleq Kiyaghneghmeng.

Upeqilleghqun Enoch mayuutestekaaguq qilagmun enkaam nanghiillghitaa tuqulleq. Kitum alngunak naalkellghitaa qayughllak Kiyaghneghem tugukaqegkanga. Mayullghilluni qilagmun, igaqngakaaguq Enoch‑em efqughtekaqaa Kiyaghneq.

Ugpeqilleghqun Abel tuunikaaguq Kiyaghneghmun tuguklighyugnaghataghalghiimeng aghqutmeng Cain‑em aghqutkegkaaneng. Kiyaghneq pikaaguq Abel elqughutngalghiinguniluku yuuk ugpeqillgha apalluqluku. Kiyaghneghem ipapighqegkaqaa Abel elqughutnganiluku tuguklilleghmikun tunusii. Ugpeqilleghmikun Abel paninang akuzinguuq, tuqukaayaghngaaghmi.

Abraham nanevgaghllaghngaaghmi, Sarah‑llu qumingyaghqaanghiteghngaaghmi, paninang ugpeqilleghqun Sarah qumingegkaaguq, qayughllak neghyukegkaqaa Kiyaghneghmun pilleqniluku akequsaqegkani.

Abraham tawaten pikaaguq qayughllak utaqiingulghii kiyaghhnaluni neghllagmi tunemaghtuqami. Kiyaghneghuuq uspeqistengallu ulimaghistengallu neghllagem.

Ugpeqilleghqun Moses, yugughsami ighsakaaguq ighneqesneghmeng Pharaoh‑m paniganun. Yeghlegi nakmiiqaaguq ikfiqelgusighnaluki Kiyaghneghem yugi, avelghaghluku efqughyugnallgha seghleghqellghem muluyaghqaanghilnguq. Itupill sumeghtaghaatkegkaqaa ikfiqelleghqani Christ‑amun itagnaghataghaghniluku aklungilghutanganeng Egypt‑em. Sumeghtaghaatkengngwii akileghtuusaghqat aga sivumelnguut. Ugpeqilleghqun Moses‑em unitkaqaa Egypt alingellngunani umiilgem sakraallghaneng. Iilqayugumangituq qayughllak esghalghiistun pikaqegkanga aliinneghilnguq Kiyaghneq.

Kiyaghneghem akeqegkaqegkanga Abraham, “Isaac‑ekun kinguneghllagullequten.” Ugpeqilleghqun Abraham‑em neghyukegkaqaa Kiyaghneq nanghiiqwaaqngatni. Enkaam aghqutkesaghqaaghtekaa kezemaghhaq ighneni, Isaac.

Ugpeqilleghqun Rahab‑em, yugusimineng akikikayugem, upughatkaqaak Israel‑eghmiit riirngistegket. Tamaaken apalluqluku tuqullghituq maligulluni qaatkusigalngughnun Kiyaghneghmun.

Ugpeqilleghqun Israel‑eghmiit aghviqaqaat Red Sea nikimqun qutestun. Iwernga Egypt‑eghmiit, aghvighnaqutkengnguluteng pekaqutkaagut.

Ugpeqilleghqun Israel‑eghmiit maaghraghvinlegni aghneghni uzivgaqaqaat Jericho‑m mingllutanga. Taagken minglluta ulleghaatkaaguq.

Ugpeqilleghqun Moses‑em qelqaqii yuget Passover‑esqelluki, qelghutkaqaallu aakw sivillagtaatesqelluku amigteggun. Enkaam Yaqulgan Tuqullghem tuqutellghitii ighneqsuwhaaghit Israel‑eghmiit.

Ugpeqilleghqun Joseph‑em, kenletghuunnaqellghani unguvalleghmi, akuzitkegkaqaa aghulaqelleghqaat Israel‑eghmiit Egypt‑meng. Apeghtuutkaqiillu neghqwaani naten salleghqii.

Ugpeqilleghqun Jacob‑em, tuqunaqnguluni quyastekaqaak allakaqaghtaagkenka ighneghqek Joseph‑em. Taagken qungughlluni ayaviighmikun maniguqaqaa Kiyaghneq.

Ugpeqilleghqun Isaac‑em quyastekaqaak Jacob‑enkuk Esau‑nkuk, tungsiitkaqaak Kiyaghneghmun quyastesqellukek aaghakaghqiik.