1Gelindo 10
10
Isilie Bexinla Mutun Nigiedalai Bu Bei
1Gaijiula, matanyi xienrenla eqighandei olien dourase haise daosan ene shiqinyi bi tai goude jilaghane giezho. 2Manla olien dourase haise xili jienliezhi Musai daghawo. 3Manla niekielienji ruhhertu ijiunii ijiewo. 4Manla niekielienji ruhhertu usui ochiwo. Ochisanshi hhelare yosan ruhhertu tashise khizhesan wo. Ene tashishi Mexiha wo. 5Ingieliuzhe hhelai dundadu fugie olie kunlade Huda xiqi wise hhelai hontande alawo.
6Fashen giesan ene shiqinla matande jingao giezhi hhela mutun doghun shiqinni bu neii giezho. 7Ye hhelai dundadu kunla mutun nigiedalai bu beii giezho. Jinwun jiere jilasan mutun, "Bexinla sousenu ochizhi ijiene, bosizhese nadune." 8Hhela kunlare lon kijiezhi niudude 23000 kun fuguwo. Matan hhela mutun bu gieye. 9Hhelai dundadu kunla Ezhanni shiidene moghei zhou alawo. Matan hhela mutun Ezhanni bu shiiye. 10Hhela boxin kieliedene azaraili qienxien hhelai aminni agiwo. Ta hhela mutun boxin bu kielie. 11Enezighan shiqinla hhelai jiere fashen giezhi kunlade jingao giezho. Matan enezighan duya baraku kunlade surughane giezhi huaizho. 12Ingiese goyane beizhi undanlawo giesanla indan xioxin gie, pse banjine. 13Tande iresan shiiku kunlade man wine. Hudashi kekaoni wo, Hhe tande danji daku shiikui ulie ireghane. Shiikude tande nie piiku mo keighazhi tai danji shidaghane.
Nigiedalai Beiikuse Gholodo
14Ingiese mii orentula, ta nigiedalai beiikuse gholodo. 15Bi minbaitu kunlade kieliezho, bi kieliesanlai ta goyalane uzhezhi gie. 16Matan onxian giedene ochisan fuqitu beizishi Mexihani chusunde hhantulasan pushonu? Matan ginan ghuluzhi ijiekude Mexihani beyede hhantulasan pushonu? 17Ginan niekozi wo, matan kun olon woma, nie beye wo. Matan man nie ginande hhantulazho. 18Ta Isilie bexinlai sumula, sidagha gieku teizi jieredu dunxii ijiesanlashi sidagha gieku teizide hhantulasan pushonu? 19Bi kieliesanshi yan isi wo? Nigieda, pse nigiedade ogisan ijiunishi yan wo? Yamada pusho! 20Bi kieliesanshi niman kunla ogise Hudade ese ogizho, sheitande ogizho. Bi tai sheitanre hhantulaghaku duran uwo. 21Ta Ezhanni beizii ochidene sheitanni beizii ochise jiedui ulie olune. Ezhanni xii soudene sheitanni xii souse jiedui ulie olune. 22Matan Ezhanni reizhi hokughanu? Matan hhense fama onu?
Yan gieliuzhe Hudai Kuaine Giezhi Gie
23Yanniliuzhe giese olune giezhi kunla kieliezhoma, man haochu wineku pusho. Yanniliuzhe giese olune giezhoma, man kunlai hendaghakui pusho. 24Kienliuzhe goyane haochude bu olu, kunlai haochude olu. 25Shichande huisan mighalai ta man ijie, lianxinni yenyinghala yama bu asadene ijie. 26Zemin, zemin jiere durusanlashi man Ezhannughun wo. 27Niezhan xianxin ulie giesan kunla tai xinlazhi ijieghase ta duran bizhi echise tai melie beilasanlai ijie, lianxinni yenyinghala yama bu asa. 28Bifan "eneshi nigiedade xienji giesan ijiuni wo" giezhi kunla tande kieliese, hhe kunde oluzhi, lianxinni yenyinghala bu ijie. 29Bi kieliesanshi tai lianxin pusho, hhe kunyi lianxin wo. Mii ziyuni yangiezhi kunlai lianxinghala kieliene? 30Bi mafan kieliedene ijiese yangiezhi bi mafan kieliesan ijiunii yenyinghala mii sugiene?
31Ingiese ta ijie, ochi yan gieliuzhe Hudai kuaine giezhi gie. 32Bugon Yutai kun, Xila kun, Hudai jiohuiliuzhe ta hhelai bu banjigha. 33Bi giesan mutun yan shiqindeliuzhe kunlai bayasugha. Goyane haochude bu oludene kunlai haochude oluzhi hhelai jiuigha.
Markert nå:
1Gelindo 10: sce
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2020-2024 River Street Publishing.