Nzyeté 17
17
Ábalam cʉʼʉ́ Ábalaham
1Ábalam la gwɔ́ tà ńgẅiin ngùʼ ntsɔ̀b lepfwɔʼɔ́ lé móm lepfwɔʼɔ́, Cʉ̀apʉ̀a kẅɛɛ mvfò yé, ńgɔɔn né yé ngie: «Mèŋ n gee Ssé gie e pú ńgẅiin ngʉ̀ʼ. Giŋ páʼ n ne ńkwoŋo, gwɔ́ shwòŋe ńdiŋe. 2N ge gÿo pɔ̀gɔ gwaa kʉ̀a, é gÿo ngẅɛ̀ jú zyéen tà ńzyéen.» 3Ábalam júʼ púʼu, ńŋwɔ́ʼ nnɛ́ tà zǐ yé kíbe ssé, Cʉ̀apʉ̀a gɔɔn né yé ngie: 4«Akʉ̀a gie n ge gÿo pɔ̀gɔ gwa, á yɔɔn: ɔ̀ ge gÿo gwɔ́ mángʉanjʉʼ mengwòŋ tà ńgyɔ́ɔn. 5Mé té ge gíŋe tóŋo gú lê Ábalam wɔ́, ɔ̀ cʉ̌ʼ ńgwɔ́ pɔ́ Ábalaham. Mélàʼmie n gÿǒ, ɔ̀ cʉ́ʼʉ mángʉanjʉʼ pʉ̀a mengwòŋ tà ńgyɔ́ɔn. 6N ge gÿo gÿo ngẅɛ̀ jù zyéen tà ńzyéen, é gÿo ɔ̀ nuŋe mengwòŋ. Ɔ̀ ge gÿo zyé mefùɔ. 7N ge kúʼte kʉ̀a yɔ́gɔ̀, áa kʉ̀a té láʼ ḿmag. Á ge fó na gù, é kúu na ngẅɛ̀ jù mejwoŋó mejwoŋó. À cʉa púʼu, n gwɔ́ Ssé jù. Ńgwɔ́ ye ngẅɛ̀ jù, tà mbɔɔ fʉ̀ʼ gie ɔ̀ te láʼ gíŋe gwɔ́ wó wɔ́. 8N ge gÿo náa láʼ gie ɔɔ wó, ńgwɔ́ ngʉ̀ lɛ̂ né gù, tà mbɔɔ né ngẅɛ̀ jù gie e ge láʼ tá gwɔ́ wó. Ngwòŋ Kánàhan ntsèm ge láʼa cʉ́ʼʉ gwɔ́ pɔ́ wɔ́b. M biŋ ńgwɔ́ Ssé yɔb.» 9E Ssé gíŋe ńgɔɔn né Ábalaham ngie: «Pi ngẅɛ̀ jù na mejwoŋó mejwoŋó giŋ páʼ yɔɔn kʉ̀a né ńzɛ́te, tà mbɔɔ fʉ̀ʼ gie ɔ̀ te láʼ gíŋe gwɔ́ wó wɔ́. 10Lepʉ̌ sie n zǎb ngie pi ngẅɛ̀ jù giŋ páʼ é ne ńzɛ́te, tà mbɔɔ fʉ̀ʼ gie ɔ̀ te láʼ gíŋe gwɔ́ wó wɔ́, é sɔɔn: pi ge láʼa púʼu púɔ mbàŋa ntsèm tsetsɛ̀ɛ pi. 11Lepuʼú jʉʼʉ nnɛ́ ŋwɛ́ ge láʼa gwɔ́ liŋé kʉ̀a gie áa tsetsɛ̀ɛ pege. 12Mé ge láʼa zyé múɔ mbàŋa na ngẅɛ̀ gi mejwoŋó mejwoŋó, e cʉa lyɛ̌ʼ lefɔ̌ɔn léfó lyɛʼɛ́ nzyé, mé púʼu yé. À kwoŋ á gwɔ́ zyé gẅi, ńkwoŋ á gwɔ́ zyé nyìŋ gẅie mé la lɔg nkáb ńjúu yé mbwó nyìŋe túm gẅie à te na ngẅɛ̀ gi wɔ́. 13Púʼu la, mé ge láʼa púʼu múɔ mbàŋa gẅie à kẅɛɛ na ngẅɛ̀ gi, mbɔɔ gẅie mé lɔ̌g nkáb jù, ńjú. Akʉ̀a yɔ́ɔn gie áa na mbab nnɛ́ gi, aa kʉ̀a temàg. 14Ńgʉa na mámbàŋa gẅie mé kaa púʼu yé wɔ́, mé fó nùɔ pʉ̀a láʼ ńjwoŋo yé. Ńtí nue à zyɛʼɛ́ kʉ̀a yɔ́ɔn.»
