2 Corintios 8
8
Ri kasa'n caya'i' chique rutinamit ri Dios e c'o Jerusalem
1Hermanos, cakaj queta'maj alak ri unimal rutzil uc'u'x ri Dios xquic'ut rutinamit ri Cristo e c'o pa tak ri luwar re Macedonia. 2Tob rique na xa ta jubik' ri c'ax quic'owibem, ri qui'cotemal c'o cuc' na jinta utakexic. Y tob lic e niba'ib, xic'ow ne uwi' ri xquiya che quito'ic ri cachbi'il.#1 Co. 16:1-4 3Ri'in cambi'ij ri xinwilo: Ri xquiya'o lic pa canima' xalax wi. Na xew ta xquiya e chirij ri c'o cuc', ma xquiya ne uwi'. 4Lic c'u xebelaj che cakaya luwar chique ebare jun quequito' pan rutinamit ri Dios ruc' wa kasa'n camolic. 5Janipa c'u ri koye'em ri'oj chique na xew ta chi xqui'an ri', ma nabe ne xquiya quib puk'ab ri Dios, c'a tec'uchiri' xquiya ri canima' chike ri'oj cha' jela' caqui'an janipa ri rajawal uc'u'x ri Dios. 6Ruma c'u la' hermanos, xkabi'ij che ri Tito chuq'uisa na utza'm wa chac xujek uc' ralak puwi rumolic ri kasa'n, ma wa' e c'utubal re ri relej c'u'x alak.
7E lic utz ri 'anom ralak che ronoje tak wa': lic c'o cubulibal c'u'x alak ruc' ri Dios, lic carik alak utzijoxic Ruch'a'tem ri Dios, ya'tal runa'oj ri Dios che alak, alak sac'aj che u'anic ruchac ri Dios yey lic ne c'ax cojna' alak; jec'uri'la', 'ana alak chi utz wa jun chac re quito'ic ri nic'aj chic ka hermanos. 8Ruc' wa' na quintajin ta che uya'ic jun takanic che alak. Ma xew xintzijoj che alak ri quisac'ajil ri jujun chic che quito'ic ri cachbi'il, cha' jela' cac'ut alak pakatzij wi c'ax quena' alak ri jujun chic hermanos. 9Ma lic eta'am chi alak ri unimal rutzil uc'u'x ri Kanimajawal Jesucristo. Rire lic beyom; na ruc' ta c'u ri', ruma ri rutzil uc'u'x che alak, xu'an niba' che rib cha' ruc' runiba'il e xuya rubeyomalil ri Dios che ralak.
10Chwi c'u wa kasa'n camolic, canya na'oj alak puwi ri takal che ca'an alak; ma junabir xjek lo alak umolic wa' yey x'an alak ruc' ronoje c'u'x alak. 11Ec'u wo'ora q'uisa pan alak utza'm wa' ruc' ronoje c'u'x alak, jela' pacha' ri xjekebej lo alak u'anic. Ya'a c'u alak janipa ri cach'ij alak uya'ic. 12Ma e junok lic caraj cakasanic, ri Dios cuc'ul chi utz ri kasa'n cuya'o e chirij ri c'o ruc'; ma ri Dios na cutz'onoj ta che jun ri na jinta ruc'. 13Na cambi'ij ta wa' cha' cacanaj can alak pa niba'il ruma ri queto' alak jujun chic. Ma e ri caraj e chikajujunal c'o kuc' janipa ri cajawax chike. 14Wo'ora pak'ab alak c'o wi queto' alak ri e c'o pa c'ax. Takal c'u che alak cajach alak upa ri c'o uc' alak cha' jela' catz'akatisaj alak ri cajawax chique rique. We xopon c'u juna k'ij echiri' ralak c'o alak pa c'ax, ec'uchiri' takal chique rique caquito' ralak. We conoje jela' caqui'ano, caya'taj c'u chique chiquijujunal janipa ri cajawaxic. 15E jela' pacha' ri tz'ibital can pa Ruch'a'tem ri Dios:
E ri lic q'ui xumolo,
na jinta ukax xcanaj can ruc'
ma xujach chique ri jujun chic;
yey e ri na q'ui ta xumolo,
xakare' xu'ana pan ruc'
ma ri cajawax che xya'taj ruma jun chic Éx. 16:18
cacha'.
Ri etakom bi che umolic ri kasa'n
16Xa maltiox c'u che ri Dios ma ucojom pa ranima' ri Tito cuto' alak jela' pacha' can'an ri'in. 17Ma xew ximbi'ij che que'rila alak, na jampatana ruc' qui'cotemal xunimaj ma lic cacha uc'u'x che que'rila wach alak. 18Junam c'ut ruc' ri Tito cakatak bi jun chic hermano cha' carachbilaj bi. Wa' e jun lic chom ruch'a'tibexic ca'an pa tak riglesias ruma ri utzilaj chac u'anom che utzijoxic ri Utzilaj Tzij. 19Na xew tane wa', ma wa jun hermano cha'om cuma riglesias re cojrachbilaj pa tak ri coj'ec wi che umolic y che ujachic wa' wa kasa'n. Wa' wa chac oj c'o wi e re yacbal uk'ij ri Kanimajawal Jesucristo y e c'utubal re ri relej kac'u'x. 20Ecojom kachbi'il cha' na jinta c'o quech'a't chikij che uchapabexic wu'q'uiyal kasa'n c'o pakak'ab. 21Ri cakaj ri'oj e caka'an ronoje chi utz chwach ri Kanimajawal Jesucristo y chiquiwach ri ticawex. 22E uwari'che junam cuc' ri quebec, cakatak bi jun chic hermano. Wa' na xa ta julaj uc'utum lic cacha uc'u'x che uq'uiyal chac. Yey wo'ora más ne cacha uc'u'x che wa benam ma lic cubul uc'u'x uc' alak. 23Ri Tito e wachbi'il ri'in, junam oj to'bel e alak. Yey ri hermanos erachbilam bi, echa'om lo cuma ri tinamit re ri Cristo, ma ruc' ri quibinic quisilabic quiyacom uk'ij ri Cristo. 24E uwari'che chec'ulu alak chi utz cha' jela' cac'ut alak ri rutzil c'u'x alak y jec'ula' cak'alajin chiquiwach riglesias su'be lic cojqui'cot che alak.
Markert nå:
2 Corintios 8: acrT
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2009, Wycliffe Bible Translators, Inc. All rights reserved.