15E Ssé gíŋe ńgɔɔn né Ábalaham ngie: «Te gíŋe ńtóŋo nzwě gù lê Salayi, mé ge cʉ́ʼʉ tóŋo yé pɔ́ lê Sǎlà#17:15 Salayipɔ́ Sǎlà: ée mentí mémbʉ́a lélɔg ŋweʼe tàʼ lezíŋ, á lɔgɔ ńgɔɔn ngie múɔ ntɔ́ʼ.. 16N ge cÿɔʼɔ Sǎlà, pi yé zyé múɔ mbàŋa; é cÿɔʼɔ yé púʼu, à gÿo ńgwɔ́ mángʉanjʉʼ mengwòŋo mengwòŋ; Mefùɔ meláʼa meláʼ piŋ ńdáʼ kẅɛɛ na ngẅɛ̀ ye.» 17Ábalaham júʼ púʼu, ńŋwɔ́ʼ nnɛ́ tà zǐ yé kíbe ssé, tá ńgẅe, ńtí nue à la ne ńkwaŋte tsɛ̀ɛ ntʉ́m yé ngie: «Mèŋ gẅie n gẅǐin ngùʼ nkÿo, ngwɔ́ á cʉa lêkɔ́ tà mèŋ n gíŋe ńzyé? Ngwɔ́ Sǎlà gẅie à gẅiin ngùʼ móm lepfwɔʼɔ́ gíŋe ńzyé múɔ lá?» 18Ábalaham gɔɔn né Ssé ngie: «Anò gwɔ́ pɔ́ ngie ɔ̀ pɔ́ɔnte Esemayɛ̂ɛ, à gwɔ́ wó!» 19E Ssé gɔɔn ngie: «Ngǎŋ, á té púʼu wɔ́, pi nzwě gù Sǎlà ge gÿo zyé tàʼ múɔ mbàŋa. Ɔ̀ tsẅi lezíŋ sé lê Ésàg. N ge gÿo gÿo akʉ̀a yɔ́ɔn gie áa kʉ̀a temàg, à gwɔ́ yé, ńgwɔ́ ye ngẅɛ̀ yé; tà mbɔɔ fʉ̀ʼ gie à te láʼ gíŋe gwɔ́ wó wɔ́.» 20Ńgʉa na Esemayɛ̂ɛ, mbà mèŋ n jǔʼ. N ge cÿɔʼɔ yé, é gÿo à gẅiin gubé tɛʼ, é gÿo ngẅɛ̀ ye zyéen tà ńzyéen. À ge láʼ zyé púɔ ntɔ́ʼ ntsɔ̀b pʉ́a. É piŋ nuŋe máamáa ngwòŋ. 21Táʼ, ńgʉa na kʉ̀a yɔ́ɔn, mbà peg Ésàg ge gwa, aa múɔ gẅie pi Sǎlà ge zyé fʉ̀ʼ páʼɔɔn, á ntyě fʉ̀ʼɔɔn.
22E Ssé pɔ́ Ábalaham la shwóŋo tà ńtsẅé jʉʼ, e Ssé nyé Ábalaham, ńkwɔ́ʼ né tÿǒ. 23Kwàʼ lyɛ̌ʼ ŋwɛ́ gie Ssé la gɔɔn, Ábalaham pú ḿbúʼ mbàŋa ntsèm gie é laa ndá yé: á míŋ we Esemayɛ̂ɛ, é mbàŋa ntsèm gie mé la zyé ndá yé, tà mbɔɔ menkwɔɔn pie à la lɔg nkáb ńjú. 24Mé la gwaa púʼu Ábalaham mbà à gẅǐin ngùʼ ntsɔ̀b lepfwɔʼɔ́ lé móm lepfwɔʼɔ́. 25Ńgwaa púʼu Esemayɛ̂ɛ á gẅiin ngùʼ ntsɔ̀b tá lé legém. 26Mé la pú ḿbúʼu wɔ́b pɔ́ tàʼa lyɛ̌ʼ. 27Ńgwaa púʼu wɔ́b púʼu, ńgíŋe ḿbúʼ mbàŋa ntsèm gie é laa ndá Ábalaham, pâ menkwɔɔn pie mé la zyé ndá yé, tà mbɔɔ menkwɔɔn pie mé la júu mbwó megʉ̀.
Markert nå:
Nzyeté 17: nnh
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2026, CABTAL
